2	GEN 1:2	Pe ich hot ke nek ero kura pe ute tuia ero ke pomanga heueu ana nei. Kileng au ala mana nga ech sana lomona. Pe NeHalang opene pomalaka nga tuttula palaungana nge song ke lala pe atat nga ona.
3	GEN 1:3	Pe NeHalang hele, “Kileng mesehe ngana lohot.” Pe la kileng mesehe ngana lohot.
4	GEN 1:4	Pe NeHalang naue ke pomau pe letena urana ia. Pe helasia kileng mesehe ngana nga kileng au ngana.
6	GEN 1:6	Pe NeHalang hele, “Ech chach nga tunangana pe kileng koana ngana heke iri ke te la nga hele pe hele.”
9	GEN 1:9	Pe NeHalang hele, “Ech nenge tu nga kileng koana nenge sio lake hekirau ke munna elle pe kileng hal ngana hota.” Pe la lohot ke pomau.
10	GEN 1:10	NeHalang hetue kileng hal ngana ke “ich.” Pe ech nenge heuirau ke munna elle neu hetue ke “ruach.” Pe NeHalang esia ke pomau pe letena urana ia.
11	GEN 1:11	Ol pe NeHalang hele, “Heilil pe ae mur te haka nga ich. Heilil mur nenge te heiei pe te hei hot mulmule tuturia mur pe ae kuenkuena ngana mur nga ich nenge te hei pe tuturia mur te tu teu mule nga iri siporia ngana ngaria mur.” Pe la ure nemur te lohot ke pomau.
12	GEN 1:12	Ke heilil kuenkuena ngana mur nga ich, te hei hot mulmule tuturia mur pe ae kuenkuena ngana mur pule tehei pe tuturia mur tetu teu mulmule nga ngana ngaria mur. Pe NeHalang esia pe letena urana ia.
14	GEN 1:14	Pe NeHalang hele, “Lemenge lohot nga tapa sana ke ma tote etue nga miliko pe heilang ia etue mur pe hesinga mur pe etue papalaungana mur.
15	GEN 1:15	Pe te lohot ke iri lemenge nenga tapa sana ke te tualeme hatal ia ich.” Pe la ure nemur te lohot ke pomau.
16	GEN 1:16	Pe NeHalang ume ke lemenge papalauna nai. Umeia chaia nenge tualeme ke palaungana toto nga sinanga pe teio nenge tualeme mana nga miliko. Pe umeia itoch mur pule.
18	GEN 1:18	ke e tualeme nga sinanga pe e nga miliko ke ma tote kileng mesehe ngana nga kileng au ngana. Pe NeHalang esia ure neu nge lohot ke pomau pe letena urana ia.
20	GEN 1:20	Pe NeHalang hele, “Ruach muta ia ruo kuenkuena ngana mur ure lochloch ngana nenge ruach letena ana ia. Pe ngie mur lochloch te kangkanga haka ich ana pe lehe tele rara nga kileng koana nenga tapa sana.”
21	GEN 1:21	Ke NeHalang ala hote huros papalau ngana mur ke te muta teu nga ruach, luluch nga ure maulul ngana kuenkuena ngana mur nenge te i rarara nga aria mata mur nga ruach letena. Pe ngie kuenkuena ngana mur nenge saharia (pe te lehe rarara) nga aria mata mur (nga tapa sana.) Pe NeHalang naue ke pomau pe letena urana ia.
22	GEN 1:22	Pe NeHalang pete iri pe hele, “A hala lele ke imo halang toto pe a ronge ruach pe ech lochloch ngana. Pe imo ngie mur, a hala lele pule pe a lohot ke imo halang toto nga ich.”
24	GEN 1:24	Pe NeHalang hele, “Ure maulul ngana mur te lohot nga ich nga aria mata kuenkuena ngana mur. Pe huros marana ngana mur pe ure nemur nenge te sere olole nga ich pe huros inolo ngana mur te lohot pule nga aria mata mur.” Pe la ure nemur te lohot ke pomau.
25	GEN 1:25	Ke NeHalang ume hote huros marana ngana mur nga aria mata kuenkuena ngana mur pe ume hote huros inolo ngana mur nga aria mata kuenkuena ngana mur pe ume hote ure nemur nenge te sere olole nga ich nga aria mata kuenkuena ngana mur. Pe NeHalang naue ke pomau pe letena urana ia.
