1	GEN 1:1	Agraretge Agudide kotor a gesep daratagemda,
2	GEN 1:2	able gesep ge irdireder orwaikak a lukak. Able muimui karem ge gair lu narimlare kupkupi detrapeder abi tumge, a Agudira sasrim atatmirer tumem able nige.
3	GEN 1:3	Agud eudim etkaret, “Bi obakaeret”, ege bi bakaerti
4	GEN 1:4	Agudira serer barki nalu e dasmeri.
5	GEN 1:5	E eudim bi detakemuda kupkupilam, a able bi nei itkiri Gerger a kupkupi nei itkiri Ki. Ki a idim ge kikem gerger irdireder.
6	GEN 1:6	Agud ga etkaret, “Kes obatreret eipuge ko ni wanakesmuda neis utebem” - ege akaida.
7	GEN 1:7	Agudide able kes ikaida arem ni detakemuda seplelam.
8	GEN 1:8	E able kes nei itkiri Mi. Ki a idim ga 2 gerger irdireder.
9	GEN 1:9	Agud eudim etkaret, “Able ni pe milam sepge egmedi (wataba) okokise waetami ya wayakai ged wedaketi.” - a ege akaida.
10	GEN 1:10	E able ged nei itkiri Gesep a able ni ge netat utebge etami, e nei itkiri Gur. A Agudira serer barki nalu e dasmeri.
11	GEN 1:11	Agud ga etkaret, “Gesep turum weud gair tonar lunege; luneg wi no kep waeslare a able lu yaba kep wadaragri muige yaba ageg” - a ege bakerda.
12	GEN 1:12	Able gesep turum eudi gair tonar lunege a Agudira serer barki nalu e dasmeri.
13	GEN 1:13	Ki a idim ga 3 gerger irdireder.
14	GEN 1:14	Agud eudim etkaret, “Mige bi obakaertare ko kepu wanakwaelei gerger a ki, a ko waetomeretlare kerker, gerger a urut;
15	GEN 1:15	wi zorom obazimurwa mige ko bi waiswelare gesepem” - a ege bakerda.
16	GEN 1:16	Agudide neis au bi dararsiri - lim ko abra sasrim wadike gergerge a meb ko abra sasrim wadike kige.
17	GEN 1:17	E wer gako dararsirda. Agudide able bi idagi mige ko gesep bi waiswerlare,
18	GEN 1:18	sasrim yaba wadaragri gergerem a kiem, a ko kepu wanakweilei bi a kupkupi. Agudira serer barki nalu e dasmeri.
19	GEN 1:19	Ki a idim ga 4 gerger irdireder.
20	GEN 1:20	Agud ga etkaret, “Ni turum weud gair tonar large a able mikes turum weud mi eburge.”
21	GEN 1:21	Agudide daratagemda gair tonar au gur ebur gair tonar ebur pe able gurge waurder a gair tonar mi ebur. Agudira serer barki nalu e dasmeri.
22	GEN 1:22	Agudide yabi gair werkabem nakerda a able ni ebur daratagerda ko nosik yaba waeprao gurge a ni wadamiare.
23	GEN 1:23	Ki a idim ga 5 gerger irdireder.
24	GEN 1:24	Agud ga etkaret, “Gesepide gair tonar gesep ebur waeprao: uteb a ad ebur, aule a kebile” - a ege akaida.
25	GEN 1:25	Agudide eudim yabi gair darasirda, a abra serer barki nalu e dasmeri.
26	GEN 1:26	A Agudide eudim detauti, “Pe irdi mi le dararsirei; wi wadaralei merbi kaise a merbi orwaiorwai. Yaba yako sasrim wadarake large, mi eburge a gair gesep eburge, uteb ebur a ad ebur aule a kebile.
27	GEN 1:27	Agudide eudim le daratagmi yabi nakaida ko abi kaise wadaralei. E yabi kimyar a koskir daratagmi,
28	GEN 1:28	werkabem nakaida, a detauti, “Mitkar omaskir ko waba wanagri wayakai waba nosik ya waurder kemerkemer gesepge a gesep sir wadamilare. Ka wabi dikweida able sasrimge ko waba wanake large, ni eburge, a gair ad gesep eburge.
29	GEN 1:29	Ka emetu dararsirda gair tonar kep a kurup lewer wabim arwem;
30	GEN 1:30	a gair gesep eburem a mi eburem ka sogi a lamlam luneg dararsirda yabim lewerem” - a ege akaida.
31	GEN 1:31	Agudide gair lu darasmerda ge e dararsirda, ege abra au serer barki. Ki a idim ga 6 gerger irdireder.
22601	JON 1:1	Oplera Mir teosmelu Zonaim, Amataira werem kega, “Bakiamu Ninebeiem able auka uteb, a abi able opem detager ableglam abi lera adud tonar tabakiamudari kari opge ekweidari.”
