23233	MAT 1:20	Zenga rlebleedx men chene wlalo te xangel Dëdyuzh lo men lo mkaal, re angel guin: ―Xeb ne zëëd xnëz David, ydxedet de ytsëlnyano de Mli, porke mëëd ne gap men, por xpoder Espíritu Sant wuu ne.
23240	MAT 2:2	Lex wnabdiiz men, re men: ―¿Gozh mëëd ne wal ne nak xerrey men-Israel? Porke wii noo wlen xpël ne gyeybaa nes ledne rlen ngbiz, neguin zëëd noo saknzoon noo ne.
23243	MAT 2:5	Lex re yra mén guin: ―Belén ne nak lo lyu ne la Judea gal Ne, porke zenga wkaa profet ledne re:
23246	MAT 2:8	Lex wxaal rrey-Herodes men ne tsa men Belén, re rrey-Herodes lo men: ―Gutsa, ynabdizwen de gan pazh wal mëëd gwa; chene che wzël ne lo de, yluugue de diiz lo noo, chen no noo tsa saknzoon noo ne.
23251	MAT 2:13	Chene che sya mennan guin, wlalo te xangel Dëdyuzh lo Xeb lo mkaal, re angel guin: ―Gutsaxee, gulis mëëd yrup mëëd xnaa mëëd, gugya Egipto. Nga tsuu de axtegue ne yluu noo diiz lo de, porke skaye rrey-Herodes ne, chen yket rrey-Herodes ne.
23253	MAT 2:15	Nga wuu men axtegue ne wet rrey-Herodes. Wak neree chen gak kumplir xdiiz Dëdyuzh ne wkaa profet ledne re: “Wbëz noo XPee noo chen yruu me Egipto.”
23258	MAT 2:20	―Gutsaxee, gulis mëëd yrup mëëd xnaa mëëd, guberee ke Israel, porke le yra mén ne wlaan nket mëëd che wet.
23263	MAT 3:2	re Xwa: ―Gusaan xgyelmal de, porke che wyob gak ne rkyeen Dëdyuzh.
23264	MAT 3:3	Laa xkwent Xwaree nga wkaa profet-Isaías chene re men: Te rëz rlen denbidx, re we: “Gulaxnëz xnëz Men ne rnebééy, guxal te nëz ne tebli.”
23268	MAT 3:7	Per chene wyenen Xwa ne ndal men ne nak farisew no le men ne nak sadusew ra lo Xwa chen yrobnis men, nan Xwa lo men: ―¡Xerras mëël! ¿Txu na lo de ne yláá de lo gyelentozroo ne zëdyob?
23270	MAT 3:9	no ydxindet de ne gue de lo xkompanyer de: “Xnëz Abraham zëëd be”; porke yna noo lo de yra de ne axtegue gyeree zun Dëdyuzh gan ylaa Dëdyuzho men ne zëëd xnëz Abraham.
23275	MAT 3:14	per nadet Xwa, re Xwa lo Ne: ―Laa de ryal ytxobnis noo, lel laa de zëëd lo noo ne ytxobnis noo de.
23276	MAT 3:15	Wke Jesus, re Ne: ―Gutxobnis noo, porke rap be degne gun be kumplir yrandxee ne rkyeen Dëdyuzh. Orguin wna Xwa wtxobnis Xwa Ne.
23278	MAT 3:17	no wlen te rëz gyeybaa, re we: ―Laa XPee noo nee ne ryaan noo no ne kesentyent rnesak lextoo noo.
23281	MAT 4:3	Lex wa Bzelo lo Ne, re Bzelo: ―Belne nli XPee Dëdyuzh nak de, gukyeen yra gye gwa gako gyëtxtil.
23282	MAT 4:4	Wke Ne re Ne: ―Lo xgyiich Dëdyuzh re: “Let noncheedet por gyëtxtil ybán mén, sinke no ke por yrandxee xdiiz Dëdyuzh.”
23284	MAT 4:6	Lex re Bzelo lo Ne: ―Belne nli XPee Dëdyuzh nak de, gutsas nee, gugyab lyu, porke lo xgyiich Dëdyuzh re: Dëdyuzh yxaal xangel chen gapkwent xangel Ne de. Ylisgya xangel Ne de kon nya xangel Ne chen tsakadet gye nii de.
23285	MAT 4:7	Wke Ne re Ne: ―Laake re ke lo xgyiich Dëdyuzh: “Ylaadet de preb XDëdyuzh de.”
23287	MAT 4:9	Lex re Bzelo lo Ne: ―Noo yniiz yrandxee negwa lo de belne suzhib de lo noo saknon de noo.
23288	MAT 4:10	Wke Ne re Ne: ―Gubetxee lo noo Bzelo, porke lo xgyiich Dëdyuzh re: “Nonchee XDëdyuzh de gusaknon, no nonchee ne rkyeen Ne gulaa.”
23295	MAT 4:17	Kwlote nga wzelo Jesus wzëët Jesus xdiiz Dëdyuzh lo mén, re Ne: ―Gusaan xgyelmal de porke che wyob gak ne rkyeen Dëdyuzh.
23297	MAT 4:19	Lex re Ne lo men: ―Gutanal noo; noo ylaa ne ylaa de mén xpén Dëdyuzh.
23306	MAT 5:3	―Nzoon yra mén ne ryenen ne rkyiin ne gun Dëdyuzh xyudar men, porke por laa men nak ledne rnebééy Dëdyuzh.
23307	MAT 5:4	’Nzoon yra mén ne nles nuu lextoo, porke Dëdyuzh ydee diiz lo men.
23308	MAT 5:5	’Nzoon yra mén ne ndoo, porke skakwent men lyu ne re Dëdyuzh ydee Ne lo men.
23309	MAT 5:6	’Nzoon yra mén ne kesentyent rlaan ylaa ne rkyeen Dëdyuzh zegne rzak men ne rlaanen no zegne rzak men ne rlaan nis, porke laa Ne gaknonen men chen gun men gan ylaa meno.