26	GEN 1:26	Pe NeHalang hele, “Lape ta ume hote iri nenge iri non pe nakuria pomange ita toto ke te nauele ruo mur nga ruach letena pe ngie mur nga tapa sana pe huros marana ngana mur pe huros inolo ngana mur lochloch pe ure lochloch ngana nenge te sere olole nga ich.”
28	GEN 1:28	Pe NeHalang pete iri pe hele lange iri ke teke, “Lape a hoho pe a hala lele ke imo halang toto ke a hemute ich pe anau ele. Pe anau ele ruo mur nga ruach pe ngie mur nga tapa sana pe ure lochloch ngana nenge te sere olole nga ich nei.”
29	GEN 1:29	Pe NeHalang hele ke teke, “A longo at! Heilil nemur nenge nganangana lohot nga ich letena pe ae mur nenge tutuna mur te tu teu nga ngana ngaria mur, e tunge lange imo ke amo ngaunga ia.
30	GEN 1:30	Pe e tunge ure nemur ke amo ngaunga ia pule; Huros mur lochloch nga ich ngie mur lochloch nga tapa sana pe ure lochloch nenge te sere olole nga ich pe ure lochloch nenge eingaria tu teu nge iri. Pe E tunge eleling lochloch ke amo ngaunga ia pule.” Pe la ure nemur te lohot ke pomau.
38	GEN 2:7	Ol pe Non Soke NeHalang eu hiraua ich unne ke pip hot non ia. Pe iu teua eingana nenge maulinga ana langa non neu ina ponna pe non neu sechsech haka sapele.
40	GEN 2:9	Pe Non Soke NeHalang poia ae nenge urana pe ngaunga ia ke te haka nga ich nenge ala hote. Pe ae nenge maulinga ana mes nga ume tunangana pe ae nenge lete matana ngana ana nga utar nenge urana pe utar nenge poreke mes pule.
41	GEN 2:10	Pe ech tana e lele hot nge Paratiso ke tunge ech langa ume nem. Pe ana ech poke hot ke ech tana iri henel.
42	GEN 2:11	Pe ech tana nenge lele nga ich sana nenge um chalemlem ngana tuia nge Hauila, ene ech Pison.
43	GEN 2:12	Pe um chalemlem ngana pe ae nenge inangaria heech tetu nga ich neu pule.
45	GEN 2:14	Pe ech tana molngana ene Taikiris pe lele nga ich lochloch nge Asiria nga chaia haka ngana. Pe ech tana henel ngana ene Uprates.
49	GEN 2:18	Iok Non Soke NeHalang hele, “Non nei i toro mana tu pe poreke i. Pomalam lape e ume hote neingana e nge pomange i ke halaulaua i.”
51	GEN 2:20	Pe Antam tunge kolok mur eria pe ngie mur nga tapa sana pe ure inolo mur nga eria. Pe Antam pekngana pele nge halaua i ero.
52	GEN 2:21	Pe Non Soke NeHalang poia Antam ke mamani hun toto. Antam mamani hun toto pe NeHalang siu hote kina e nga alisina pe poi hele mule nga ulina.
54	GEN 2:23	Pe Antam hele, “Ute nem nakuna mange iau iam. Pe lape e hetue i ke ‘hei’ iange i lohot nga kik pe nga mirak.”
58	GEN 3:2	Pe hei neu hele langa ilimo ke teke, “Mo ngaua ae lochloch ngana ngaria
60	GEN 3:4	Pe ilimo neu hele lange hei neu ke teke, “Ah! A mete ero paiam!”
63	GEN 3:7	Ol pe iri nai leteria matana pe te eteia ke te lachlach. Pomalam te aonia ae pik ina ke te male hite nge iri.
64	GEN 3:8	Pe nga kileng makuk ngana Antam pe nehei te amneia Non Soke Nehalang meena ngana nge i olole nga ume, pe iri nai te talkome ana nga ume letena.
