23218	MAT 1:5	Salmón unga paꞌ Booz, nu naꞌlla lee Rahab. Booz cuna unaꞌlla Rut uluꞌcu beella enduꞌ beella enu lee Obed. Nu Obed unga paꞌ Isaí.
23220	MAT 1:7	Nu Salomón unga paꞌ Roboam, Roboam unga paꞌ Abías, nu Abías unga paꞌ Asá.
23256	MAT 2:18	Uyene tucu chii eyeche Ramá, nú runaꞌ nu rixiali. Nu Raquel neca enu runaꞌ cuaꞌ equie cuendaꞌ bee enduꞌnchu, nu lecati enu riꞌi ana tsala arquiꞌnchu xne ungutila bee enduꞌnchu.
23336	MAT 5:33	’Leꞌca nediyalaꞌhua nú uni Moisés lubee beneꞌhua enu udetela: “Rquiꞌña nú tsaꞌalu bene lunú unilla nú riꞌilla chenu rquieꞌella Diose nú riꞌilla.”
23390	MAT 7:5	¡Bene enu nequichiaꞌ! Rluti uriꞌi tucu nú necane, che nuꞌ modo nilu lu stucu bene la yala nú riꞌilu scua.
23419	MAT 8:5	Hora nú nzechuꞌu Jesuse eyeche Capernaum, uriña tucu capitán Roma lunu nu uzequiella lunu,
23488	MAT 10:2	Bee benequieꞌ neca lu chiꞌchiucu apóstolꞌ Jesuse: Rluti, Simón enu leꞌca lee Pedro, nu bichilla Andrés; nu Jacobo cuna Juan, rucu benequieꞌ neca llianaꞌ Zebedeo.
23494	MAT 10:8	Riyecahua bee bene enu riti, nu riꞌihua nú huañi zeca bee bene enu unguti, riyecahua bee bene enu seca elichia nú lee lepra, huahua bee benechiquiꞌ arquiꞌ bee bene. Tucu nú lia uliquia poder cuaꞌ luhua, leꞌca chenu riyecahua bee bene la riꞌihua cobre.
23547	MAT 11:19	Neequie uriña liꞌá Bene enu uxeꞌla Diose, nú racua nu rueꞌa biñu, nu rnihua nú racuxetaꞌa nu riuꞌ arquia rueꞌa viñu nu rquietea bee bene enu rluꞌcu dula nu cuna bee bene enu rriꞌi cubre impuesto para Roma. Pero yebee bene rriꞌi beyaꞌ, liꞌibeella nediyaꞌ beella nú neca nzeꞌca lunú rriꞌi Diose.
23590	MAT 12:32	Rriꞌi Diose perdona titse bee bene enu rni bedichiaꞌ chiꞌquiꞌ equie cuendaꞌ liꞌá, Bene enu uxeꞌla Diose, pero titse bene enu nechiꞌquiꞌ Espíritu Santo lecaꞌ perdona para bee benecuaꞌ niꞌ lu iliulabe quieꞌ nu niꞌ liñibe.
23604	MAT 12:46	Rdichiaꞌ nuscaꞌ Jesuse bee bene zeꞌe, chenu uriña naꞌnu cuna bee bichinu nucuaꞌa eliꞌyaꞌ nu niarquiꞌ beella bedichiaꞌnu beella liꞌinu. Nu lunú nucuaꞌa beella eliꞌyaꞌ,
23734	MAT 15:32	Chequie ubixia Jesuse bee beneꞌnu nu uninu lubeella: ―Ruꞌu arquia bee benequieꞌ, xne necala chuna bichia nú nucuaꞌa beei lua nu la uyaꞌ beei nú acu beei. La niarquia nú xeꞌlaa beei yue beei scuatsia niꞌi beei, xne cá chiulaꞌ beei inziu.
23736	MAT 15:34	Nu unedichiaꞌ Jesuse lubeella, nú uninu: ―¿Xala pa rluꞌcuhua? Nu ucuaqui beella lunu: ―Rluꞌcuru achine cuna chiucu chuna bee bela.