23310	MAT 5:7	’Nzoon yra mén ne rap lextoo semén, porke zap ke lextoo Dëdyuzh men.
23311	MAT 5:8	’Nzoon yra mén ne rlaadet dol, porke swii men Dëdyuzh.
23312	MAT 5:9	’Nzoon yra mén ne rye gan pezee ybán men ndxi yra men semén men, porke laa men nak ne sela zhiin Dëdyuzh.
23313	MAT 5:10	’Nzoon yra mén chene rzakzi mén men por ne rlaa men ne rkyeen Dëdyuzh, porke por laa men nak ledne rnebééy Dëdyuzh.
23314	MAT 5:11	’Nzoon de yra de chene rninyaan mén lo de no chene rkye men de no chene noze yralondxee ne rkagyii men de por ne rlaleedx de noo.
23316	MAT 5:13	’Laa de yra de nak zegnak zëd nee gyëzlyuree; per belne gaknzhidetro, ¿pezee gak gaknzhi we ste? Batre ykyiindeto, noze yzhe we, noze gyichnii méno.
23317	MAT 5:14	’Laa de yra de nak bnii nee gyëzlyuree. No laa de nak zegnak te gyëzroo ne nak te xtoo gyeey ne gakdet gyidxlaan.
23320	MAT 5:17	’Tsuudet lextoo de ne noo zëëd ygyitxee ley ne wdee Dëdyuzh lo Moises no le ne wneluu profet. Noo zëëdet noo por ne ygyitxee noo we, sinke le noo zëëd chen gako kumplir.
23324	MAT 5:21	’Laa de yra de che nan de ne re Dëdyuzh lo xpenkwlal de: “Yketet de mén, porke men ne rket mén tesudet ne sakzi men.”
23325	MAT 5:22	Per noo yna noo lo de ne kwaskyertee mén ne rlayaa lo semén, tesudet ne sakzi men; mén ne rninyaan lo semén, tesudet ne ybig men lo xtis-Israel; mén ne nan lo semén, “men bat rkyiindet”, tesudet ne gya men lo gyi linfyeren.
23326	MAT 5:23	’Por neguin chene zasan de xgoon de lo fkuuk, lex nga rnileedx de ne rlaa xkompanyer de lo de por logne wlaa de men,
23328	MAT 5:25	’Belne nuu mén rdxig de lo xtis, guye gan pezee gyan de diiz yrup de men antes ne ydxig men de lo xtis; porke belne ydekwent men de lo xtis, sdekwent xtis de lo polisi, chen ysee men de chegyiib.
23330	MAT 5:27	’Laa de yra de che nan de ne re lo ley: “Ykanodet de mén ne nakdet lzaa de.”
23332	MAT 5:29	’Belne bzalobëë de rlaa ne ryab de lo dol, gukoo we, gusee we nat. Porke mazre wendee gak perdid te bzalo de, ke ne tsuu de yde de linfyeren.
23334	MAT 5:31	’No che nan ke de ne re lo ley: “Kwaskyertee mgyeey ne rchil xgyeltsëlnya yrup men xewnaa men, rap degne xexkwaa te gyiich ydee men lo xewnaa men ne che wsalzaan men men.”
23336	MAT 5:33	’No che nan ke de ne re Dëdyuzh lo xpenkwlal de: “Ygondet de Dëdyuzh noze xla, sinke gugun kumplir logne che re de ne ylaa de.”
23341	MAT 5:38	’Laa de yra de che nan de ne re lo ley: “Mén ne koo bzalo de, gukoo ke bzalo men; mén ne koo leey de, gukoo ke leey men.”
23346	MAT 5:43	’No che nan ke de ne re lo ley: “Gugyaan mén ne ryaan de, no gukwinyaan mén ne rwinyaan de.”
23349	MAT 5:46	Porke belne ryaan de nonchegue mén ne ryaan de, ¿pagox yniiz Dëdyuzh lo de belne zenga nak de? Axtegue men ne rgoob zeg impwest rlaa zenga.
23350	MAT 5:47	No belne rgabtyuzh de nonchegue xkompanyer de, ¿pe ne wenzhe rlaa de? Axtegue mén ne rlaleedxdet Dëdyuzh rlaa zenga.
23352	MAT 6:1	’Gugapkwent ylaadet de ne wen nes lo mén noze por ne kwii men ne rlaa de. Porke belne ylaa de zenga, bet yniizdet Dëdyuzh Xuz be ne zob gyeybaa lo de.
23356	MAT 6:5	’Chene rnab de lo Dëdyuzh, ylaadet de zeg rlaa men ne noze rkanlo wen ne rtseleedx rzuli rnab lo Dëdyuzh lenydoo no le skin nëz, chen kwii mén ne rlaa men. Nligue yna noo lo de yra de, nonchee ne rzaknon mén men nak ne wun men gan.
23358	MAT 6:7	’No chene rnab de lo Dëdyuzh, guedet de diiz ne bat rkyiindet ne gue de laake laako zegne rlaa mén ne zadet xnëz Dëdyuzh, porke nuu lextoo men por ne kesentyent rnii men mazre tsulyaaz Dëdyuzh men.
