1	GEN 1:1	Nga talun ngana toto NeHalang ala hote tapa pe ich pe ure lochloch ngana.
2	GEN 1:2	Pe ich hot ke nek ero kura pe ute tuia ero ke pomanga heueu ana nei. Kileng au ala mana nga ech sana lomona. Pe NeHalang opene pomalaka nga tuttula palaungana nge song ke lala pe atat nga ona.
3	GEN 1:3	Pe NeHalang hele, “Kileng mesehe ngana lohot.” Pe la kileng mesehe ngana lohot.
4	GEN 1:4	Pe NeHalang naue ke pomau pe letena urana ia. Pe helasia kileng mesehe ngana nga kileng au ngana.
5	GEN 1:5	NeHalang hetue kileng mesehe ngana ke “etue,” pe kileng au ngana ke “miliko.” Iok miliko sio pe uach mule nga etue elle ngana.
6	GEN 1:6	Pe NeHalang hele, “Ech chach nga tunangana pe kileng koana ngana heke iri ke te la nga hele pe hele.”
7	GEN 1:7	Ke NeHalang poi hote kileng koana ngana ke ma hele ech nenge tu nga lut pe ech nenge tu nge sio, pe la lohot ke pomau.
8	GEN 1:8	NeHalang hetue kileng koana neu ke “tapa.” Iok miliko sio pe uach mule nga etue nai ngana.
9	GEN 1:9	Pe NeHalang hele, “Ech nenge tu nga kileng koana nenge sio lake hekirau ke munna elle pe kileng hal ngana hota.” Pe la lohot ke pomau.
10	GEN 1:10	NeHalang hetue kileng hal ngana ke “ich.” Pe ech nenge heuirau ke munna elle neu hetue ke “ruach.” Pe NeHalang esia ke pomau pe letena urana ia.
11	GEN 1:11	Ol pe NeHalang hele, “Heilil pe ae mur te haka nga ich. Heilil mur nenge te heiei pe te hei hot mulmule tuturia mur pe ae kuenkuena ngana mur nga ich nenge te hei pe tuturia mur te tu teu mule nga iri siporia ngana ngaria mur.” Pe la ure nemur te lohot ke pomau.
12	GEN 1:12	Ke heilil kuenkuena ngana mur nga ich, te hei hot mulmule tuturia mur pe ae kuenkuena ngana mur pule tehei pe tuturia mur tetu teu mulmule nga ngana ngaria mur. Pe NeHalang esia pe letena urana ia.
14	GEN 1:14	Pe NeHalang hele, “Lemenge lohot nga tapa sana ke ma tote etue nga miliko pe heilang ia etue mur pe hesinga mur pe etue papalaungana mur.
16	GEN 1:16	Pe NeHalang ume ke lemenge papalauna nai. Umeia chaia nenge tualeme ke palaungana toto nga sinanga pe teio nenge tualeme mana nga miliko. Pe umeia itoch mur pule.
17	GEN 1:17	NeHalang talue iri nga tapa sana ke te tualeme hatalia ich,
18	GEN 1:18	ke e tualeme nga sinanga pe e nga miliko ke ma tote kileng mesehe ngana nga kileng au ngana. Pe NeHalang esia ure neu nge lohot ke pomau pe letena urana ia.
20	GEN 1:20	Pe NeHalang hele, “Ruach muta ia ruo kuenkuena ngana mur ure lochloch ngana nenge ruach letena ana ia. Pe ngie mur lochloch te kangkanga haka ich ana pe lehe tele rara nga kileng koana nenga tapa sana.”
21	GEN 1:21	Ke NeHalang ala hote huros papalau ngana mur ke te muta teu nga ruach, luluch nga ure maulul ngana kuenkuena ngana mur nenge te i rarara nga aria mata mur nga ruach letena. Pe ngie kuenkuena ngana mur nenge saharia (pe te lehe rarara) nga aria mata mur (nga tapa sana.) Pe NeHalang naue ke pomau pe letena urana ia.