65	GEN 3:9	Pe Non Soke Nehalang iua Antam ke teke, “Antam ou! Iong ngai?”
66	GEN 3:10	Pe Antam tuacholia ke teke, “Iau koi e amneia meena ngam nga ume letena pe e talkome iange e lachlach mana?”
67	GEN 3:11	Pe NeHalang hele, “Ia itei nenge hele lange iong ke teke o lachlach? Nakuna nenge o ngaua ae ngana ngana nenge e hele lange iong ke e teke o ngaua ero iam! Ae?”
68	GEN 3:12	Pe non neu hele, “Hei nenge o ume hote pe o tunge at nge iau koi nenge tunge ae ngana ngana nei at nge iau ke e ngaua.”
69	GEN 3:13	Pe Non Soke NeHalang onteia hei neu ke teke, “Pomerei toto nenge o poia poinga poreke ngana nei?” Pe hei neu hele lange NeHalang ke teke, “Ilimo laka channanga ia iau ke e ngaua ae ngana ngana nem.”
70	GEN 3:14	Pomalam Non Soke NeHalang hele lange ilimo neu ke teke, “Iong toro mana lape o mene melmelenga palaungana pe huros mur ero. Nga etue lochloch ngana nenge o tu nga ich, lape o amo mana nga sam pe o ngau manmana maruchrue iange o channanga ia hei nei. Pe lape o amnea melmelenga palaungana.
71	GEN 3:15	Pe lape e poia iong ke lem ngarang hei nei pe i nena ngarang iong. Pe tum lape nena ngarang hei nei tuna. Ke nge he hei nei tuna lape hepapar hite palpalum pe iong lape o tele apena.”
72	GEN 3:16	Pe NeHalang hele lange hei neu ke teke, “Lape o amnea melmelenga palaungana nga etue nenge sam pe pule nga etue nenge o hoho ia. Pe mutem tau tote em pe o nanas mene em nena helenga.”
73	GEN 3:17	Pe NeHalang hele lange Antam, “Iong o longo taua lem hei ke o ngaua ae nganangana nenge e hetoro sue lange iong ke e teke o ngaua ero. “Ke lape o amnea melmelenga palaungana nga o tu ngam nga ich nei iange lape e poia ich nei ke poreke pe am ngaunga haka ke urana ero pe lape o puo teu tote iong nga ume laka o ngau.
74	GEN 3:18	Pe kiki nenge matantana pe eilil mur lape te au hite ich, pe lape o ngaua ure nemur nenge te lohaka nga ich.
75	GEN 3:19	Pe o ume ke kerkereng toto ke hines sio ia iong, pomalam lape o ngau. Pe o pur manmana ume ke pomalam mana ke la het nga etue nenge o la mule nga ich, iange o lohot nga ich.”
78	GEN 3:22	Pe Non Soke NeHalang hele, “Non nei lohot ke pomange ita ke eteia utar nenge urana pe poreke ke pomalam ta nauele ke ngaua ae nenge tunge maulinga ke koko nem nganangana e ero, iange lape tu ke maulul ke koko.”
79	GEN 3:23	Ke pomalam Non Soke NeHalang heo ele iri nai nga ume nenge Paratiso, pe te ume mana nga ich nenge Non Soke ala hote iri ia.
80	GEN 3:24	Iok NeHalang lope hote iri pe talue angkelo solaki ngana e ke nauele ume ilina hele nenga chaia haka ngana. Pe mese chalemlem ngana e nge matana kaliu ala hetaliliu elele ana ae.
81	GEN 4:1	Antam ma luluch nge nehei Eua ke sana pe hoe tuna Kaen. Pe Eua hele, “Nga Non Soke nena halaunga e hoe tuk nei.”
82	GEN 4:2	Iok nga hoena Eua hoho mule Kaen tina e pe hetue ke ene Apel. Pe Apel lohot ke i non nenge nauelele sipsip pe kolok mur pe Kaen i non nenge umume nga ume.
84	GEN 4:4	Pe Apel mene nena sipsip tengene ana mur hel nge urana toto ke poi tunginga ia pule. Pe Non Soke mutena taua Apel nena tunginga.
85	GEN 4:5	Pe Kaen nena tunginga Non Soke mutena taua ero. Pomalam Kaen letena inin pe iech ero toto.
86	GEN 4:6	Pe Non Soke onteia Kaen ke teke, “Iong mam letem inin pe o iech ero ia utar?”
87	GEN 4:7	Nenge teke o poia poinga nge pengpeng lape e longele lem tunginga. Pe nenge teke o poia poinga nge pengpeng ero, lape poinga poreke ngana heporeke tote iong. Ke poinga poreke ngana mutena tau tote iong pe iong o mes ke kerkereng ke o hekousue.