23365	MAT 6:14	’Porke belne laa de ne run de perdon yra ne mal ne rlaa mén de, laake zun Dëdyuzh Xuz be ne zob gyeybaa de perdon.
23367	MAT 6:16	’Chene rkwan de por ne rzaknon de Dëdyuzh, ytsownlesdet lo de zegne rlaa yra men ne noze rkanlo wen, porke yra mén guin rtsownles lo men chen gyenen mén ne rkwan men. Nligue yna noo lo de, nonchee ne rzaknon mén men nak ne wun men gan.
23370	MAT 6:19	’Yedet de gan pezee gapbëë gapduxtee de ne non ne nuu gyëzlyuree, ledne rluzh mlaa we, ledne rzhiino no ledne rdee ngbaan rbaano.
23373	MAT 6:22	’Bzalo me nak zegnak te bnii led me; belne wen bzalo me, ydendxee led me nak zegnak ledne nyenii.
23374	MAT 6:23	Per belne ngyidet bzalo me, ydendxee led me nak zegnak ledne nkeb. Belne ngyidet bnii guin, ¡pe zhidese gaknkebyaas!
23375	MAT 6:24	’Rut gakdet ylaa dxiin lo txup patron, porke swinyaan men te men, le ste men gyaan men, o gakwen men lo men te men, le ste men ylaandet men. Zenga ke laa de yra de, gakdet ylaa de dxiin lo Dëdyuzh no sobleedx ke de med.
23376	MAT 6:25	’Por neguin yna noo lo de yra de: Bet tsadet lextoo de gan pe gu de, gan pe goo de chen ybán de, ni por lër ne gak de. Porke gyelembán nak ne mazre nondee ke lo ne ru me no led me nak ne mazre nondee ke lo xab me.
23377	MAT 6:26	Gukwii zegnak maa ne rzhobee lo mee; rguudet ma bni, ni rkaadet ma kwlaap, ni yëten ma ledne tsutsoowo, no rseleedx Dëdyuzh Xuz be ne zob gyeybaa logne ru maa. ¿Pe let laadet de yra de nak ne nondee ke lo maa?
23378	MAT 6:27	No ¿txu laa de ne kesentyent rlebleedx gun gan ytsowngoolre xgyelembán?
23379	MAT 6:28	’¿Penak za xab de lextoo de? Gukwii pezee rroo gyeden; rlaadeto dxiin, ni rzhexkwaadeto lër,
23381	MAT 6:30	Belne zenga rlazhaandxee Dëdyuzh gyizh ne nuu den nedxeree, le yzhe le we che ke reeky leen oren, ¡peleske laa de ne ygakxabdet Dëdyuzh de, ake mén ne rlaleedxdet Dëdyuzh ydeblextoo!
23382	MAT 6:31	Por neguin bet tsadet lextoo de ne gue de: “¿Kosleg gu be? ¿Kosleg goo be? ¿Pa saaleg xab be?”
23386	MAT 7:1	’Yleedxdet de semén de, chen ylaadet ke Dëdyuzh gyelextis lo de.
23388	MAT 7:3	¿Penak rwii de yuwin ne nuu bzalo semén de no ryenden de ne nzhoodee bled ne nuu bzalo de?
23389	MAT 7:4	¿Pezee ryezh de ne nan de lo semén de: “Gudee si koo noo yuwin ne nuu bzalo de”, no ryenden de ne nzhoodee ne nuu bzalo de?
23390	MAT 7:5	¡Gugannaa laa de wen! Primer gukoo bled ne nuu bzalo de, chen gak kwii de wen chen koo de yuwin ne nuu bzalo semén de.
23391	MAT 7:6	’Ylebaadet de ne nakleey lo mëëk, tegue ybig ma noze ylabyu maa de, no ylebaadet de ne non lo kuch, tegue noze gyichnii ma we.
23392	MAT 7:7	’Gunab lo Dëdyuzh, laa Ne yseleedx ne rnab de; guye Ne, sël Ne lo de; gukanya txuyaglaa, sxal Ne yaglaa tee de.
23394	MAT 7:9	’Zegnak laa de yra de, ¿peguin nuu de rdee te gye lo zhiin de chene rnab ne gyëtxtil lo de?
23395	MAT 7:10	¿U pe rdee de te mëël lo ne chene rnab ne mël lo de?
23396	MAT 7:11	Laa de yra de mase mal de no nan de rdee de ne wen lo zhiin de, ¡peleske Dëdyuzh Xuz be ne zob gyeybaa ne ydeedet ne wen lo men ne rnab lo Ne!
23397	MAT 7:12	’Por neguin gugak lo mén zegne rlaan de ne gak men lo de, porke zenga zëëd lo ley ne wdee Dëdyuzh lo Moises no zenga ke zëëd lo gyiich ne wkaa yra profet.
23398	MAT 7:13	’Gutee nes ruyaglanzun. Porke ruyaglanzhen no nëz ne nzhen nak ne rdxiin linfyeren, no ndalyaa mén za nëz guin.
23400	MAT 7:15	’Gugap kwent yra mén ne rkade ne nan xprofet Dëdyuzh nak men. Porke noze rkanlo men ndoo men zegnak mëkzhiil, per le por lenlextoo men nak men zegnak lob ne rlaanen.
23406	MAT 7:21	’Let yradet mén ne nan lo noo: “Dechey, Dechey”, tee ledne rnebééy Dëdyuzh, sinke nonchee mén ne rlaa ne rlaan Dëdyuzh Xuz noo ne zob gyeybaa.
23407	MAT 7:22	Chene ydxiin dxe guin, ndalyaa mén yna lo noo: “Dechey, Dechey, wzëët noo diiz ne wguu de lextoo noo, no por la de wboo noo menzab lextoo mén, no por la ke de wlaa noo ndal gyelmilaguer.”