22	GEN 1:22	Pe NeHalang pete iri pe hele, “A hala lele ke imo halang toto pe a ronge ruach pe ech lochloch ngana. Pe imo ngie mur, a hala lele pule pe a lohot ke imo halang toto nga ich.”
24	GEN 1:24	Pe NeHalang hele, “Ure maulul ngana mur te lohot nga ich nga aria mata kuenkuena ngana mur. Pe huros marana ngana mur pe ure nemur nenge te sere olole nga ich pe huros inolo ngana mur te lohot pule nga aria mata mur.” Pe la ure nemur te lohot ke pomau.
25	GEN 1:25	Ke NeHalang ume hote huros marana ngana mur nga aria mata kuenkuena ngana mur pe ume hote huros inolo ngana mur nga aria mata kuenkuena ngana mur pe ume hote ure nemur nenge te sere olole nga ich nga aria mata kuenkuena ngana mur. Pe NeHalang naue ke pomau pe letena urana ia.
26	GEN 1:26	Pe NeHalang hele, “Lape ta ume hote iri nenge iri non pe nakuria pomange ita toto ke te nauele ruo mur nga ruach letena pe ngie mur nga tapa sana pe huros marana ngana mur pe huros inolo ngana mur lochloch pe ure lochloch ngana nenge te sere olole nga ich.”
27	GEN 1:27	Ke pomalam NeHalang ume hote ita non ngana ke nakura pomange I. Ke NeHalang ume hote ita ke nakura pomange I toto; pe ume hote ita ke hehei pe hana.
28	GEN 1:28	Pe NeHalang pete iri pe hele lange iri ke teke, “Lape a hoho pe a hala lele ke imo halang toto ke a hemute ich pe anau ele. Pe anau ele ruo mur nga ruach pe ngie mur nga tapa sana pe ure lochloch ngana nenge te sere olole nga ich nei.”
29	GEN 1:29	Pe NeHalang hele ke teke, “A longo at! Heilil nemur nenge nganangana lohot nga ich letena pe ae mur nenge tutuna mur te tu teu nga ngana ngaria mur, e tunge lange imo ke amo ngaunga ia.
31	GEN 1:31	NeHalang nau la nga ure lochloch ngana nge umeia pe esia nge urana toto. Iok miliko sio pe uach mule nga etue ratele elle ngana.
32	GEN 2:1	Ke NeHalang ala hote tapa pe ich pe ure lochloch ngana nenge te tu heueu nei ke pomalam mana.
33	GEN 2:2	NeHalang heulo hote nena ume lochloch ngana nenge popoia ke het pe nga etue rahtele nai ngana tah eingana pe tu mana ol.
34	GEN 2:3	Ke nga etue rahtele nai ngana NeHalang ume ero ol. Tu mana pe pete etue neu pe poia ke i etue nenge heo ngana.
35	GEN 2:4	Ke tapa pe ich ana nananga pomalam mana. NeHalang ume hote ume nenge Eten nga etue nenge ala hote tapa pe ich.
36	GEN 2:5	NeHalang ala hote tapa pe ich pe heilil pe ae mur te haka ero iange pitte ero pe none nge tutua ngaunga nga ich ero.
38	GEN 2:7	Ol pe Non Soke NeHalang eu hiraua ich unne ke pip hot non ia. Pe iu teua eingana nenge maulinga ana langa non neu ina ponna pe non neu sechsech haka sapele.
39	GEN 2:8	Non Soke NeHalang tue ume e nga chaia haka ngana nge Eten pe here non nenge alahote nem ke tu ia.
40	GEN 2:9	Pe Non Soke NeHalang poia ae nenge urana pe ngaunga ia ke te haka nga ich nenge ala hote. Pe ae nenge maulinga ana mes nga ume tunangana pe ae nenge lete matana ngana ana nga utar nenge urana pe utar nenge poreke mes pule.
46	GEN 2:15	Iok Non Soke NeHalang talue non neu ke umume pe nauelele ume neu.
47	GEN 2:16	Non Soke NeHalang hele lange non neu ke teke, “O ngau nga ae lochloch ngana nenga ume
49	GEN 2:18	Iok Non Soke NeHalang hele, “Non nei i toro mana tu pe poreke i. Pomalam lape e ume hote neingana e nge pomange i ke halaulaua i.”