22602	JON 1:2	Ege Zonade no nerut gab etaruklu e abi bakiamulu Zopaem ge nade nar barsirer Tasis atiem.
22603	JON 1:3	E tabara ati bodomalam dikailu a akawerti able narge waiakai e ko obadmirikdari Opleilam ege Oplelut au wag temariklu, auka wag nade able nar akailu arap paikaige ga dawer.
22604	JON 1:4	Pazar eudi geumge bakeri a netatnetat taba agudem erer bakrier a bakeri narlam beberlu erepda adem dikrida ko able nar waikaidarda perper obaidari.
22605	JON 1:5	Zona ge kikem bakiamulu muige ut tipereder.
22606	JON 1:6	Narkolelut ge abi terdari a abi titmeri, “Ma nalu ikeli ut nauperidi? Eti a mara agud damos upiatidarem karim e merbi ia nasge watidikerare a mi iako nole nabaume.”
22607	JON 1:7	Able pazar tabara netatnetat batagerda, “Baru mi lu dakeware a daraimrare able luglugira atamilam pe netira gem able au wagide deremli.” Able pazargize ga lu dikeuda ege able luglugira tag bamarida Zonaim.
22608	JON 1:8	Wi eudi abi itmerda, “Ma kerbi detagrare nako marialam paki uridli muige able adud paikaige? Nalu pema ikeli? Na gedlam ma tabakiamudari? Ma na gedbuai nali?”
22609	JON 1:9	“Ka Ibru nali”, Zonade iabi daratagrare. “Ka isorgiru waikerer able Ople, able Agud kotorira, ge e able gur a gesep daratagmi.”
22610	JON 1:10	Wi umele urder Zona Opleilam tabadmiriklu. Ablegide iabi geum dararepda wige batkarti, “Ma naluglam able korepge tabadmirikda?”
22611	JON 1:11	Able wag a gur ekelei aukaise adud belei. Able pazargize abi itmerda, “Ki marim nalu akairare waiakai able au wagira urker wedemri?”
22612	JON 1:12	“Kari able gurem natimdare a ei wakai mapodan obai. Ka umele kaka giz nali ableglam able auka adud wagide wabi derpeda.”
22613	JON 1:13	Ege able pazargize no mirem kelaru uzer erebda ko able nar waigareda gesepem a wi umerkak waikadarda ableglam able wagira urker no ko aukaise baisweri.
22614	JON 1:14	Wi ga eudim Opleim erer bakri, “Ople, ki mari namosa, ma nole kerbi dikerare nabaume ese ki able lera idid adem dakadarare.”
22615	JON 1:15	A wi Zonai erpeidarda adem batawereda gurem ege keko metalug barki.
22616	JON 1:16	Ablegide able pazar nakerda Oplei geumge bakeri, wi eudim agimurda tabara zegulu a mir idagda kega wi no abi tebteb wadamilare.
22617	JON 2:1	A Oplei Mirlam au laret Zonai irmilu a ega dawer neis a netat gerger a ki muige able au larira kem.
22618	JON 2:2	Able au lar kemlam Zona erkepasameilu taba Ople Agudim.
22619	JON 2:3	E detauti, “Muige kari adud paikaige ka Agudim ererekri a E kara erer terpeida. Ka ererekri au muimui eudle paierlam a Ma kara erer tasri.
22620	JON 2:4	“Ma kari au karemge natimeda au muikakarem, nade able podagadgize kari narpomerda a mara dugdug zeuber kari tumge baraplare.
22621	JON 2:5	“Kage natkarti: “Mari erkeplam kari adem namarikdarda, ka umele ka iako erkepnakereder Mari zogozogo metaem.
22622	JON 2:6	“Able nide kari kemerkemer natkami eud maike, aukaremira mui kari nairumada. Meo kari kerimge arpomreder.
22623	JON 2:7	“Ka baitri nade paserira sip tadaramar, able gesepem ge kari kar narker niaiem epe mama kari nagimedari eudlam Ople ae kara Agud.