23408	MAT 7:23	Cheguin gue noo lo men: “Axtegue rnebeeydet noo de; gubetxee lo noo, mendol.”
23409	MAT 7:24	’Por neguin kwaskyertee men ne ron neree ne rzëët noo no rlaa meno, nak men zegnak te mén ne nuu xgyeryen ne wlep xyuu led gye.
23416	MAT 8:2	Lex wbig te mén ne rzak gyiz ne la lepra, wzuzhib men lo Ne, re men: ―Dechey, belnaal yna de zun de gan yneseyaken de noo.
23417	MAT 8:3	Orguin wzegaa Ne nya Ne wtee No led men, re Ne: ―Sna noo. Gugyaken. Orgueguin wyaken led mén guin.
23418	MAT 8:4	Lex re Ne lo men: ―Che nan de rut lo guedet do, nonchee lo fxuz gutsa gutsaluu led de no gutsaron xgoon de zegne zëëd lo ley ne wdee Dëdyuzh lo Moises chen gaknan mén ne che wyaken led de.
23420	MAT 8:6	re men: ―Dechey, le xmos noo nex ruyuu rzhuun men, baanske rlaa men, noze waknet led men.
23421	MAT 8:7	Lex re Ne lo men: ―Noo tsaneseyaken men.
23422	MAT 8:8	Wke kapitan, re kapitan: ―Dechey, rzëëldet noo ne tsa de axtegue ruxyuu noo; nozguestee gukyeen ne gyaken xmos noo, laa ne gyaken men nga.
23423	MAT 8:9	Porke no ke noo rap mén ne rnebééy lo noo, no rap ke noo mén ne rnebééy noo lo. Chene nan noo lo men te men ne tsa men mandad, ra men; chene nan noo lo men ste men ne chiid men lo noo, rdxiid men; chene nan noo lo xmos noo: “Gulaa neree”, rlaa meno.
23424	MAT 8:10	Ne won Jesus ne re kapitan zenga, wzee wzak Ne, lex re Ne lo yra mén ne zanal Ne: ―Nligue yna noo lo de ne ni Israel gardet ytsëlo noo ni te mén ne rlaleedx noo zegne rlaleedx ménree noo.
23427	MAT 8:13	Lex re Jesus lo kapitan: ―Gugya ruxyuu de; gak zegne wlaleedx de. Orgueguin wyaken xmos kapitan.
23431	MAT 8:17	chen gak kumplir diiz ne wzëët profet-Isaías chene re men: “Laa Ne wgyitxee xgyelenyaan be no le xgyelgyiz be.”
23432	MAT 8:18	Ne wii Jesus ne ndalyaa ndalduxtee mén ndxin kbii Ne, re Ne lo xpén Ne: “Yoo tekaa be stebkoo nis.”
23433	MAT 8:19	Lex wbig te maxter ley lo Ne, re men: ―Maxter, sanal noo de ledne tsatee de.
23434	MAT 8:20	Lex re Ne lo men: ―Mëëz rap ma xebluu maa, maa ne rzhobee rap ma xeftxëës maa; per le Men ne wdxiid wak Mén, yëten men ni ledne gyix xtoo men.
23435	MAT 8:21	Zhich guin re te xpén Ne lo Ne: ―Dechey, primer gudee si tsa noo gugyeer noo xuz noo, lex sanal noo de.
23436	MAT 8:22	Wke Ne re Ne lo men: ―Gutanal noo; gudee si gugyeer mengut semengut mengut.
23439	MAT 8:25	Lex wa xpén Ne wboo men mkaal lo Ne, re men: ―¡Dechey, guselaa be! ¡Le be zazebgyët!
23440	MAT 8:26	Wke Ne re Ne: ―¿Penak kesentyent rdxe de? ¡Ake mén ne rlaleedxdet Dëdyuzh ydeblextoo! Wluzhse re Ne zenga, waxee Ne wakndux Ne lo meroo guin no le lo nis; wutsëgoo.
23441	MAT 8:27	Kesentyent wzee wzak yra xpén Ne, rnabdizlsaa men, re men: ―¿Pezee nakleg ménree ne axtegue mee, axtegue nis ron xdiiz men?
23443	MAT 8:29	Zegne wii men Jesus, wzelo menzab rderëz menzab, re menzab: ―¿Penak rgal de noo, Jesus XPee Dëdyuzh? ¿Pe zëëd de nee ne yzakzi de noo antes ne ydxiin dxe?
23445	MAT 8:31	Lex wnab menzab lo Jesus, re menzab: ―Belne rboo de noo, gudee si tsa noo tee noo lextoo yra kuchro.
23446	MAT 8:32	Wke Ne re Ne: ―¡Gutsa! Orguin wruu menzab lextoo yrup mgyeey guin, watee menzab lextoo yra kuch guin. Wzelo ma wzhoon maa wxenxtoo maa te ruyúú, wyab ma axtegue lo nis. Nga wobkyiky ma nis, wet maa.
23450	MAT 9:2	Nga wdxiin mén lo Ne, wdxinneey mén te mgyeey ne noze waknet led, zhoob men te lo lonwin. Ne wii Ne ne rlaleedx yra mén guin Ne, re Ne lo mengyiz guin: ―Bet tsadet lextoo de zhiin, le xdol de che wak perdon.
