23316	MAT 5:13	Tolo ndxab Jesús loo myen' xin' mté'th Jesús: Nde niin thìb con' loo gu': Neeque' gu' le' ted ndli par ne'yiza'de chol nít yèth o bél' co' ngo mèn ted loo, ¿lé'? Chele' teda alithe nzo'f di's nac ted co' inaziide par ne'yiza'de con' co' ngo mèn ted, sya, ya yende cón ntac ted. No cobii mèn ted par loo tub mèn loo ted. Tataa mod, ne, gu' nzo làth mèn co' alithe nque tee ban loo chol con' ye'rsin' par càba loo mèna le' mèna ne'tolode cua'n mod gàc mèna mèn ye'rsin' axta plóthe. Per chele' gu' ne'que tee ban ndacte loo mèn ye'rsin'a, càba le' mèna tolo li con' ye'rsin' axta plóthe no yende cón ntac gu' loo Diox. Sya, gàca loo gu' co' xà' Diox gu' loo zin' che'n Diox xal co'se' mblobii mèn teda.
23430	MAT 8:16	Co'se' mzyèle' izlyo' huiza, mbi'th no mèn huax mèn yíiz co' mque no mbii che'n xpii ye'rsin' loo Jesús. Ante gunii Jesús loo xpii ye'rsin'a, ngro xpii ye'rsin'a loo rye mèn yíiza. No mteyac Jesús ryete mèn yíiz co' mque no chol yíiz.
23787	MAT 17:18	Sya, mbyoo Jesús xpii ye'rsin'a. Ante gunii Jesús loo xpii ye'rsin'a, ngro xpii ye'rsin'a loo mbyòo. Ale leque hora mbyac mbyòo.
23828	MAT 18:32	Sya, mbli rey co' ngòc patrón moza mandad par ye'th mbi' co' ngòc ner moza loo rey. Sya, ndye'th no mèn mbi' co' ngòc ner moza loo rey. Rey ndxab loo moz: Susque' mèn ye'rsin'l, moz. No mozdèe lùu. Na mton' ryethe yalgute'f co' ngro' te'f lùu loon tac nalyat mde'f rol mdoodi'sl loon, ¿lé'?
23831	MAT 18:35	Co'se' ngolo mdoodi's Jesús rye di'sa, ndxab Jesús loo myen' xin' mté'th Jesús: ―Tataa li xuden Diox co' nzo loo bé' con gu' chele' gu' ne'teri'thte no ne'tecan'te, dib nzo yéc gu' no dib nzo lezo' gu', cón che'n xèn xyàn co' ndli hues xtàa gu' loo gu'.
23936	MAT 21:41	Mèna mcàb loo Jesús. Ndxab mèna: ―Mbi' co' nac che'n lus uva guth mèna. Ne'lyatte lezo' mbi' ñèe mbi' mèna. No yilo guth mbi' mèn ye'rsin'a, ta' mbi' xyòn mbi' loo tedib ned mèn co' li zin' loo xyòn mbi'. Mèna gàc mèn co', lìcque', li rol uv co' gàc che'n mbi' co'se' gáal tiemp làa mèn uv.
24636	MRK 9:29	Jesús ndxab loo myen': ―Thìb loo xpii ye'rsin' co' nac xal xpii ye'rsin'a, ne'ryo'de tua'te loo mèn. Naquin cuez mèn Diox no cue xlat mèn. Sya, tataa mod ryo xpii ye'rsin'a.
24650	MRK 9:43	Cona, ngue niin loo gu': Chele' gu' ndli cuent no nden' gu' le'n lezo' gu' le' ya' gu', lìcque', ndli par ncua'n gu' xtol gu' no xquin gu' por mdyub yo'f lezo' gu' loo con' ngue no gu', más huen gàca loo gu' cho' gu' ya' gu' par cobii mèn ya' gu' thìb lad tith loo gu'. Tac más huen ngàca loo gu' yòo gu' co'te' yòo ban no gu' Diox thidtene con sate ya' gu' leque lyàa gu' le'n ye'rbìil, co'te' nzo quìi no bèel co' thidtene ne'yu'de, con ryop ya' gu'.