22624	JON 2:8	“Nade kara eded adem dorier, kage Mari nakepwari, Ople, a kara erkepasam baurwari Marim Mari zogo utebem.
22625	JON 2:9	“Netiba pe tag arsirarsir agudem kemerkemer tababu baiswereda, wipe bapekda Agudi upiatidarlam.
22626	JON 2:10	“Marim iaka auspirwed dakrier a ka iako Marim zegulu agimulu a kara nalu mir geka Mari nakwari kai akailu sikak obai. Azimwaret tikase Opleilam.”
22627	JON 2:11	A Oplelut able lar au aler detagri a ege Zonai adem ikeida watwet gesepge.
22628	JON 3:1	Agudide Zonai nerut gaber ga detagri,
22629	JON 3:2	“Bakiamu Ninebeem able au utebem a leem etomeret able mir geka mari nakwari.”
22630	JON 3:3	Zonade Oplera mir dirmiri a bakiamuda Ninebeem able auka uteb irdiredi, lelut wais 3 gerger ko abi wadatupir.
22631	JON 3:4	Zona eudi digmi Ninebeige kemerkemer gerger keubu e able mir etomerti, “40 gergerge Ninebe ia obatkoare.”
22632	JON 3:5	Ninebei legize eudi tabara oka emarda Agudi mirge. Wi tabara batagerda ko gair le lewer obazigwarare a gair le aule kebilekem adud wali waitkirare a tababu obakekrare.
22633	JON 3:6	Nade Ninebera ople able miride erpeilu e ekweilu adem digem taba baolam, wali tabara adem igi, adud wali ami a tibige emrilu.
22634	JON 3:7	E able mir Ninebe leem emariklu: “Able ople a kerimle pa uridli iaba mir wabim pedike: nole lelut netat lewer wairuser; gair le a ebur peki sab daragrida arolam a arilam.”
22635	JON 3:8	Gair legize a eburgize ko adud wali obatkir. Gair le ko alel erkep obasamwa a tabara adud tonar lu aker wadikairtare.
22636	JON 3:9	Karim Agudide tabara akepwar urkerlam wadimipigemer ko omarem a mi nole nabaume.
22637	JON 3:10	Nade Agudide tadasmeri nalu wi ikerda a nako wi taba barbar tonarlam adem batarda Ege iabi omarge tarakerda a nole iabi daratkoda ge E detauti E ia waikaida.
22638	JON 4:1	Zonara sir dormeida able luglam a weku abra barki.
22639	JON 4:2	E eudi erkepasameida, “Ople, ka nole detauti nade ka mena gedge nawer? Ableglam ka dudumge badmirikda Tasisem. Ka umele nawer mama debe tonartonar a au omaromar Ad nali, wapum lidagebge a au degdeg mara lag ike leem a able Ad ma nali ma nole lagkak le detko.
22640	JON 4:3	“Pe irdi, Ople, kara eded adem ikao, karim dike ka sikak nawer eud a nole eded.
22641	JON 4:4	Oplelut abi tiditagri, “Nako marim sikak dike ma wekuge nawer?”
22642	JON 4:5	Zona eosmeda bakiamuda emrida naiger pekge Ninebelam. E mud tabara diuri a able mudge emrida, dikairi nalu ia wakaida Ninebeem.
22643	JON 4:6	Oplede arpomerarpomer luneg ikaida omeida a Zonai kebikebi mud kirmem ikwari waiakaida abra sagim ko adem wadami a Zonara eudi serer barki able lunegem.
22644	JON 4:7	Mabekmabek nerut gergerge, Adi mirge ukide able luneg irwi a ipiti.
22645	JON 4:8	Nade lim ga teupamada Adide urweriurweri naiger wag temarikda a able limira urweri Zonai kirimge emriri abi ikaida abra erkepinor barki. Zona laglag weumida ege eudi able mir detauti, “E au sikak ia wadike karim ka naumilu a nole idid nawer.”
22646	JON 4:9	Ege Adide Zonai detagri kega, “Nalu sasrim pe mara dike ko ma able luneg wekuge akai”? Zonade abi detagri, “Kara sasrim nagri wekuem able korepge ka umele naumilu.”
22647	JON 4:10	Oplede abi detagri, “Able luneg omeida netat kige a eumida nerut kige a mara pe abim omar barukli; ma nole netat lu abim ikaida ko abi waikaida waomeida!
22648	JON 4:11	“Epe Ninebera ebur a pako 120,000em le ko duridli, able le pe nole mamoser umele uridli debele adudlam. Ei kara nole ia nas obaruk Ninebeem able au utebem?”
24285	MRK 1:1	Able debe mir peike Iesu Kerisora, Adira Werem.
24286	MRK 1:2	Able ad ge bagrareta mokakalam ge Isaia peropetade ditari: Ma asor; Ka yaka kikem kara miraisisle amariklu marim gab wadirsir.