23451	MAT 9:3	Orguin nuu lextoo tebëd maxter ley: “Diizree ne re ménree, diznyaan rnii men por Dëdyuzh.”
23452	MAT 9:4	Per kom nan Jesus gan pe nuu lextoo men, re Ne lo men: ―¿Penak rzaa ne mal lextoo de?
23453	MAT 9:5	¿Pe mazre mbëëdee gue noo lo men: “Le xdol de che wak perdon”, u ne gue noo: “Gutsaxee, gugya”?
23454	MAT 9:6	Orree kwii de yra de gante ne Men ne wdxiid wak Mén rap men poder nee gyëzlyuree por ne gun men perdon xdol mén. Lex re Ne lo mengyiz guin: ―Gutsaxee gulis xloon de, gugya ruxyuu de.
23457	MAT 9:9	Chene wruu Jesus nga ne sya Ne, wii Ne te men ne la Mdëw, zob men ledne rgoob men zeg impwest, lex re Ne lo men: ―Gutanal noo. Orguin wzuli men zanal men Ne.
23459	MAT 9:11	Ne wii yra men ne nak farisew neguin, re men lo yra xpén Ne: ―¿Penak ru xmaxter de yra men men ne rgoob zeg impwest no le yra men mendol?
23460	MAT 9:12	Ne won Jesus ne re men zenga, re Ne lo men: ―Men ne ngyëël, rkyiinden men doctor, sinke men ne rzhuun, men guin rkyiinen doctor.
23461	MAT 9:13	Gugya, guseed gan pe rna ne ka lo xgyiich Dëdyuzh ledne re: “Logne rlaan noo nak ne yles lextoo de semén de, lugar ne rket de maa lo fkuuk.” Noo zëëdet noo zëdye noo menwen, sinke le noo zëdye mendol chen ysaan men xgyelmal men.
23462	MAT 9:14	Lex wbig xpén Xwa ne rtxobnis, re men lo Jesus: ―Noo yra noo no yra men ne nak farisew, kesentyent rkwan noo rudet noo chene rnab noo lo Dëdyuzh, le xpén de, ¿penak rkwandet men?
23463	MAT 9:15	Wke Jesus, re Ne: ―Lo te dooy, ¿peguin zak noze nles kwiin xemyooz nobye myentras ne benak zu nobye lo men? Per sdxiin dxe ne ybetxee nobye lo men; cheguin si ykwan men.
23464	MAT 9:16	’Rut rkadaadet tebla lërkweb led te lëryuux, porke rdop lërkweb, lex rtxëzo lëryuux, mazre raknzhoodee ledne wrëz.
23466	MAT 9:18	Or ne re Jesus zenga lo men yra men, wdxiin te mén ne rnebééy lenydoo, lex wzuzhib men lo Jesus, re men: ―Le xsaap noo wluzhlo orree, per yoo tsa be yxob nya de led nzeb, sban nzeb.
23469	MAT 9:21	porke nuu lextoo men: “Naal pezee maske nonchee ytee nya noo led xab mén gwa, laa ne gyaken noo nga.”
23470	MAT 9:22	Per wcheree lo Ne wii Ne lo men, lex re Ne: ―Bet tsadet lextoo de zhiina; por ne wlaleedx de noo, wyaken de. Orgueguin wyaken men.
23472	MAT 9:24	Lex re Ne lo yra mén guin: ―Guruu lo leey. Wetet nzaapree, noze nexguees nzeb. Orguin wzhidxno yra mén guin Ne,
23475	MAT 9:27	Chene wruu Jesus nga, wrunal txup menngwlëë Ne, rkarëz men Ne, re men: ―¡XPee David, gules lextoo de noo!
23476	MAT 9:28	Chene wdxiin Ne ruyuu ledne nuu Ne, wbig yrup menngwlëë guin lo Ne; lex wnabdiiz Ne lo men, re Ne: ―¿Pe rlaleedx de ne zun noo gan gyenii bzalo de? Wke men re men: ―Rlaleedx noo we, Dechey.
23477	MAT 9:29	Lex wtee nya Ne bzalo men, re Ne: ―Por ne rlaleedx de ne zun noo gan gyenii bzalo de, gyenii we.
23478	MAT 9:30	Orgueguin wyenii bzalo men. Lex re Ne lo men: ―Rut lo guedet de gan pezee wyenii bzalo de.
23481	MAT 9:33	Zegne wboo Ne menzab lextoo menngup guin, wzelogue men wnii men. Kesentyent wzee wzak yrandxee mén, lex re men: ―¡Nunk gardet kwii be klas gyelmilaguerree Israel!
23482	MAT 9:34	Per le yra men ne nak farisew re: ―Bzelo ne rnebééy lo yra menzab rdee poder lo ménree ne rboo men menzab lextoo mén.
23485	MAT 9:37	Lex re Ne lo yra xpén Ne: ―Nli ne ndalyaa mén ne rlaan gon xdiiz Dëdyuzh nuu, per yëtet ndal mén ne yzëëto lo men.
23491	MAT 10:5	Antes ne yxaal Jesus yra chibtxup xpén Ne, re Ne lo men: ―Tsadet de nes ledne nuu mén ne nakdet men-Israel, ni tsateedet de gyëz ne nak Samaria;
23495	MAT 10:9	’Bet med gweeydet de, ni med or, ni med plat, ni med kober,
23497	MAT 10:11	’Chene ydxiin de te gyëznzhoo yra de o te gyëzwin, ynabdiiz de gan txu nak men wen, nga ykaa de ruxyuu mén guin axtegue ne yruu de gyëz guin.