23793	MAT 17:24	Chenu uriña Jesuse cuna bee beneꞌnu eyeche Capernaum, uya bee bene enu rriꞌi cubre impuesto para indu llene Jerusalén lu Pedro nu unidichiaꞌ beei lulla, nu unibeei: ―¿Rixiu maestroꞌlu impuestoꞌ indu la?
23911	MAT 21:16	nu unibeei lu Jesuse: ―¿Rieneꞌlu nú rni bee enduꞌ cuaꞌ la? Che ucuaqui Jesuse lubeei: ―Aahuaꞌ, rienea. Pero ¿xieꞌ lascaꞌ ulahua lu ichiꞌ Stichiaꞌ Diose elu rni lu cuendaꞌ nucuaꞌ la? Lu ichiꞌ Stichiaꞌ Diose rni: Uriꞌilu nú bee enduꞌ llaꞌna cuna bee enduꞌ meꞌe enu rachi, neca bee enu ula bee canto nu zucuꞌ aya liꞌilu.
23926	MAT 21:31	Neequie uniꞌhua, ¿ta lu rucu bee llianaꞌlla uriꞌi lunú niarquiꞌlla? Che unibeei lunu: ―Enu unilla lu rluti. Chequie uni Jesuse lubeei: ―Liꞌá nia luhua nú bee bene enu rriꞌi cubre impuesto para Roma, cuna bee unaꞌa huexe rluti bee nzeꞌe chuꞌu elurnibiyaꞌ Diose liñibe luquela liꞌihua.
23927	MAT 21:32	Xne ubeꞌta Juan Bautista udixiuleꞌe luhua nú xa huañihua, nu né chili arquiꞌhua nú unilla, aꞌlaquie bee bene enu rriꞌi cubre impuesto para Roma cuna bee unaꞌa huexe uchilí arquiꞌbeei nú unilla. Pero liꞌihua mase ulañiꞌhua bee nucuaꞌ, ne cheꞌe arquiꞌhua, para nú a chili arquiꞌhua nú unilla.
23970	MAT 22:29	Nu ucuaqui Jesuse lubee saduceo zeꞌe nú uninu: ―Rnihua scua xne la riꞌihua beyaꞌ Stichiaꞌ Diose nu la chuluhua xneca neca lunú rnibiyaꞌ Diose.
24011	MAT 23:24	¡Liꞌihua necahua xi neca enu nequieꞌlu xne niarquiꞌhua nú zeteꞌhua bee bene nu niꞌ liꞌihua la acahua, nu riꞌyahua liꞌihua nú la riꞌihua dula nú lleꞌnatsia neca! ¡Nu la biꞌyahua liꞌihua nú rriꞌihua dula nú mase necha neca! ¡Tucu nú rni bee bene: Riꞌyahua liꞌihua nú la aquihua seruchiꞌ pero riaquihua cameyu!
24013	MAT 23:26	Liꞌihua bee fariseo neca xi neca nú niquieꞌluhua: Rluti cheꞌexu arquiꞌhua lunú necha rriꞌihua, che lubeꞌ nú neli rriꞌi nzeꞌcahua.
24028	MAT 24:2	Che uninu lubeella: ―Rlañiꞌhua indu quieꞌ scua nee. Pero liꞌá nia luhua nú nzeꞌta bichia nú la yaꞌnaꞌ niꞌ stucu quiee quieꞌ equie saꞌe. Yeene rilae.
24170	MAT 26:47	Rdichiaꞌnuscaꞌ Jesuse bee beneꞌnu chenu uriña Judas, enu neca tucu lu chiꞌchiucu bee beneꞌnu, uriñayui huaxi bee bene enu nuyaꞌ espada cuna acarute lunu. Nu unaꞌtse beei Jesuse xne unibiyaꞌla bee uleꞌya enu rnibiyaꞌ lubeela bee uleꞌya cuna bee usticia Israel nú acane scua.