24287	MRK 1:3	E ya erer wekrier muige sogipurge, Wa wabu barsirawem Opleem; gair lu ikerewem barkak ober.
24288	MRK 1:4	Able miraisisle, Zone Bapataiso, batomerdari muige sogipurge. E le bapataiso darapaitlare a leem marauermer: “Adem tabatarare wabi witlam a bapataiso bapaitare ya waiakai Adide waba wit adem waitkir.”
24289	MRK 1:5	Le tabakeslare Ierusalemalam a pako kemerkemer Iudaialam bakeslare bauser Zonei wasorda. Na legize ge tabara wit detautlare ege yabi bapataiso darapaitlare muige Ioridanoge.
24290	MRK 1:6	Zonera walige kamela muslam dikereder a ege amier kelarkelar lager abi gemge dimrireder. Abra lewer ge pirn nagriweretlare a pako isawira ni.
24291	MRK 1:7	Ege le natomeretlare, “Able le penoko kari keubu ikaseredi e au sasrimsasrim karim dali; ka nole abkorep ko abra teter gab adem daogilu.
24292	MRK 1:8	Kaka wabi bapataiso nige depaiteda, e ya wabi bapataiso wadikerlare Lamar Zogoge. MRK 1.9-11
24293	MRK 1:9	Keubu, Iesu tabakiamuda Nazaretlam muige Galiiaiage a Zonede abi baptaiso dikailu muige Ioridano keperge.
24294	MRK 1:10	Nade e nilam tegimeda, aududumge Iesude dasmeri kotor ekesmuda a ege Lamar Zogo dibadiba noge abim tabi.
24295	MRK 1:11	Ege kodomir teosmeda kotorlam, “Mama kara nasnas Werem nali. Kaka mari sererge nali.” MRK 1.12-13
24296	MRK 1:12	Au dudumge able Lamar Zogode Iesui emarikda sogipurem.
24297	MRK 1:13	E ge sogipurge dawer Satanade abi mirem ikerer 40 gerger. Aregareg ebur ge urder ege angela no tabatweri abi aseseredlare. MRK 1.14-15
24298	MRK 1:14	Keubu wader luge, Zonei didbarda itimedarda, Iesuge bakiamuda Galilaiaem Adira Debe Mir ermer.
24299	MRK 1:15	“Able barkak kerker pedikeredi,” e atkarti. “Adira basalaia maike ikeredi! Wa tabatarare wabi adud tonarlam a wage Debe Mir irmirare.” MRK 1.16-20
24300	MRK 1:16	Nadege Iesu digmer Galilaia Keper tawerge, ege nardari neis lar-asaperle Saimona a abra barada Andru, wige lar esaperlei larasaperlugu.
24301	MRK 1:17	Iesude yabi daratagri, “Wa tabakiamulam karidoge kai wabi derwere le asaper.”
24302	MRK 1:18	Wige keko tabara larasaperlu darakareta a abi irmirei.
24303	MRK 1:19	E kebikebi ko bakiamuda ege nardari tabara neis barada, Zemis a Zone, Zebediia werem. Wi taba narge darawedei tabara larasaperlu dirsirlei.
24304	MRK 1:20	Nadege Iesude yabi nardari ege keko yabi darabgeri; wige tabara bab Zebedi a abra dorgele narge darakairtiei wige Iesui irmirei. MRK 1.21-28
24305	MRK 1:21	Iesu a abra memegle tabakiamuda able utebge abra nei dikereder Kapanaum. Nerut Sabatge Iesu bakiamuda sunagoge akaida marauermer.
24306	MRK 1:22	Able le ge turder bazigmurati ableglam e barkakle nerwerlare sasrimge, aukaise Aotarleem.
24307	MRK 1:23	Keserkeser ege kimiar tabakiamuda sunagoge. Demoni abidoge dawer e ererekrier,
24308	MRK 1:24	“Mara nole nalu peike, Iesu Nazaretle! Ka umele ma taba kerbi detko. Ka umele mama Zogole Adira naii.”
24309	MRK 1:25	Iesude aukaise dimoni detagri, “Ma mir baimi mage adem able kimiarlam teosmer!”
24310	MRK 1:26	Able dimonide able kimiar aukaise deskerdi, aukaka mir etkarti a adem teosmeda.
24311	MRK 1:27	Ege le bazigmuarti. Wige tabara bautmerlare, “Nalu peike? Able erwer nerut korep ike. Able le pe barkakle dali. E aukaise dimoni detagri a wipe irmirda.”