23498	MAT 10:12	Zegne tee de lenyuu, ygabtyuzh de yra mén ne nuu yuu guin, gue de lo men: “Gyelendxi wlenza lenyuuree.”
23502	MAT 10:16	No re Jesus lo men: ―Gugon neree ne yna noo lo de, yxaal noo de yra de zegnak mëkzhiil lad lob. List gugak zegnak mëël, ndoo gugak zegnak mëër.
23507	MAT 10:21	’No laake bech mén ydekwent bech mén chen yket mén bech men, laake ngwzan ydekwent zhiin ngwzan, laake zhiin ngwzan til ngwzan no ylaa zhiin ngwzan ne yket mén ngwzan.
23510	MAT 10:24	’Ni te mén ne benak rseed nondet mazre ke lo xmaxter men; ni te mos nondet mazre ke lo xpatron men.
23511	MAT 10:25	Men ne rseed rap men degne gyan men byen gak men zegnak xmaxter men, le mos rap men degne gyan men byen gak men zegnak xpatron men. Belne Beelzebu rnii mén noo, ¿pezee yniileg mén de yra de ne nak de xpén noo?
23512	MAT 10:26	’Por neguin ydxedet de mén. Porke bet ne ngueedx yët ne yrunyoodet, ni yët ne rak rlaanguel ne gaknandet mén.
23515	MAT 10:29	’Laa de yra de nan de ne txup mgyinwin rdoo por te medwin, no ni te ma retet belne rdeedet Dëdyuzh si ne guet maa.
23518	MAT 10:32	’Mén ne rzëët lo mén ne xpén noo nak men, laake no noo yzëët lo Xuz noo ne zob gyeybaa ne xpén noo nak men.
23520	MAT 10:34	’Tsuudet lextoo de ne gyelendxi zëdneey noo gyëzlyu; zëdneeydet noo gyelendxi, sinke le noo zëdneey dil.
23523	MAT 10:37	’Men ne ntozdee ryaan xuz o ryaan xnaa ke lo noo, rzëëldet gak men xpén noo; no men ne ntozdee ryaan xpee o xsaap ke lo noo, rzëëldet gak men xpén noo.
23526	MAT 10:40	’Men ne tsukas de yra de, noo nga tsukas men; men ne rukas noo, Xuz noo nga ne wxaal noo zëëd noo rukas men.
23531	MAT 11:3	chen ynabdiiz men lo Ne, gue men: ―¿Pe laa de nga nak ne nuu diiz ne chiid u rap noo degne ykambë́z noo ste mén?
23532	MAT 11:4	Wke Jesus, re Ne lo men: ―Gutsa gue de lo Xwa logne rwii de, logne ron de.
23535	MAT 11:7	Chene che sya yra mén guin ne wanabdiiz lo Jesus, wzelo Ne wzëët Ne xkwent Xwa lo yra mén, re Ne: ―¿Pagox wa de wii denbidx? ¿Pe te gobkyii ne rlaa mee zere zerotee wa de wii?
23536	MAT 11:8	¿U pagox wa de wii? ¿Pe te mén ne zhaandxee rnaa xab wa de wii? Laa de yra de nan de ne men ne zhaandxee rnaa xab ruxyuloow rrey ndxin men.
23537	MAT 11:9	Guex neguin, ¿txu wa de wii? ¿Pe te profet wa de wii? Nli we, yna noo lo de, te men ne mazre nondee ke lo te profet wa de wii.
23540	MAT 11:12	’Desde dxe ne wzelo Xwa ne wtxobnis Xwa mén axtegue nedxeree, wzelo menmal wtsëldil men xdiiz Dëdyuzh, noze lafwers wlaan men nsoow men ne nyakzëëdeto.
23544	MAT 11:16	’¿Pagox ynesaglo noo mén ne nuu naaree? Rzaglo men minwin ne rkaa wkyit lenlgyeey no ne rkarëzlsaa,
23545	MAT 11:17	nan miin: “Wool noo flawt yra noo, per wyadet de. Nles wolbaan noo, per woondet de.”
23549	MAT 11:21	―¡Prob de men-Corazín! ¡Prob de men-Betsaida! Porke belne lad men-Tiro no le lad men-Sidón nyak gyelmilaguer ne wak lad de yra de, che penaadese wsaan men xgyelmal men naa, nbonyoo meno nyak men lër ne rak mén ne ruu gyelgut no ndxiib men di xtoo men.
23551	MAT 11:23	Laa de naa men-Capernaum, ¿pe nuu lextoo de ne gyeybaa gya de? ¡Lel axtegue linfyeren gya de! Porke belne lad men-Sodoma nyak gyelmilaguer ne wak lad de, benak nak gyëz guin axtegue naaree.
23553	MAT 11:25	Cheguin ke re Jesus: ―Dëde, laa de ne rnebééy de gyeybaa gyëzlyutee, rzaknon noo de porke wluu de lo men ne nandet yra ne wluudet de lo mennan no lo men ne rdee kwent xgyeryen.
23555	MAT 11:27	Zhich guin re Ne lo xpén Ne: ―Laa Xuz noo wniiz yrandxee kos lo noo chen ynebééy noo we. Rnebeeydet mén noo, nonchee Xuz noo rnebeey noo; rnebeeydet mén Xuz noo, nonchee noo rnebeey me, no le men ne rlaan noo ne ynebeey me.
23560	MAT 12:2	Chene wii yra men ne nak farisew neguin, re men lo Ne: ―Gukwii, le yra xpén de kalaa ne ndux ylaa be dxe ne rne be.
23561	MAT 12:3	Wke Ne re Ne: ―¿Pe gardet gool de lo xgyiich Dëdyuzh ledne re ne wlaa David chene wlaanen zhaa yra zhaa xkompanyer zhaa?