89	GEN 4:9	Pe Non Soke onteia Kaen ke teke, “Kaen! Tim Apel ngai?” Pe Kaen hele, “E eteia i ero. Ia iau mam ak ume ma nenge e nauelele i mam?”
90	GEN 4:10	Pe Non Soke NeHalang hele, “Pomere nenge o poia poinga poreke ngana nem mam?” O longo la, tim eina kou lele nga ich pe tang atat nge Iau.
91	GEN 4:11	Pe ich kou hanna pangpanga ke tontone tim eina nenge perim poia. Ke heueu nei, lape lek keke iong ke o i rara mana nga ich.
92	GEN 4:12	Pe nga etue nenge o umume am nga ich, ute pele nge lape haka ke nek ero. Pe lape mulim e nge o tu ia ero. Lape o i rara manmana nga ich.
93	GEN 4:13	Pe Kaen hele lange Non Soke ke teke, “Melmelenga nenge o tunge at nge iau nem, palaungana toto pe lape heporeke tote iau iam.
94	GEN 4:14	O nau at, heueu nei o lope hote iau lamai pe lape e la ke e talkome toto nga matam ol. Lape e i rara mana nga ich iange mulik e nge e tuia ero. Pe nenge teke mele saolia iau lape hune iau ke e mete.”
95	GEN 4:15	Pe Non Soke hele lange i ke teke, “O matau ero! Nenge teke mele hune iong, mele nem lape ameia ana melmelenga nge palaungna toto.” Ol pe Non Soke tal heke lala e lange i ke mele nenge saolia i hune i ero.
96	GEN 4:16	Iok Kaen ua hot nga Non Soke matana pe la ke tu nga ich nenge ene “Irara.” Ana ich tu nga kilenge ilina hele nenga lut nga ume nenge Paratiso.
97	GEN 4:17	Iok Kaen maluluch nge nehei ke sana pe hoe tuna tamane ngana e pe hetue ke ene Enok. Pe Kaen talun ke hemes heke tuele tana e pe heto heke nge tuna Enok.
98	GEN 4:18	Pe Enok tuna laka Irat pe Irat tuna laka Mehusael pe Mehusael tuna laka Metusael pe Metusael tuna laka Lamek.
100	GEN 4:20	Pe Ata sana ke hoe tuna tamane ngana e nge ene Iapal. Pe iri nenge te mama nga pelpele pe te nauele reria sipsip mur pe kolok mur reette laka Iapal.
101	GEN 4:21	Pe Iapal tina laka Iupal. Pe iri lochloch nenge te palpal hario pe milollo pe te iuiua iu reette laka Iupal.
102	GEN 4:22	Pe Lamek nehei Sila hoe tuna tamane ngana e nge ene Tupal-Kaen, pe liuna ene laka Nama. Tupal-Kaen i non nenge ume hotot urelu kuenkuena ngana mur nga ure nenge ene bras pe aen.
103	GEN 4:23	Pe nga etuene Lamek hele lange nehei mur ke teke, “He Ata pe he Sila a longo at nge iau; Ne Lamek nehei mur, a longo at nga lek helenga. Non e pal poreke tote iau pe e hune i ke mete, pe non lomele ngana e nosia iau pe e hune i ke mete.
104	GEN 4:24	Ke nenge teke mele hune Kaen lape takisia melmelenga nge palaungana toto. Pe nenge teke mele hune iau lape takisia ana melmelenga nge palaungana toto ol.”
105	GEN 4:25	Pe Antam maluluch mule nge nehei pe hoho mule tuna tamane ngana e pe hetue ene ke Set pe nehei hele, “Ne Halang tung mule tuk nei ke mene Apel munna nenge Kaen hune.”
106	GEN 4:26	Pe Set hoe tuna tamane ngana e pe hetue ke ene Enos. Nga etue neu hehei pe hana te talun ke te heto heke Non Soke ene ke te teke, “Ta heto heke NeHalang.”
108	GEN 5:2	Ne Halang ume hot ke none pe heie. Pe pete iri pe hetue iri ke hehei pe hana. Ke non nenge lohot tala nena tete mur koi nei.