24312	MRK 1:28	Ablegira mir dudumdudum ebrerdi kemerkemer Galilaiage. MRK 1.29-34
24313	MRK 1:29	Wige sunago dikaireta a bakiauda natkak Saimonyabim metaem Andruei. Zemis iba Zone yabidoge bakiamudariei.
24314	MRK 1:30	Saimonara neiwet ama auka ziruziru gimgim sike ipereder. Au dudumge wi Iesui detagerda abi gimlam.
24315	MRK 1:31	Ege bakiamuda abidoge tekweida abi tage erpeida a abi upiditida abi ikaida imridari. Able zirude abi dikairti ege siklam adem eupamada a akaida yabim ga lewer dirsirer.
24316	MRK 1:32	Able kige nade lim baraigida legize Iesuim taraislare gair gimgimle a wader le ge yaba dimoni urder.
24317	MRK 1:33	Gair le able gedlam etami adge tege.
24318	MRK 1:34	Iesude mitkar le nadgilare gair korep gimlam a dimoni adem nauslare. Able dimoni nole mirkak ableglam Iesu laglag dawer. E able lu ikaida ableglam wi umele urder e nete dali. MRK 1.35-39
24319	MRK 1:35	Nerut idimge keubu ga lim teupumada Iesu siklam adem eupumada a meta dikairti. E adem bakiamuda able uteblam lekak utebem, a ege eudi erkepasameida.
24320	MRK 1:36	Ege Saimona a wader no bakiauda abi daraimerda.
24321	MRK 1:37	Nadege wi abi erdarda, wi abi detagerda, “Gair legize mari naraimreda.”
24322	MRK 1:38	Ege Iesude yabi daratagerda, “E debele dikeredi mi nabakiaware wader utebem pe naridwerteda ya waiakai ka umele koka yabim mir arme. Ableglam kaka tabakiamuda.”
24323	MRK 1:39	Ege digmer muige gair utebge Galilaiage marauermer sunagoge a adud lamar adem nauslare. MRK 1.40-45
24324	MRK 1:40	Netat kimiar gegur-bad gimgim dawer tabakiamuda Iesui opem taba kokmamu emrida a abi upiatidarem bagwi. E etkarlu kega, “Ese ma laglag nali, ma umele kari nakai ogkak nabailu.”
24325	MRK 1:41	Ege Iesura nas barki, tabara tag itrimurikda a able le erpeida. Iesude able kimiar detagri, “Ka laglag nali. Ma akai ogkak bai.”
24326	MRK 1:42	Keko able gimide able le dikairti a ege akaida ogkak baidari Mosei Gelar pekge.
24327	MRK 1:43	Iesude eudi abi aburker adem emarikda, kikem e abi barkak esereser detagri,
24328	MRK 1:44	“Ma nole netat le able luglam detager. Ma no barkak bakiamu a mabu tabatomer merkemem a zegu lewer mara agimu ge Mosede Gelar idagi able tonar gimlam, ya waiakai gair le umele ober ma emetu akaida ogkak baidari Gelar peke.”
24329	MRK 1:45	Ege able le no bakiamudari gair le daratagelare, able mir ebrerder gair utebge. Able luglam Iesu nole paretkak leem eosmerer e no lekak utebge dawer a ege le mena tabakeslare abra ardar gair uteblam.
24330	MRK 2:1	Kepkep gerger barukdarda Iesu ko akomeda Kapanaumem, ege legize asorda e ko takomeda taba metaem.
24331	MRK 2:2	Au kub lera etami wige meta damida mitkar barki mena adge tege derapeiri. Nawer ge Iesude marauermer mitkar leem,
24332	MRK 2:3	wader le bosi, neis a neis legizege atmutatmut le tigardidere.
24333	MRK 2:4	Wi umerkak able kimiar waigareda Iesuim ableglam yaba gab aomaom ikereder able mitkarlelam, wige ao dirbidere totge lesui natkak. Wige able le ditimdidere taba papekge able nebge.
24334	MRK 2:5	Nade Iesude yaba au owatur dasmeri ege able atmutatmut le detagri, “Kara werem, mara wit pe bamaidereda.”
24335	MRK 2:6	Wader Aotarle ge emreder. Wige dikepwarlare,
24336	MRK 2:7	“E seksek dikeredi able leem e ke waditauter. Nole le ko dali e wit uwadimaidered, no Adide wit wadimaidered.”