50	GEN 2:19	Non Soke NeHalang ume hote ur inolo mur pe ngie mur nga tapa sana pe ure nemur nenge te amamo nga ich ke het pe laia iri nge Antam ke hetue iri nga eria mur.
52	GEN 2:21	Pe Non Soke NeHalang poia Antam ke mamani hun toto. Antam mamani hun toto pe NeHalang siu hote kina e nga alisina pe poi hele mule nga ulina.
53	GEN 2:22	Non Soke NeHalang ume hote heie nga Antam kina nenge siu hote nga alisina ke het pe tunge i lange Antam.
57	GEN 3:1	Non Soke NeHalang ume hote ur inolo mur lochloch ke urana pe ilimo mana nge letena matana toto nge iri lochloch pe hele lange hei neu ke teke, “NeHalang hele ke teke, ‘A ngaua ae e nganagana nga ume nei ero, ae?’ ”
59	GEN 3:3	pe ae nenge mes nga ume tuna ngana NeHalang hele ke teke mo ngaua nganangana ero iange lape mo mete.”
61	GEN 3:5	“Iange NeHalang eteia ke letemo matana toto pe a pomange i pe a eteia utar nenge urana pe poreke.”
64	GEN 3:8	Pe nga kileng makuk ngana Antam pe nehei te amneia Non Soke Nehalang meena ngana nge i olole nga ume, pe iri nai te talkome ana nga ume letena.
65	GEN 3:9	Pe Non Soke Nehalang iua Antam ke teke, “Antam ou! Iong ngai?”
67	GEN 3:11	Pe NeHalang hele, “Ia itei nenge hele lange iong ke teke o lachlach? Nakuna nenge o ngaua ae ngana ngana nenge e hele lange iong ke e teke o ngaua ero iam! Ae?”
69	GEN 3:13	Pe Non Soke NeHalang onteia hei neu ke teke, “Pomerei toto nenge o poia poinga poreke ngana nei?” Pe hei neu hele lange NeHalang ke teke, “Ilimo laka channanga ia iau ke e ngaua ae ngana ngana nem.”
70	GEN 3:14	Pomalam Non Soke NeHalang hele lange ilimo neu ke teke, “Iong toro mana lape o mene melmelenga palaungana pe huros mur ero. Nga etue lochloch ngana nenge o tu nga ich, lape o amo mana nga sam pe o ngau manmana maruchrue iange o channanga ia hei nei. Pe lape o amnea melmelenga palaungana.
72	GEN 3:16	Pe NeHalang hele lange hei neu ke teke, “Lape o amnea melmelenga palaungana nga etue nenge sam pe pule nga etue nenge o hoho ia. Pe mutem tau tote em pe o nanas mene em nena helenga.”
73	GEN 3:17	Pe NeHalang hele lange Antam, “Iong o longo taua lem hei ke o ngaua ae nganangana nenge e hetoro sue lange iong ke e teke o ngaua ero. “Ke lape o amnea melmelenga palaungana nga o tu ngam nga ich nei iange lape e poia ich nei ke poreke pe am ngaunga haka ke urana ero pe lape o puo teu tote iong nga ume laka o ngau.
77	GEN 3:21	Non Soke NeHalang umeia Antam pe nehei aria malenga nga huros ulina ke te mele.
78	GEN 3:22	Pe Non Soke NeHalang hele, “Non nei lohot ke pomange ita ke eteia utar nenge urana pe poreke ke pomalam ta nauele ke ngaua ae nenge tunge maulinga ke koko nem nganangana e ero, iange lape tu ke maulul ke koko.”
79	GEN 3:23	Ke pomalam Non Soke NeHalang heo ele iri nai nga ume nenge Paratiso, pe te ume mana nga ich nenge Non Soke ala hote iri ia.