25264	LUK 6:49	Per mèn co' nzi yòn di's co' ngue bezen no indlide mèna cas loo di's co' ngue bezen, mèna nac xal thìb mbi' co' mxít te'f thìb liz mbi' ro thìb yó'be'. No sangmblít te'f mbi' ftoo liz mbi' loo yòo. Ne'ngen'te mbi' cimient co'te' mdub mbi' liz mbi'. Co'se' ngro' nít yòo no nguáp nít yòo yó'be'a, ngozi'f nít yòoa liz mbi'. Ale mtexyath nít yòoa liz mbi'. Por derech, mblyux liz mbi' thidtene tac antub loo yòo mdub mbi' liz mbi'.
25412	LUK 9:42	Per co'se' mbii gax mbyòo loo Jesús, xpii ye'rsin'a mbli mquée mbii mbyòo. Ngulàa mbyòo loo yòo. No mbli xpii ye'rsin'a mquée mbii yíiz enferesi mbyòo loo Jesús. Per ante gunii Jesús loo xpii ye'rsin'a, ngro xpii loo mbyòo. Mteyac Jesús mbyòo. Sya, ndxab Jesús loo xud mbyòo: ―Mbyòo lùu ndxè'. Ngro'le' xpii ye'rsin' loo mbyòo.
25548	LUK 12:20	Per Diox ndxab loo mbi' rica: ¡Aa mbi'! Susque' naadl no susque' nguudl. Leque yál' ndxè' gathl no ryete con' ngue nol ba', ¿chó mèn gàc che'na yiloa, à'? Axta ne' ne' gàc ryete cosech ba' cón che'npe'l, ndee.
25863	LUK 20:15	Sya, mxen mèna mbyòo. Mblo' mèna mbyòo thìb lad ro yòo lus uva. Mbeth mèna mbyòo. Sya, mnibdi's Jesús loo mèn co' nzi yòn di'sa: ―¿Xá nee gu'? ¿Cón li mbi' co' nac che'n yòo lus uva loo mèn ye'rsin'a, à'?
26065	LUK 24:5	No de tant mzyeb mèngota co'se' gunèe mèngota xa'bi'a, mblàa quèe mèngota yéc mèngota par loo yòo. Sya, ndxab xa'bi'a loo mèngota: ―¿Chonon nde cua'n gu' Tad Jesús co' ngue tee banle', à', yey?
26196	JHN 3:7	Ne'hui'del, no ne'ñaadel, no ne'tyóodel arid cón che'n con' ngue niin lool nalle'. Naquinque' gáal gu' tedib vez xal ngolo guniina lool.
26218	JHN 3:29	Tolo ndxab Juàn loo myen': ―Nde niin thìb con' loo gu': Xa'bi' co' nac sa'l thìb xa'got, xa'bi'aque' nac sa'l xa'gota. Per thìb xa'bi' co' ndxàc amiu che'n mbi' co' nac sa'l xa'gota, xa'a ndoo tya. No ndoo yòn xa' di's co' ndyoodi's mbi' co' nac sa'l xa'gota. No co'se' ndoo yòn mbi' di's co' ndyoodi's xa'bi'a, anze'f ndyac lezo' mbi' ndxòn mbi' di's co' ndyoodi's mbi' co' nac sa'l xa'gota. Cona, daa, ne, anze'f ndyac lezo' ndxònen cuent co' ngue ta' gu' loon ba' cón che'n mbi'a.
26310	JHN 5:31	Tac chele' daa ngue ta cuent ante cón che'npe'en, le' sya, nzoque' mod gab mèn le' cuent co' ngue tan cuent cón che'npe'en, inacte con' lìcpe'.
26311	JHN 5:32	Per daa ngue nii loo gu': Nzoque' thìb xa' co' nda' cuent cón che'npe' daa. No daa nanee le' cuent co' nda' xa' cón che'npe'ena, le'i lìcpe' nac.
27258	ACT 8:13	No leque Mon, co' ndli con' ye'rsin'a, ngola's loo cón che'n Jesucrist. Ngòc bautizar Mon, ne. No mtlo Mon, mque tee no Mon Lip. Látha, ante ngüi' Mon no ante ñaa Mon xal ndli Lip yalguzye' no señ co' ndli Lip loo mèn.