24337	MRK 2:8	Iesu keko umelebaidari wi nako dikepwarlare, ege eudige daratagerda, “Wa nole ke dikepwararwem.
24338	MRK 2:9	Wage ke dikepwararwem: nalu sikak dikeredi, able atmutatmut le obatager, “Ma wit bamaiderdi” a “Ma ekwei, papek mara etaruk, mage nagem”?
24339	MRK 2:10	Pe irdi ka yaka wabi datomertare able Le Wermira sasrim dikeredi able gesepge ko wit waimaidered.” E eudige atmutatmut le detagri,
24340	MRK 2:11	“Ka mari aukaise natagri, ma eti, mara papek etaruk, mage bakiamu gedim.”
24341	MRK 2:12	Ege legize abi lidkarem dasmerlare nade ge e ekweilu, tabara papek etarukda a bakiamuda. Wige bazigmuarti a wi Adi dispilare. Wi tabara batagelare, “Mi nole able orwairorwair lu kikem dasmerda.” MRK 2.13-17
24342	MRK 2:13	Iesu akomeda bakiamuda Galilaia keperge wege. Lera kub abim tabakiauda ege eudige akaida yabi nerwerda.
24343	MRK 2:14	Nadege e digmer, ege bodom bakir atkimed le erdari, abra nei dikereder Libai, Alpiasira werem. Libai ge imireder taba dorge utebge. Iesu akaida abi dabgeri, “Ma kari tararmir.” Libai ekweidari a abi irmiri.
24344	MRK 2:15	Keubu, Iesude lewer erwer Libai metage. Wader bodom bakir atkimed le a adud le ko ge turder.
24345	MRK 2:16	Wader Aotarle ge Parisaio urder Iesui erdarda lewer erwer able lekem, wige abra kaimegiz darautmerda, “E naluglam lewer eroli adud lege?”
24346	MRK 2:17	Iesude yaba autmer mir asri, ege eudige akaida, “No gimgimle pe lukuple iaglag uridli, gimkakle pe nole lakak. Kaka tabakiamuda adud le darabgerare, nole debele.” MRK 2.18-22
24347	MRK 2:18	Netat gergerge, Zonera a Parisaiora kaimegiz nole lewer arokak urder. Wader le tabakiauda Iesuim a abi itmerda, “Zonera a Parisaiora kaimegiz lewer arokak uridli. Naluglam mara kaimegiz nole ko lewer arokak waurder?”
24348	MRK 2:19	Iesude detauti, “Wa nalu dikepwareda? Nako le paipu lewerge oba werer ge obakerer? Nole. Nade paipule yabidoge wadawer wi lewer wairolare.
24349	MRK 2:20	Able kerker ya watabaruk nade paipule ya yabialam obakiamu. Able gergerge wi ya lewer arokak waurder.
24350	MRK 2:21	Nole netat lelut kerkar walimog etketi emeret walige. Nalu ya wakai? Able kerkar walimog ya obazrare emeret walilge.
24351	MRK 2:22	A nole netat lelut kerkar waina epaiterdi muige emeret tarporge. Nalu ya wakai? Able kerkar wainade ya able emeret tarpor wadiskimer, a able waina a pako tarpor ya obatkowam. Nole, pardarlegize kerkar waina waipaiterdare muige kekar tarporge.” MRK 2.23-28
24352	MRK 2:23	Sabadge, Iesu a abra kaimegiz wi daragemda bakiauda kon gedubge. Abra kaimegiz bakiauda wader kon etoperda.
24353	MRK 2:24	Ableluglam Parisaio bakeri Iesui ikaidarda, “Ma yabi darasmerare! Wi keriba geiar erapeda wi able lu ikereda Sabadge.”
24354	MRK 2:25	Iesu yabi daratagerda, “Agekar wawa etageda Dawitara mir, nade e a abra armirle wige wererge bakeri.
24355	MRK 2:26	Ege bakiamuda Adi metage badari a arito irwi pe no Adim wagimuaretlare. Able lu ge akaida nadege Abiata Kirim Merkemle dawer. Muige kerbi Gelarge, no merkemide tebteb arito wairwer; Dawitade irwi a wader ge tabara armirle naiswerda.”
24356	MRK 2:27	A e yabi daratagerda, “Sabadge barsirda leem, nole le barsirda Sabadem.
24357	MRK 2:28	Pirdiredi, Lera Werem pe Ople dali gair lugira, Sabad ko irdiredi.
24358	MRK 3:1	Iesu ge ko bakiamuda sunagoge badari, ege le ge tadawer abra netat tag auserauser.
24359	MRK 3:2	Wader le ge turder wi laglag urder Iesui ikelare e seksek ikeli, wige abi lidem dasmerlare ya waiakaida wi wadasmerda ese e able le waidgiri Sabadge.