24189	MAT 26:66	¿Xa nihua nee? Che ucuaqui bee bene zeꞌe nú unibeei: ―Riala nú ati nucuaꞌ.
24259	MAT 27:61	Ruꞌu eluhua zeꞌe nzucu María enu neca bene eyeche Magdalena cuna stucu María.
24408	MRK 4:16	Texcuaꞌa bee bene neca xi neca ebichi nú uzanaꞌ leta quiee. Rieneꞌ beei Stichiaꞌ Diose nu ñia uyucu arquiꞌbeei.
24413	MRK 4:21	Leꞌca uni Jesuse lubeei: ―¿Leca modo nú duꞌ llieꞌe tucu quinqué, tunu tsacuꞌ bene tucu caja equiee, urre tsu benene liñi luna? Rquiꞌña, nú zucu quinqué cuaꞌ elu ayaa, para nú duꞌ llieꞌe diqui luhuare.
24468	MRK 5:35	Rniscaꞌla Jesuse lu unaꞌa zeꞌe chenu uriña bee bene enu nucuaꞌa niꞌi Jairo nu unibeei lu Jairo: ―Unguutila enduꞌlu nee. La niaꞌlu lu maestro.
24538	MRK 7:6	Chequie ucuaqui Jesuse lubee benecuaꞌ nú uninu: ―Rriꞌihua tucu nú rlubeꞌhua nú rriꞌi nzeꞌcahua, pero lia rriꞌihua nucuaꞌ. Neli neca nú uni profeta Isaías chenu uquieꞌella lunú uni Diose lu cuendaꞌhua nú uninu: Bee benequieꞌ rriꞌi beei tucu nú chiquiꞌ rluꞌcu beei ulaꞌna lua, pero istu nzu arquiꞌbeei lua.
24571	MRK 8:2	―Ruꞌu arquia bee benequieꞌ, xne nucuaꞌa labeei chuna bichia cuna liꞌá nu lecaxi luꞌcu beei caꞌa acu beei.
24574	MRK 8:5	Che unidichiaꞌ Jesuse lubeella nú uninu: ―¿Xala pá rluꞌcuhua? Nu ucuaqui beella: ―Rlucuru achine.
24593	MRK 8:24	Nu uquixie nú riꞌya, niyu zeꞌe nu uni: ―Rlañia bee bene nú sebeei. Pero rnaa beei xi rnaa aca.
24696	MRK 10:39	Nu ucuaqui beella lunu: ―Riquiꞌru nucuaꞌ. Che uninu lubeella: ―Neli nú nehuana zecahua tucu nú nehuana zecaa nu atihua tucu nú atia.
24824	MRK 14:1	Rriꞌitsia xiucu bichia nú aca eliñi baxcu, chenu racu bee bene Israel pá nú la chuꞌu levadura equie, che bee uleꞌya enu rnibiyaꞌ lubee uleꞌya cuna bee ulaxcuela enu reca leyꞌ Moisés, rlaꞌna beei xa modo zequienu beei Jesuse para nú naꞌtse beei liꞌinu nu úti beei liꞌinu.
24866	MRK 14:43	Rniscaꞌlá, Jesuse cuna liꞌibeella chenu uriña Judas enu unga tucu lu chiꞌchiucu bee beneꞌnu, uriña yui huaxi bee bene enu nzene espada cuna bee acarute. Nú nzeꞌta naꞌtse beei Jesuse lunú unibiyaꞌ bee uleꞌya enu rnibiyaꞌ lubee uleꞌya cuna bee ulaxcuela enu reca leyꞌ Moisés cuna nú rnibiyaꞌ bee usticiaꞌ bee bene Israel.
24916	MRK 15:21	Chequie chenu nzeyu beei Jesuse, ullaꞌca beei tucu bene eyeche Cirene enu lee Simón necalla paꞌ Alejandro cuna Rufo nzeꞌtalla enza dañi. Che uriꞌi bee sundado juerza liꞌilla para nú uyaꞌlla cruseꞌ Jesuse.