23563	MAT 12:5	¿U pe gardet gool de lo ley ne wdee Dëdyuzh lo Moises ne let doldet rlaa fxuz dxiin lenxeydoo Dëdyuzh dxe ne rne be?
23565	MAT 12:7	Belnaal ne ndee de kwent gan pe rna ne re lo xgyiich Dëdyuzh ledne re: “Logne rlaan noo nak ne yles lextoo de semén de, lugar ne rket de maa lo fkuuk.” Belne ndee de kwento, nkagyiidet de mén ne bet xdoldet.
23568	MAT 12:10	Lenydoo guin zu te mgyeey ne miitx te nya. Kom rye men ne nak farisew gan pezee ykagyii men Jesus, lex wnabdiiz men lo Ne, re men: ―¿Pe zak yneseyaken me te mengyiz dxe ne rne me?
23569	MAT 12:11	Wke Jesus, re Ne: ―Belne nuu de te de rap te mëkzhiil, lex gyab ma te leen pos dxe ne rne be, ¿pe tsaloodetgue de maa?
23571	MAT 12:13	Lex re Ne lo mgyeey guin ne miitx nya: ―Guzegaa nya de. Zegne wzegaa meno, wakwengoo, wyan ko zegnako stebo.
23581	MAT 12:23	Wzee wzak yrandxee mén, wzelo men re men: ―¿Peguin laa XPee David nee?
23582	MAT 12:24	Ne won men ne nak farisew zenga, re men: ―Beelzebu ne rnebééy lo menzab rdee poder lo ménree ne rboo men menzab lextoo mén.
23583	MAT 12:25	Per kom nan Jesus gan pe rlebleedx men, lex re Ne lo men: ―Yrandxee gobyeren ne rdil laake xpén, rdiidet gobyeren guin; no yrandxee gyëz o familye ne rdilelsaa, laake rdiidet men.
23584	MAT 12:26	Zenga ke, belne laake Bzelo rboo sebzelo Bzelo lextoo mén, laake Bzelo rdil Bzelo. ¿Pezee ydii ne rkyeen Bzelo?
23585	MAT 12:27	Belne Beelzebu rniiz poder lo noo ne rboo noo menzab lextoo mén, ¿txu rdee poder lo xpén de ne rboo men menzab lextoo mén? Por neguin laake men rbonyoo ne nlidet rnii de.
23587	MAT 12:29	’Porke ¿pezee gun mén gan tee men lenxyuu te mgyeey ne ndíp por ne gweey men yra ne rap mgyeey guin, belne yliibdet men mgyeey guin primer? Per belne yliib men men, zenga si zun men gan gweey men yra ne rap mgyeey guin.
23588	MAT 12:30	’Men ne nuudet xfabor noo, rwinyaan men noo; men ne ryedet gan pezee ydaalre xpén noo, rnexoon men xpén noo.
23589	MAT 12:31	’Por neguin yna noo lo de yra de ne zak perdon yrandxee xdol mén no yrandxee diznyaan ne rnii men, per le men ne rnii diznyaan por Espíritu Sant, nunk gakdet xdol men perdon.
23591	MAT 12:33	’Yagwen, wen nex ne rkaa lo we, per le yag ne ngyidet, ngyidet ke nex ne rkaa lo we. Porke yag ryakbeeyo por nex ne rkaa lo we.
23592	MAT 12:34	¡Xerras mëël! ¿Pezee ynii de dizwen si menmal nak de yra de? Porke yra diiz ne rzaa lextoo me, laa we rlen ruu me.
23596	MAT 12:38	Lex re tebëd men ne nak farisew lo Jesus no le tebëd maxter ley: ―Maxter, rlaan noo kwii noo ne ylaa de te gyelmilaguer.
23597	MAT 12:39	Wke Jesus, re Ne lo men: ―Menmal ne zadet xnëz Dëdyuzh rnab lo noo ne ylaa noo te gyelmilaguer, per betre gyelmilaguer kwiidet men, nonchee zegne wzak profet-Jonás kwii men.
23601	MAT 12:43	’Chene rruu menzab lextoo mén, zad tsu menzab ledne noze mbidx rkaye menzab ledne yne menzab, per rzëldeto.
23602	MAT 12:44	Lex nuu lextoo menzab: “Mazdee yberee ke noo ledne wruu noo.” Chene rberee menzab, nak mén guin zegnak te yuu ne nlat ne noze nexnloob no ne noze xnëz xnëzske nak.
23605	MAT 12:47	lex waluu te mén diiz lo Ne, re men: ―Le xnaa de no le yra bech de zu fwer, rlaan men guno men de diiz.
23606	MAT 12:48	Per wke Ne re Ne lo men ne waluu diiz lo Ne: ―¿Txu nak xnaa noo? ¿Txu nak bech noo?
23607	MAT 12:49	Lex wluu Ne yra xpén Ne, re Ne: ―Ménree nak xnaa noo no nak bech noo.
23611	MAT 13:3	Lex wzelo Ne wzëët Ne ndal diiz lo men zegnak te kwent, re Ne: ―Te dxe wruu te mén ne rguu bni, zalabni men zhobxtil.
23618	MAT 13:10	Lex wbig yra xpén Jesus lo Ne, re men: ―¿Penak rzëët de xdiiz Dëdyuzh lo mén zegnak te kwent?
23619	MAT 13:11	Wke Ne re Ne: ―Laa de yra de, Dëdyuzh wniiz si ne gaknan de logne ngueedx ne rkyeen Ne, per le yra ménree wdeedet Ne si ne gaknan meno.