24360	MRK 3:3	Iesude able tag auserauser le ikaidari, “Ma ekwei a kei taragem kikemem.”
24361	MRK 3:4	Ege Iesude le nautmerda, “Nalu debeiu ikeredi merbi Gelarge pe merbi dikereda ma Sabadge ikerer? A nalu adudlu? Nako e debele ikeredi ma lera idid daseserder? A debele ikeredi ma abi ipit?” Wige nole abi mir ikwarda.
24362	MRK 3:5	Iesude yabi lidem darasmerlare urkerurker, e eudi akaida okasosoksosok baidari ableglam wi nole umerkak urder. Ege eudige able le ikaida, “Ma mara auserauser tag itrimurik.” Ege abra tag dakaida sikak baidari.
24363	MRK 3:6	Nade Parasaio gize sunago dikaireta, wige baka dudumdudum obapita wader Erodi lekem, a wige mir ipulare nako wi Iesu waipita. MRK 3.7-12
24364	MRK 3:7	Iesu a abra memegle adem bakiauda Galailia keperem ege auka mitkar legize yabi narmirlare. Wi tabakiauda Galilaialam, Iudaialam, Ierusalemalam, Idumialam, able gedlam Ioridanoge apekge a able gedlam pe Taia a Saidon ge naridwerteda. Able au kub lera tabakiauda Iesuim ableglam wi wasolare e able lu waikere.
24366	MRK 3:9	Iesude tabara memegle daratagerda wi kebi nar wadirsirda abim ya waiakaida legize umerkak abi waitmagda.
24367	MRK 3:10	E mitkar le ge nadgilare, a gair gimgim le mena tabakeslare abim ya waiakaida wi abi waitutirda.
24368	MRK 3:11	A gair kerkerge na lera ge dimoni urder yabidoge abi erdarlare, wi kokmamu bamrer abi opem ererbakrier, “Mamanali Adira Werem!”
24369	MRK 3:12	Iesude dimoni aler daratagerlare, “Wa nole le daratagrawem kaka nete nali.” MRK 3.13-19
24370	MRK 3:13	Ege Iesu baka paserge ogi a tababim le darabgerda ge e laglag dawer, wi abim tabakiauda.
24371	MRK 3:14	Egeyabialam 12 kaimegize natutidarda. E yabi daratagerda, “Ka wabi ditutidarda wa karidoge uridwa. Ka yako wabi damarkare adem marauarmem, a waba ya sasrim wanagri ko dimoni adem islare.”
24373	MRK 3:16	Able 12 pe uridli ge Iesui natutidarda: Saimona (Iesude abi nei itkiri Peteru),
24374	MRK 3:17	Zemis a abra barada Zone, Zebedaiora neis werem darali (Iesude yaba nei ditkiri Boanagiz, pe dikeredi Girgirira Werem).
24375	MRK 3:18	Andru, Pilipo, Batolomu, Mataio, Tomas, Zemis (Alepaiara werem), Tadaio, Saimona able Zelotle,
24376	MRK 3:19	a Iudas Iskariota, ge e keubu akaida Iesi dipi. MRK 3.20-30
24377	MRK 3:20	Iesu a pako abra memegle bakiauda metaem. Wi umerkak lewer wairoda ablelam au kub lera etami muige metage.
24378	MRK 3:21	Legize able mir Iesura buai daratagerlare. Wi detautlare, “E akaida peimpeim baidari!” Ableluglam abra buai tabakiauda mirem abi wairpeirare a waigareda gedim.
24379	MRK 3:22	Able kerkerge wader Aotarle tabakiauda Ierusalemalam. Wi mir igiarlare, “Beelzebul pe Iesui doge dali. E dimoni adem daramaidere able dimoni kirimlera sasrim abidoge dikeredi.”
24380	MRK 3:23	Ableluglam Iesude yabi darabgerda tababim ege yabi daratagelare mir abisir miru. E yabi daratagelare, “Satanade umerkak Satana adem waimu ko ei umerkak mena kelarkelar wadawer.