24920	MRK 15:25	Rquie quieꞌ silaꞌ uquieꞌe beei Jesuse lu cruse.
24924	MRK 15:29	Chequie bee bene enu udete zeꞌe unibeei huaxi bedichiaꞌ nú necha neca lunu, cuna nú rcuñi beei equie beei xiꞌchinu beei liꞌinu nú rnibeei: ―¡Manú! Rnilu nú chilalu indu llene Jerusalén nu lu chunatsia bichia recheꞌ zecalue,
24978	LUK 1:16	Riꞌilla nu huaxi bee bene Israel cheꞌe arquiꞌbeei lu stula beei nú benchilaꞌ beei lu inziuꞌ Diose, liꞌinu enu neca Dioseꞌ beei.
25121	LUK 3:27	Judá unga lliñi Joanán, Joanán unga lliꞌñi Resa, Resa unga lliꞌñi Zorobabel, Zorobabel unga lliꞌñi Salatiel, Salatiel unga lliꞌñi Neri.
25129	LUK 3:35	Nacor unga lliꞌñi Serug, Serug unga lliꞌñi Ragau, Ragau unga lliꞌñi Peleg, Peleg unga lliꞌñi Heber, Heber unga lliꞌñi Sala,
25257	LUK 6:42	Nu tunu llenelá neca bee falta nú rriꞌilu, ¿xa modo nilu lu bene nú la neca nzeꞌca nú rriꞌibeei? ¡Bene enu niquichiaꞌ! Rluti uriꞌi lunú riala nú riꞌilu, che nuꞌ modo nilu lu bene nú la neca nzeꞌca nú rriꞌibeei.
25263	LUK 6:48	Liꞌilla necalla xi neca tucu bene enu urecheꞌe tucu niꞌi. Rluti udaꞌñilla aquié lu yuu hasta nú uriñalla elu nuꞌ quiee, che uquixiella uricuꞌlla simiendu lu quiee zeꞌe. Chenu ulaca huaxi inza mase uyuꞌe tsuꞌ niꞌi zeꞌe, pero niꞌ temeꞌ lá cuñi niꞌi zeꞌe, xne nchiucuꞌ simienduꞌe lu quiee.
25268	LUK 7:4	Uya bee benequieꞌ elu nzu Jesuse nu chiquiꞌ uziquiee beella lunu nú uni beella lunu: ―Riala nú riꞌilu elietsa lu Capitán quieꞌ.
25363	LUK 8:49	Rdichiaꞌnuscaꞌ Jesuse unaꞌa zeꞌe, chenu uriña tucu bee beneꞌ Jairo nu unilla lu Jairo: ―Ungutila enduꞌlu. La riꞌi xiaꞌlu lu Maestro nee.
25383	LUK 9:13	Pero uni Jesuse lubeella: ―Liꞌihua udeꞌtehua nú acubeei. Nu ucuaqui beella lunu: ―Rluꞌcutsiaru ayuꞌ pá cuna chiucu bela. Mejora chatsiaꞌahua nú acu ye bee benequieꞌ.
25492	LUK 11:18	Leꞌca esquie tunu leꞌca liꞌi bezeꞌlu riꞌi condrai bee benechiquiꞌ, ¿xa diꞌya nú rnibiyaꞌi che? Rnia nucuaꞌ luhua, xne rnihua nú rluaa benechiquiꞌ arquiꞌ bee bene cuna lunú reca bezeꞌlu.
25516	LUK 11:42	’¡Cueꞌhua bee fariseo!, liꞌihua rdeteꞌhua diezmo bee huañi nú neca menta, cuna rruda nu ye nú racu bee bene. Rdeteꞌhua nucuaꞌ lu Diose tucu nú rnibiyaꞌ ley nú riala riꞌihua, pero la riꞌihua tucu nú neli neca lubee bene, nu la riꞌi casohua elusecaꞌ Diose. Uriꞌihua caso elu secaꞌnu nu la tsanaꞌhua nú deteꞌhua lunú rdeteꞌhua lunu.
