23214	MAT 1:1	Laa yra la mén ne nak xpenkwlal Jesucrist nee, Jesucrist ne zëëd xnëz rrey-David no ne zëëd xnëz Abraham.
23215	MAT 1:2	Abraham nak xuz Isaac, Isaac nak xuz Jacob, Jacob nak xuz Judá yra bech Judá,
23218	MAT 1:5	Salmón nak xuz Booz, le xnaa Booz nak Rahab, Booz nak xuz Obed, le xnaa Obed nak Rut, Obed nak xuz Isaí,
23224	MAT 1:11	Josías nak xuz Jeconías yra bech Jeconías tyemp ne wzanofwers men-Babilonia men-Israel wyano men men Babilonia.
23225	MAT 1:12	Nga ka men chene wal Salatiel xpee Jeconías. Salatiel nak xuz Zorobabel,
23230	MAT 1:17	Chidaa ngwzan wuu kwlotee Abraham axtegue rrey-David, schidaa ngwzan wuu kwlotee rrey-David axtegue chene wzano men-Babilonia men-Israel ne wyano men men Babilonia, schidaa ngwzan wuu nga axtegue ne wal Jesucrist.
23231	MAT 1:18	Zeree wak chene wal Jesucrist: Che nuu Mli xnaa Ne ne ytsëlnya men yrup men Xeb; per antes ne tsuu men yrup men, wakzhiin Mli por xpoder Espíritu Sant.
23233	MAT 1:20	Zenga rlebleedx men chene wlalo te xangel Dëdyuzh lo men lo mkaal, re angel guin: ―Xeb ne zëëd xnëz David, ydxedet de ytsëlnyano de Mli, porke mëëd ne gap men, por xpoder Espíritu Sant wuu ne.
23235	MAT 1:22	Wak yra neree chen gak kumplir diiz ne re Dëdyuzh lo profet, laa we nga re:
23236	MAT 1:23	Gakzhiin te nzeb-benak, gap men te mëdbee ne sela Emanuel. Emanuel rna: Dëdyuzh zu kon laa be.
23237	MAT 1:24	Chene wruu mkaal lo Xeb, wlaa Xeb zegne wkyeen xangel Dëdyuzh Xeb. Wtsëlnya Xeb yrup Xeb Mli.
23239	MAT 2:1	Chene wal Jesus Belén gyëz ne nak lo lyu ne la Judea, tyemp ne nak Herodes rrey, wdxiin txup tson mennan Jerusalén ne nuu nes ledne rlen ngbiz.
23240	MAT 2:2	Lex wnabdiiz men, re men: ―¿Gozh mëëd ne wal ne nak xerrey men-Israel? Porke wii noo wlen xpël ne gyeybaa nes ledne rlen ngbiz, neguin zëëd noo saknzoon noo ne.
23241	MAT 2:3	Chene won rrey-Herodes neree, axtegue nandet men pe wuu lextoo men. Zenga ke wzak yrandxee men-Jerusalén.
23242	MAT 2:4	Por neguin wbëz rrey yrandxee fxuz ne rnebééy lo yra fxuz no le yra maxter ley, lex wnabdiiz rrey lo men gan pazh nak ne gal Crist.
23244	MAT 2:6	Laa de Belén ne nak lo lyu ne la Judea, nakdet de te gyëz ne zhindxee non lo yra gyëz ne mazre nondee ne nak lo lyu guin. Porke wa yruu te mén ne ynebééy, laa men gapkwent yra xpén noo, men ne nak men-Israel.
23245	MAT 2:7	Lex ngueedxendxee wbëz rrey-Herodes yra mennan guin wnabdiiz rrey-Herodes lo men gan pa tyemp tyempendxeezhe nak ne wii men wlen mël guin gyeybaa.
23246	MAT 2:8	Lex wxaal rrey-Herodes men ne tsa men Belén, re rrey-Herodes lo men: ―Gutsa, ynabdizwen de gan pazh wal mëëd gwa; chene che wzël ne lo de, yluugue de diiz lo noo, chen no noo tsa saknzoon noo ne.
23247	MAT 2:9	Wluzhse won men ne re rrey zenga, wka men nëz za men. Mël ne wii men wlen nes ledne rlen ngbiz, laa mël guin zaner lo men axtegue ne wdxiin mël guin ngali ledne nex mëëd guin, nga wzobtsë mël guin.