24381	MRK 3:24	Ese wader gedle obaskare mogmog ober a tabara obareslare, able gedle waiakai sasrimkak obai.
24382	MRK 3:25	Ese wader netatbuai obaskerare mogmog ober a tabara obareslare able netatbuai waiakai sasrimkak obai.
24383	MRK 3:26	Able tonarge, ese Satanade tabara le wanarsare, e waiakai sasrimkak obai a abi sasrimira mop wadikereder.
24384	MRK 3:27	Ese nale mirem aukelarkelar le metage obau ko abra lu erwamer wadais, e kikem able aukelarkelar le lageru wadidbar. No pe dikeredi e umele aukelarkelar lera lu erwamem wadais.
24385	MRK 3:28	Ka wabi agekar detagreda; Adide umele le omar ge waikai witlam a taba gair Adi opmir atagerlam.
24386	MRK 3:29	Adide umerkak wit wadimaidered pe legize Lamar Zogoi opmir detagreda. Yaba witira bodomalam pe niaiem dikeredi.”
24387	MRK 3:30	Iesude able mir detauti ableglam wi Lamar Zogoi dabgelare dimoni dali. MRK 3.31-35
24388	MRK 3:31	Ege Iesura ama a wader barada tabakiauda ga adge tikweider. Wi miraisisle emarikdarda muiem oba Iesui adem watismeda.
24389	MRK 3:32	Able lera kub ge emreder Iesui dairumaretlare a wige abi detagerda, “Ma dasmer, mara ama a barada pema adge tikwedi a wi laglag mari mir wanatagrare.”
24390	MRK 3:33	Iesude eudim detauti, “Nete kara agekar ama dali? Nete kara agekar barada dali?”
24391	MRK 3:34	Ege e le darasmerlare ge abidoge emreder ege detauti, “Wa dasmerare kara agekar ama a barada.
24392	MRK 3:35	Netide Adi irmili e pe kara barada dali, kara sisi dali a kara ama dali.”
24393	MRK 4:1	Iesude ko dirmisidan le nerwerlare ni keper tawerge. E bakiamuda narge akawerti muige temrida ableglam lera nikidetreder taba abi deirumareta auka mitkar. Able nar gurge eper, a able lera ge nikidetreder ge wege ekweider maike gurge.
24394	MRK 4:2	Ege gair lu nerwerlare mir abisir mirge. Nadege e yabi nerwerlare ege detainer,
24395	MRK 4:3	“Wa asrare! Geduble bakiamuda tabara luneg kep wairti.
24396	MRK 4:4	Nade ga e kep diger muige gedubge, wader batwerer gabdege, ge ebur gize narolare.
24397	MRK 4:5	Wader kep ge batwerer neidneid sepge, ge nade nole mamor sep imireder. Able kep aududumdudum baperigdarda ableglam neidneid sep imiredi.
24398	MRK 4:6	Nage ga lim teupamada, able luneg natitida batrauda. Wi aududumdudum baumi ableglam yaba sip nole au muige daramarwerteda.
24399	MRK 4:7	Wader kep batweri iukazge wige yabi daramisirda, a wige bomi nole agegkak.
24400	MRK 4:8	Ege wader kep ge batweri debe sepge. Wi baperigdarda, a bomi a ageg bakerda; waderlera kepkep ageg daragriweretlare, waderlera kebi mitkarmitkar a waderlera aukamitkar.”
24401	MRK 4:9	A ege yabi daratagerda, “Able mir pe dikeredi gair legize wasrawem a mamor waikedrawem tabadoge.” MRK 4.10-12
24402	MRK 4:10	Nade ge Iesu tebteb dawer, wader abra armirle tabakiauda abim, kemem abra memegle a abi itmerda, “Ma sikak mir abisir mir ko detaut.”
24403	MRK 4:11	Iesude yabi daratagerda, “Wabi ge gumik daiswerda Adira Basalaia. Nade pe wader adge turidli gair lu asreda muige mir abisir mirge. Able korepge, wi ya erkep waigreder a nole momor wadasmerlare; wi ya wasorlare a nole waikedilare. Ableglam ese wi ya barkak wadasmerlare a waikedilare wi ya ko watabatare Adim a e yabi ya wadaramaiderdare. MRK 4.13-20
24405	MRK 4:13	Ege Iesu eudige akaidari yabi daratagerda, “Ese wa nole able mir abisir mir wabidoge ikedilare, wai umerkak gair abisir mir wabidoge idaglare.
24406	MRK 4:14	Able gedublelut Adira Mir wadirit.
24407	MRK 4:15	Wader kerkerge able kep batwerer gabdege; able legize pe mir asreda epe keko Satana tabakesli yabialam able mir adem aisli pe yabidoge barteda.
24408	MRK 4:16	Wader kerkerge able kep batweri neidneid sepge; able legize pe mir asreda a keko irmireda sererserer.