25584	LUK 12:56	Bene enu niquichiaꞌ bee lee. Rriꞌihua beyaꞌ xa neca bee seña liñibe cuna lu iliulabe, nu ¿xiquie nú la riꞌihua beyaꞌ xa neca lunú reca nee?
25724	LUK 17:4	Mase achi bese tucu bichia riꞌilla urre nilla bee nú necha neca lulu, nu tunu achi bese leꞌca entalla nu nilla lulu uriꞌi perdona liꞌá: “La riꞌá scua stucu bese.” Rquiꞌña nú riꞌilu perdona liꞌilla.
25742	LUK 17:22	Nu uninu lubee beneꞌnu: ―Riña bichia nú niarquiꞌhua nú lañiꞌhua liꞌá Bene enu uxeꞌla Diose masia tucu bichia pero la lañiaꞌhua liꞌá.
25799	LUK 18:42	Nu uni Jesuse lulla: ―Riꞌyalálu nee, nu uyecaꞌlaꞌlu xne uchili arquiꞌlu liꞌá.
25843	LUK 19:43	Riña bichia nú recheꞌe bee bene enu rlee luhua muro diqui abenchilaꞌ lachihua, nu diqui bee luhuare riꞌi condra bee bene liꞌihua,
25868	LUK 20:20	Che uxeꞌla beei bee bene nze tsiꞌña liꞌinu, nu rriꞌi bee bene quieꞌ tucu nú neca beei bene nzeꞌca, para nú rlaꞌna beei nú ni Jesuse tucu bedichiaꞌ nú riꞌi nú deteꞌ cuenda beei liꞌinu lu gobernador Roma.
25870	LUK 20:22	Uniꞌ luru: ¿Neca nzeꞌca nú dixiuru bee impuesto lu gobernador Roma la?, ¿urre la neca nzeꞌcae la?
25901	LUK 21:6	―Riña bichia nú ye nú rlañiꞌhua nee, pero niꞌ stucu quiee la yaꞌnaꞌe equie saꞌe, yeene rilae.
25980	LUK 22:47	Rniscaꞌlá Jesuse lubeella, chenu uriña huaxi bee bene. Nu enu lee Judas, enu unga tucu bee beneꞌnu, liꞌi nzucului lu ye bee bene zeꞌe, nu chu uyabicai lu Jesuse para nú udacui bichiuꞌ xecanu.
26023	LUK 23:19	Barrabás quieꞌ unibiyaꞌ bee usticia nú uyuꞌi niꞌcuꞌ equie nú uliunui bee usticia eyeche Roma nu uliunuu bee benecuaꞌ eyeche Jerusalén, cuna equie nú unguuti bene.
26096	LUK 24:36	Rdichiaꞌscaꞌ beella lunú unga, chenu ulubeꞌlu Jesuse lubeella, nu uninu lubeella: ―La lliquihua ñia utsu arquiꞌhua.
26101	LUK 24:41	Pero lá chiliscaꞌ arquiꞌbeella nu liꞌinu lunú ñia nzu arquiꞌ beella cuna nú nzenu arquiꞌbeella, che uninu lubeella: ―¿Rluꞌcuhua lleꞌna nú acua la?
26196	JHN 3:7	La zeca lullieꞌlu equie nú unia lulu chenu unia lulu: “Rquiꞌña nú ala zeca bee bene.”
26260	JHN 4:35	Liꞌihua rnihua: “Rriꞌiscaꞌlá se stacu guu para nú aca ulaꞌcu.” Pero liꞌá nia luhua: Nú uletsahua luhua nu ubiꞌyacuruhua lubee yuu, nú necala bee para nú aca ulaꞌcu lubee.
26640	JHN 11:48	Nu tunu zelaꞌahua nú nzeriꞌilá benequieꞌ scua, ye bee bene chili arquiꞌ liꞌilla, che bee usticia Roma yeꞌta nitilu induꞌahua nu cuna naciónꞌahua.