23624	MAT 13:16	’Per le laa de yra de nzoon de, porke rwii de neree no ron de neree.
23626	MAT 13:18	’Gugon ne rna xkwent mén ne rguu bni.
23632	MAT 13:24	Wzëët Jesus zegnak ste kwent lo men, re Ne: ―Ne rkyeen Dëdyuzh nak zegnak te mgyeey ne wguu teblose zhobxtil lo xelyu.
23635	MAT 13:27	Lex wa yra mén ne rlaa dxiin lo mgyeey guin ne nako xen, re men: “Dechey, ¿pe let teblosedet zhobxtil wguu de lo xelyu de? ¿Pa wzaa gyizh ne bat rkyiindet ne nuu lado?”
23636	MAT 13:28	Lex re mgyeey guin ne nako xen: “Nuu mén ne rwinyaan noo wlaa negwa.” Orguin wnabdiiz yra mén guin ne rlaa dxiin lo mgyeey guin, re men: “¿Pe rlaan de tsalaaz noo we?”
23637	MAT 13:29	Per wke mgyeey guin ne nako xen, re men: “Tsadet de porke tegue ylaaz de no zhobxtil or ne ylaaz do.
23638	MAT 13:30	Mazre wendee gudee si yroo we yrup rlo we axtegue ne gak zhobxtil; lex yxaal noo mén ne ytopo. Per primer ytop men gyizh ne bat rkyiindet, lex yliib meno por mzhuun chen tseekyo; luzh nga, ytop men zhobxtil, gutsoow meno ledne tsutsoowo.”
23639	MAT 13:31	Wzëët Jesus zegnak ste kwent lo men, re Ne: ―Ne rkyeen Dëdyuzh nak zegnak te medx lyagwlizh ne rlabni mén lo xelyu mén.
23641	MAT 13:33	Wzëët Jesus zegnak ste kwent lo men, re Ne: ―Ne rkyeen Dëdyuzh nak zegnak lebadur ne rgoots te wnaa tson medid rin chen ynesegyi we yrandxee ngob.
23644	MAT 13:36	Wluzhse wguli Jesus mén nëz, wdee Ne lenyuu; lex wbig yra xpén Ne lo Ne, re men: ―Guzëët gan pe rna xkwent gyizh ne bat rkyiindet ne nuu lad zhobxtil.
23645	MAT 13:37	Wke Ne re Ne lo men: ―Mén ne wguu teblose zhobxtil nak Men ne wdxiid wak Mén,
23652	MAT 13:44	’Ne rkyeen Dëdyuzh nak zegnak te ne kesentyent non ne nulaan lo tebla lyu. Lex rzëlen te mgyeeyo, zhich guin rgulaan meno nga ke; kesentyent rzhiilen men, ra men ratoo men yrandxee ne rap men, lex ra men raka men lyu guin.
23653	MAT 13:45	’No nak ke ne rkyeen Dëdyuzh zegnak te mén ne rkaa rkaye perla ne kesentyent nyezh non, chen yka meno.
23655	MAT 13:47	’No nak ke ne rkyeen Dëdyuzh zegnak te gyix ne rtxoon mén lo nisdoo ne raag yralondxee mël leen.
23659	MAT 13:51	Lex wnabdiiz Jesus lo men yra men, re Ne: ―¿Pe rdee de kwent yra neree? Wke men re men: ―Rdee noo kwento, Dechey.
23660	MAT 13:52	Lex re Ne lo men: ―Yra maxter ley ne rseed ne rkyeen Dëdyuzh, nak men zegnak te ngwzan ne rbe ne kweb no le ne yuux lad yra ne non ne ngutsoow men.
23662	MAT 13:54	Ne wdxiin Ne laz Ne, wzelo Ne wneluu Ne mén lenydoo ne zob nga. Kesentyent wzee wzak yra mén, re men: ―¿Pazh wseed mén gwa yra negwa ne nan men? ¿Pezee run men gan rlaa men gyelmilaguer?
23663	MAT 13:55	¿Pe let laadet xpee karpinter wa? ¿Pe let xnaadet men nga nak Mli, le bech men nak Jacob, nak Xeb, nak Simon, no le Judas?
23664	MAT 13:56	¿Pe let needet nuu yra bzaan men lad be? ¿Pazh wseed men yra negwa?
23665	MAT 13:57	Por neguin wukasdet men Jesus, per re Ne lo men: ―Yrandxee lugar rzaknon mén te profet, per le laz men rzaknondet mén men, ni men ne nak xfamilye men rzaknondet men men.
23668	MAT 14:2	lex re Herodes lo men ne rlaa dxiin lo Herodes: ―Xwa ne rtxobnis wa wban. Por neguin rap men poder rlaa men gyelmilaguer.
23670	MAT 14:4	Porke ndal tir re Xwa lo Herodes: ―Ngyidet negwa ne rlaa de ne nuno de xewnaa bech de.
23674	MAT 14:8	Orguin wzëët xnaa nzeb lo nzeb gan kox ynab nzeb, lex re nzeb lo Herodes: ―Guniiz xtoo Xwa ne rtxobnis lo noo kon te lengyaan.
23681	MAT 14:15	Chene che rzëë, wbig yra xpén Ne lo Ne, re men: ―Chexke rzëë no ni te mén nuudet lugarree. Gugue lo yra ménree gya men chen tsa men yra gyëzwin ne nak guex nee yka men ne gu men.
23682	MAT 14:16	Orguin wke Jesus, re Jesus lo men: ―Yët neguin ne tsa men; laa de gudee ne gu men.
23683	MAT 14:17	Wke men re men lo Ne: ―Per nonchee gaay gyëtxtil no le txup mël neey noo nee.