80	GEN 3:24	Iok NeHalang lope hote iri pe talue angkelo solaki ngana e ke nauele ume ilina hele nenga chaia haka ngana. Pe mese chalemlem ngana e nge matana kaliu ala hetaliliu elele ana ae.
81	GEN 4:1	Antam ma luluch nge nehei Eua ke sana pe hoe tuna Kaen. Pe Eua hele, “Nga Non Soke nena halaunga e hoe tuk nei.”
83	GEN 4:3	Mala pol pe Kaen lule nena ngaunga hel nga ume ke poi nena tunginga ia lange Non Soke.
84	GEN 4:4	Pe Apel mene nena sipsip tengene ana mur hel nge urana toto ke poi tunginga ia pule. Pe Non Soke mutena taua Apel nena tunginga.
85	GEN 4:5	Pe Kaen nena tunginga Non Soke mutena taua ero. Pomalam Kaen letena inin pe iech ero toto.
86	GEN 4:6	Pe Non Soke onteia Kaen ke teke, “Iong mam letem inin pe o iech ero ia utar?”
87	GEN 4:7	Nenge teke o poia poinga nge pengpeng lape e longele lem tunginga. Pe nenge teke o poia poinga nge pengpeng ero, lape poinga poreke ngana heporeke tote iong. Ke poinga poreke ngana mutena tau tote iong pe iong o mes ke kerkereng ke o hekousue.
89	GEN 4:9	Pe Non Soke onteia Kaen ke teke, “Kaen! Tim Apel ngai?” Pe Kaen hele, “E eteia i ero. Ia iau mam ak ume ma nenge e nauelele i mam?”
90	GEN 4:10	Pe Non Soke NeHalang hele, “Pomere nenge o poia poinga poreke ngana nem mam?” O longo la, tim eina kou lele nga ich pe tang atat nge Iau.
93	GEN 4:13	Pe Kaen hele lange Non Soke ke teke, “Melmelenga nenge o tunge at nge iau nem, palaungana toto pe lape heporeke tote iau iam.
95	GEN 4:15	Pe Non Soke hele lange i ke teke, “O matau ero! Nenge teke mele hune iong, mele nem lape ameia ana melmelenga nge palaungna toto.” Ol pe Non Soke tal heke lala e lange i ke mele nenge saolia i hune i ero.
96	GEN 4:16	Iok Kaen ua hot nga Non Soke matana pe la ke tu nga ich nenge ene “Irara.” Ana ich tu nga kilenge ilina hele nenga lut nga ume nenge Paratiso.
102	GEN 4:22	Pe Lamek nehei Sila hoe tuna tamane ngana e nge ene Tupal-Kaen, pe liuna ene laka Nama. Tupal-Kaen i non nenge ume hotot urelu kuenkuena ngana mur nga ure nenge ene bras pe aen.
103	GEN 4:23	Pe nga etuene Lamek hele lange nehei mur ke teke, “He Ata pe he Sila a longo at nge iau; Ne Lamek nehei mur, a longo at nga lek helenga. Non e pal poreke tote iau pe e hune i ke mete, pe non lomele ngana e nosia iau pe e hune i ke mete.
105	GEN 4:25	Pe Antam maluluch mule nge nehei pe hoho mule tuna tamane ngana e pe hetue ene ke Set pe nehei hele, “Ne Halang tung mule tuk nei ke mene Apel munna nenge Kaen hune.”
106	GEN 4:26	Pe Set hoe tuna tamane ngana e pe hetue ke ene Enos. Nga etue neu hehei pe hana te talun ke te heto heke Non Soke ene ke te teke, “Ta heto heke NeHalang.”
107	GEN 5:1	Alalaha nei te hasia ke te nana urume Antam pe nena tete mur. Nga etue nenge Ne Halang alahote hehei pe hana, umeia iri ke nakuria poma nge I sipona.
108	GEN 5:2	Ne Halang ume hot ke none pe heie. Pe pete iri pe hetue iri ke hehei pe hana. Ke non nenge lohot tala nena tete mur koi nei.
130	GEN 5:24	Enok i Ne Halang neingana toto ia pe erue sio mana iange NeHalang mene tote i.