112	GEN 5:6	Pe Set tu ke ana hesinga iri ana non kina lime pe lime (105) pe hoe tuna e pe hetue ke ene Enos.
115	GEN 5:9	Pe Enos tu ke ana hesinga iri ana non kina iri henel pe analoch (90) pe hoe tuna Kanan.
118	GEN 5:12	Pe Kenan tu ke ana hesinga iri ana non kina iri mol pe analoch (70) pe hoe tuna Mahalalel.
121	GEN 5:15	Pe Mahalalel tu ke ana hesinga iri ana non kina iri mol pe lime (65) pe hoe tuna Iaret.
124	GEN 5:18	Pe Iaret tu ke ana hesinga iri ana non kina lime pe ana non kina mol pe nai (162) pe hoe tuna Enok.
127	GEN 5:21	Pe Enok tu ke ana hesinga iri ana non kina mol pe lime (65) pe hoe tuna Metusela.
131	GEN 5:25	Pe Metusela tu ke ana hesinga iri ana non kina lime pe ana non kina henel pe rahtele nai (187) pe hoe tuna Lamek.
134	GEN 5:28	Pe Lamek tu ke ana hesinga iri ana non kina iri lime pe ana non kina henel pe nai (182) pe hoe tuna tamane ngana e
135	GEN 5:29	pe hetue ke ene Noah. Pe Lamek hele ke teke, “Non Soke na keke ich ke ta ume pe ta amneia melmelenga nga rera ume mur. Pe Noa lape poia ita ke ta tah eingara pol nga ara melmelenga mur.”
138	GEN 5:32	Pe Noah tu ke ana hesinga iri ana non kina iri ana non kina elle pe ana non kina lime (500) pe hoe tutuna mur, Sem pe Ham pe Iapet.
140	GEN 6:2	Pe NeHalang tutuna mur te esia hehei pe hana nga ich tuturia heheina mur nge nakuria urana mana. Pomalam muteria taua iri pe tesio at ke te mene hote hel nge iri ke te leia iri.
141	GEN 6:3	Pe Non Soke hele, “Opek nenge e tunge lange hehei pe hana ke te maulul lape tu ke koko ero iange iri lape te mete. Talun heueu nei pe la, lape e tung ke hesinga iri ananon kina lime pe ananon kina elle (120) nga mele tungana nga ich nei.”
146	GEN 6:8	Pe Noa i non nenge urana nga Non Soke matana.
147	GEN 6:9	Nananga nenge Noa tutuna mur pe na tete mur koi nei: Nga etue neu hehei pe hana te popoi poinga poreke ngana. Pe Noa i non nge pengpeng iange poia poinga poreke ngana e ero. Pe NeHalang iech toto nga Noa letena tuanin ngana mur pe nena poinga mur.
149	GEN 6:11	Pe NeHalang naue ke hehei pe hana lochloch nga ich te heul teua iri nga poinga poreke ngana ke het toto pe te hun helel nge iri.
151	GEN 6:13	Pe NeHalang hele lange Noa ke teke, “Iau letek haka ke e teke e hemete hulua lochloch iange te heloko teu tote iri nga salaunga ana poinga pe te hun helel nge iri. Oe! Lape e heporeke tote iri luluch nga ich.
152	GEN 6:14	Pe iong o mene ae urana ngana mur hel ke o ume lem mono ia pe o tal totote ana tokola mur nga letena. Pe o taulue ure pilpile ngana nenge pomanga pulos letena pe nge hot ke meris ero.
153	GEN 6:15	Pe o umeia mono nem ke mai koi: Sase ngana o lope ke ana lome iri 300 mita pe pongponga ngana ana lome iri 50 mita pe ona ana lome iri 30 mita.
154	GEN 6:16	Pe o umeia ona ke pomanga pele pe opoia nenga tunangana ke ele haka pol ke luana elle (1 mita). Pe o umeia mono nem ana piunga nga ilina pe otal ke ana lung iri mol iange mono nem lape ana manga toto iri mol.
156	GEN 6:18	Pe Iau lape e poia lek tomunga hele ana helenga luluch nge iong. Pe iong lape oteu nga lem mono luluch nge lem hei pe tutum mur pe reria hehei mur pule.