23248	MAT 2:10	Ne wii mennan guin ne wzobtsë mël guin, kesentyent wzhiilen men.
23249	MAT 2:11	Chene wdee men ledne nuu mëëd guin, wii men ne yrup ne Mli xnaa ne; orguin wzuzhib men lo ne wzaknzoon men ne. Lex wxal men xkaj men wboo men or no wboo men ne nak zegnak yaal no le mirra wgueed meno lo ne.
23250	MAT 2:12	Lex wnii Dëdyuzh lo men lo mkaal ne ybereedetre men nes ledne nuu Herodes. Por neguin nak ne wateedetre men nëz guin chene le men wberee ne sya men laz men.
23251	MAT 2:13	Chene che sya mennan guin, wlalo te xangel Dëdyuzh lo Xeb lo mkaal, re angel guin: ―Gutsaxee, gulis mëëd yrup mëëd xnaa mëëd, gugya Egipto. Nga tsuu de axtegue ne yluu noo diiz lo de, porke skaye rrey-Herodes ne, chen yket rrey-Herodes ne.
23253	MAT 2:15	Nga wuu men axtegue ne wet rrey-Herodes. Wak neree chen gak kumplir xdiiz Dëdyuzh ne wkaa profet ledne re: “Wbëz noo XPee noo chen yruu me Egipto.”
23254	MAT 2:16	Chene wyenen rrey-Herodes ne wkade mennan guin rrey-Herodes, kesentyent wlayaa rrey-Herodes. Lex wkyeen rrey-Herodes mén wa men waket men yrandxee mëdbee ne gardet luzh txup iz ne nuu Belén no ne nuu kbii Belén porke wboo men kwent ne re mennan guin lo men, che za we zeg txup iz ne wii men mël guin.
23256	MAT 2:18	Wlen te rëz gyëz-Ramá, baanske roon robtsaatee mén. Raquel nak mén guin ne kayoon por yra xpëëd men, no rlaandet men txu ynino men porke che wet yra xpëëd men.
23257	MAT 2:19	Per chene che wet rrey-Herodes, wlalo te xangel Dëdyuzh lo Xeb lo mkaal chene nuu Xeb Egipto, re ne:
23258	MAT 2:20	―Gutsaxee, gulis mëëd yrup mëëd xnaa mëëd, guberee ke Israel, porke le yra mén ne wlaan nket mëëd che wet.
23260	MAT 2:22	Per chene waknan Xeb ne laa Arquelao xpee rrey-Herodes rnebééy lo lyu ne la Judea no ne laa men wyan nii xuz men, wdxe Xeb nya men nga; lex wnii Dëdyuzh lo Xeb lo mkaal ne gya men tsuu men lo lyu ne la Galilea, por neguin wya men lo lyu guin.
23261	MAT 2:23	Chene wdxiin men nga, wa men wuu men gyëz ne la Nazaret. Wak neree chen gak kumplir diiz ne re profet ne men-Nazaret sela Jesus.
23262	MAT 3:1	Tyemp ke guin wa Xwa ne rtxobnis wzëët Xwa xdiiz Dëdyuzh denbidx ne nak lo lyu ne la Judea,
23263	MAT 3:2	re Xwa: ―Gusaan xgyelmal de, porke che wyob gak ne rkyeen Dëdyuzh.
23264	MAT 3:3	Laa xkwent Xwaree nga wkaa profet-Isaías chene re men: Te rëz rlen denbidx, re we: “Gulaxnëz xnëz Men ne rnebééy, guxal te nëz ne tebli.”
23265	MAT 3:4	Kon xgyits kamey nzhexkwaa xab Xwa, le sinturon ne ruu txu Xwa nak gyed, le ne ru Xwa nak miich no le dxin ne nuu den.
23267	MAT 3:6	Lex rxobdol men, rluzh nga rtxobnis Xwa men rugyow-Jordán.
23268	MAT 3:7	Per chene wyenen Xwa ne ndal men ne nak farisew no le men ne nak sadusew ra lo Xwa chen yrobnis men, nan Xwa lo men: ―¡Xerras mëël! ¿Txu na lo de ne yláá de lo gyelentozroo ne zëdyob?