27468	ACT 13:37	Per bél'yòo che'n lad mbi' co' mbli Diox ngro xban, ne'nga'ste no ne'ngaza'de, ne' por chu'th.
27857	ACT 24:20	No chele' mèna ne'yi'thte, ñee mèn co' nziri' loo U' ba' ñeene' ché' nzo chó xquin no xtol daa mcuanen co'se' mdoon loo mèn co' ñibe', no co' ndyoo ner, no co' ndyoo naa loo mèn nación Israel pezea.
27903	ACT 26:12	No par tolo lin leque con' ye'rsin'a, nguan axta ciuda Damasc con ye's co' nac ord co' mda' no co' mnibe' mèn co' nac jef co' más ñibe' loo rye nguley' loon.
28177	ROM 7:18	Tac daa nanee, part cón che'npe'en, yende chó con' ndac ndlin. Anze'f ndlyazen lin con' ndac. Per indaden lugar par lin con' ndac.
28534	1CO 5:12	Yende chó cón chenen par tub rezen cón che'n mèn co' tarte yila's loo Crist. Per ndxe'leque', ¿ché' inacte con' ndxè' cón che'npe' gu' par tub rez gu' loo mèn co' ndxela's co' nzo làth gu', co'se' ñèe gu' nzi tee li mèna con' ye'rsin'a, cà'? Con' ndxè' nacque' cón che'npe' gu', cara.
28682	1CO 11:14	¿Ché' inden'te gu' leque thìb xa'bi' ndlu' nazab ñaa thìb xa'bi' co'se' nol' yis yéc xa'bi'a, cà'?
29735	2TH 2:7	Per nalle' cón che'n con' roo no con' xèn co' nacasloo cón che'n con' ye'rsin'a, mtlole' ngue xo'f zin' con' ye'rsin' làth mèn. Ante ndxàc falt biiche xa' no ryo' xà' xa' co' ngue tau' loo no co' nca' loo con' zaba par ryo xo'f mbi' ye'rsin'a loo xnaa.
29779	1TI 1:16	Por cón che'n con' mblin láth ngòc daa mèn co' nau' loo no mèn co' nau' yéc co'se' ngòc daa nerleque' mèn ye'rsin'a, ale mblyat lezo' Diox gunèe Diox daa. Tataa mbli Jesucrist par mblu' Jesucrist daa loo mèn por cón che'n con' co' ngòc loon le' Diox anze'f ncha'la's tín' loo mèn. Ryete mèn nanee looque' xal mque tee lin. Por cona, Diox mbli ngòc daa thìb mbi' co' mblu' cón che'n xá mod susque' ncha'la's Diox ñèe Diox mèn, mèn co' yila's loo Crist par yòo ban no mèna Diox thidtene yìloa.
30284	HEB 12:5	¿Ché' mblyathla'sle' gu' di's co' mco'x Diox loo gu' por nacle' gu' xin'pe' Diox, cà'? Hui' gu' nexa. Taandxè' mbez loo libr co' nac xti's Diox. Ndxab Diox: Gu' co' nac xin'pe'en, ne'gabte gu' loo lezo' gu': Susque' ngue tetìi Diox nu', co'se' li Diox gàc yaltìi loo gu'. Ne' ne' tyoo xà' lezo' gu' co'se' nado' di's nado' cuent yoon gu' ndxep.
30379	JAS 2:19	Mbezl ndxela'sl nzo thidte Diox no maste. No huenque' ndlil co'se' tataa mbezl. Per ¿ché' ndyacl por ante mbezl ndxela'sque'l, lyá'l loo con' ryes, cà'? Yende xàa. Tac meexù' ndxela's nzo thidte Diox, ne. No axta nxi'th meexù' tant nzyeb meexù' cón gàc loo meexù' co'se' tub rez Diox cón che'n meexù' yiloa.
30431	JAS 5:10	Mèn huesen por cón che'n Jesucrist, gòc gu' xal mèn co' mxec no co' mxactìi no co' mcha'la's, mèn co' mde'th di's co' ndxab Diox xal mnibe' Diox li mèn tiempa.