23269	MAT 3:8	Xnëz gugak chen gaknyoo ne nli che wsaan de xgyelmal de,
23270	MAT 3:9	no ydxindet de ne gue de lo xkompanyer de: “Xnëz Abraham zëëd be”; porke yna noo lo de yra de ne axtegue gyeree zun Dëdyuzh gan ylaa Dëdyuzho men ne zëëd xnëz Abraham.
23271	MAT 3:10	Che list zu gyibyag ne txuug axtegue ydeblu yag; yrandxee yag ne rkaadet nexwen lo, txuugo, tsa we lo gyi.
23272	MAT 3:11	Noo noze kon nis rtxobnis noo de yra de chen gaknyoo ne che wsaan de xgyelmal de; per le men ne gyed zëëd, kon Espíritu Sant ytxobnis men de no le kon gyi. Axtegue ni xgyël men rzëëldet noo tsano noo lo men porke mazre rapdee men poder ke lo noo.
23273	MAT 3:12	No nzen men ne ylanya men zhobxtil, koo men zhobxtil lad xgyizho, lex gutsoow meno; le xgyizho tsa lo gyi ne nunk gyuudet.
23274	MAT 3:13	Cheguin ke wruu Jesus lo lyu ne la Galilea wa Ne rugyow-Jordán ledne ka Xwa, chen ytxobnis Xwa Ne,
23276	MAT 3:15	Wke Jesus, re Ne: ―Gutxobnis noo, porke rap be degne gun be kumplir yrandxee ne rkyeen Dëdyuzh. Orguin wna Xwa wtxobnis Xwa Ne.
23277	MAT 3:16	Wluzh wrobnis Ne, wruugue Ne lo nis, tebegue wyal gyeybaa, wii Ne zëdtseeb Espíritu Sant zegnak te mëër, wyab Espíritu Sant led Ne,
23279	MAT 4:1	Lex wano Espíritu Sant Jesus denbidx chen ylaa Bzelo Ne preb gan pe slaa Ne dol.
23280	MAT 4:2	Nga wkaa Ne txuplal gbiz txuplal gyëël wudet Ne, zhich guin wlen wlaanen Ne.
23281	MAT 4:3	Lex wa Bzelo lo Ne, re Bzelo: ―Belne nli XPee Dëdyuzh nak de, gukyeen yra gye gwa gako gyëtxtil.
23282	MAT 4:4	Wke Ne re Ne: ―Lo xgyiich Dëdyuzh re: “Let noncheedet por gyëtxtil ybán mén, sinke no ke por yrandxee xdiiz Dëdyuzh.”
23283	MAT 4:5	Lex wano Bzelo Ne Jerusalén, wlep Bzelo Ne xtoo xeydoo Dëdyuzh ledne mazre gyadee.
23284	MAT 4:6	Lex re Bzelo lo Ne: ―Belne nli XPee Dëdyuzh nak de, gutsas nee, gugyab lyu, porke lo xgyiich Dëdyuzh re: Dëdyuzh yxaal xangel chen gapkwent xangel Ne de. Ylisgya xangel Ne de kon nya xangel Ne chen tsakadet gye nii de.
23285	MAT 4:7	Wke Ne re Ne: ―Laake re ke lo xgyiich Dëdyuzh: “Ylaadet de preb XDëdyuzh de.”
23286	MAT 4:8	Wluzh nga wano Bzelo Ne te xtoo gyeey ne kesentyent gya, lex wluu Bzelo yrandxee gyëz ne nak lo gyëzlyu lo Ne no le yrandxee ne non ne nuu lo gyëzlyu.
23287	MAT 4:9	Lex re Bzelo lo Ne: ―Noo yniiz yrandxee negwa lo de belne suzhib de lo noo saknon de noo.
23288	MAT 4:10	Wke Ne re Ne: ―Gubetxee lo noo Bzelo, porke lo xgyiich Dëdyuzh re: “Nonchee XDëdyuzh de gusaknon, no nonchee ne rkyeen Ne gulaa.”
23290	MAT 4:12	Chene waknan Jesus ne le Xwa che nuu chegyiib, wberee ke Ne lo lyu ne la Galilea.