30478	1PE 2:12	Nabe'ste fque tee ban ndac gu' làth mèn co' tarte libe' Diox no co' tarte ta' cuent cón che'n Diox. Tataa mod, mastale' nalle' ñii yèe ñii tìi mèna cón che'n gu' axta mbez mèn nac gu' mèn ye'rsin'túb, per yiloa mèna hui' xal nac con' ndac co' ndli gu'. No tataa mod mèna gab quetal naroo xèn nac Diox co' mbli nzi tee ban ndac gu' nalle'. Tataa gab mèna co'se' gàc huiz co'se' ta' mèn cuent loo Diox cón che'npe' mèn.
30579	2PE 2:12	Per ryete mèn ye'rsin'a thidtene indxònte di's no indxaa'dte mèn di's. Axta arid má' mèna loo Diox. Gu' naneeque' le' má' nac má' por nac thìb thìb má' xal nac má', ¿lé'? Ne'ñeede má' cón ndli má'. Tataa nac mèn ye'rsin'a, ne. Tac alithe ndyoodi's mèna thìb con' ye'rsin' no tedib con' ye'rsin' co' ne'ta'de mèn cuent cón ndyoodi's mèn. No leque mod ye'rsin' co' nac mèna càb loo mèna par lyux mèna.
30586	2PE 2:19	Asendli mèna. Mbez mèn ye'rsin'a loo mèn co' ngro xà'le' loo cón che'n xab izlyo' chele' mèna que tee no mèn ye'rsin'a, le' sya, càba que no mèna thìb yalnaban co' yende chó mèn cuee cà. Per yalgutyè'túb nac co' mbez mèna. Tac leque mèn ye'rsin'a nac xal thìb moz co' ndli yèe con' ye'rsin' co' ndli mbee ncà mèna. No ndli mèna anab con' zab. Tac thìb thìb mèn ye'rsin'a ndxàc moz loo con' zab co' ndyub yo'f lezo' mèna par li mèna con' zab.
30751	JUD 1:11	Prob mèn ye'rsin'a izlyo'. Tac ngue lique' mèna xalque' ngòc co' mbli Caín. Mèna ndxath nquìi ñèe tmi no nzi tee huanpe' mèna loo cón che'n Diox xalque' ngòca loo Balaam. No gàc yaltìi loo mèna no lyux mèna xalque' ngòca loo mbi' co' ngro' lèe Coré co' mblyux por mbli mbi' ngòc nguàal con' loo Moisés. Tataa gàc loo mèn ye'rsin'a, ne.
30752	JUD 1:12	Mèna ndxàp thìb mod ye'rsin'. Co'se' ndli gu' thìb lni chu'th par nqueltàa gu' par hua gu' sa lua' gu' con xtàa gu' co' ndxela's loo Tad Diox tac nque' lezo' gu' ñèe gu' hues xtàa gu', negadi's ndxòo mèna làth gu' par hua xle' mèna con gu'. No con' co' ndli mèna ndli nthyon taamas mèn. Ndxòo mèna xi'th gu'. Ndyac lezo' mèna axta plóthe co'se' ndxuhua mèn no ndxu mèn. No axta ne' ne' indxàp mèna mod loo co' ndli mèna làth gu'. No nac mèna xal myen' bix co' nqueno má' no co' nquenap má' co' ndlá'ya' má' por nguith myen', no por nazin' myen', no por ndli myen' ante co' neete lezo' myen'. Nac mèna xal xcuau biiz co' alithe ndri'th loo bé' co' ndxe' mbii, co' yende cón ntac tac indlàade xcuau yuu. Nac mèna xal yaa xlè co' inda'de xlè co'se' nac tiemp che'n xlè. Le'le' mbiiz yaa xlèa. No ale ngu'b yaa xlèa. No ale mquib mèn yaaa por tataa ngòca loo yaaa. Tataa gàca loo mèn ye'rsin'a, ne.
31150	REV 22:1	Be taa be taa ndoon, chàa, mxaquen mblu' angl thìb yó'be' co'te' nzo'f nít co' nda' yalnaban loo mèn. Níta ante nambìi ñaa. Ñaa níta xal vidr cristal. Mxaquen le' co'te' ndub Diox loo asient no co'te' ndub Mbacxil' co' nac leque yub Jesucrist ngro' yó'be'a, ndyaquen.