26711	JHN 13:12	Chenu ulaxu nú uquieenu cuchiuꞌ bee beneꞌnu, che ungutu zecanu laquie nú uluanu lu xucunu, nu chu uzucu zecanu lu mexa nu uninu lubeella: ―¿Rriꞌihua beyaꞌ lunú uriꞌá luhua la?
26762	JHN 14:25	’Rnia ye bee nucuaꞌ luhua diquila nú nzuscaꞌa cuna liꞌihua;
26766	JHN 14:29	Rixiuleꞌexula nucuaꞌ luhua nee para nú chenu acane chili arquiꞌhua liꞌá.
26779	JHN 15:11	’Rnia scua luhua para nú ñia tsu arquiꞌhua tucu nú ñia nzu arquia para nú zaꞌ nú ñia nzu arquiꞌhua.
26793	JHN 15:25	Pero recae scua, xne rquiꞌña nú yalu tucu nú nequie lu leyꞌ beei elu rni: “Rana arquiꞌbeei liꞌá nu lecaxi rriꞌa lubeei.”
26796	JHN 16:1	’Rnia bee bedichiaꞌ quieꞌ luhua para nú la tsu chiucu arquiꞌhua.
26798	JHN 16:3	Rriꞌi beei scua xne lascaꞌ chulu beei Pa Diose nu niꞌ liꞌá lá chulu beei.
26799	JHN 16:4	Rnia bee nucuaꞌ luhua para nú chenu acane elluꞌcu arquiꞌhua nú unilane luhua. Né nia nucuaꞌ luhua desde nú uquixiea setea liꞌihua, xne liꞌá nzua cuna liꞌihua.
26814	JHN 16:19	Nu uriꞌi Jesuse beyaꞌ nú niarquiꞌ beella nedichiaꞌ beella lunu bedichiaꞌ nú uninu lubeella: ―¿Rnedichiaꞌhua lu saꞌhua lunú unia, lleꞌnatsia la lañiaꞌhua liꞌá nu cheelá lleꞌnatsia lañiꞌ zecaꞌhua liꞌá la?
26828	JHN 16:33	Rnia ye bee nucuaꞌ luhua para nú equie cuendaꞌe ñia tsu arquiꞌhua. Liꞌihua nehuana zecahua lu iliulabe, pero la lliquihua xne liꞌá uriꞌila ana luye nú nuꞌ lu iliulabe.
26882	JHN 18:28	Chenu uyeꞌe lu yuu uchiuꞌunu beei Jesuse niꞌi Caifás nu unguyaꞌ beei liꞌinu ruꞌu palacioꞌ gobernador Roma. Nu bee bene Israel cuaꞌ né chuꞌu beei liñi palacio zeꞌe, xne para liꞌibeei tunu achuꞌu beei zeꞌe lixiu naa beei lu Diose, nu che lecaꞌ modo acubeei exe baxcu.
26922	JHN 19:28	Chenu ulaxu nú uni Jesuse scua lunú nediyaꞌlaꞌnu nú uyalula yeene tucu nú riala nú acane. Nu para nú yalu tucu nú nequie lu ichiꞌ Stichiaꞌ Diose, che uninu: ―Rebichia.
26940	JHN 20:4	Rucu beella xuxuꞌu beella nzuella pero stuculla másela xexuꞌu nza che rlutilálla uriñalla ruꞌu eluhua zeꞌe luquela Pedro.
26952	JHN 20:16	Nu uni Jesuse lulla: ―¡María! Che ubelletalla nu unilla lunu bedichiaꞌ hebreo: ―¡Rabuni! ―nu ni bedichiaꞌ cuaꞌ: Maestro.
27028	ACT 2:10	cuna bee bene Frigia, cuna bee bene Panfilia, cuna bee bene Egipto, cuna bee bene lu iliu Africa, axu Cirene. Nu cuna bee bene Roma, chiucu chuna bee bene Roma quieꞌ ungula lu iliu Israel nu nucuaꞌa beei Roma. Leꞌca chiucu chuna beei neca mero bene Roma enu nzeli arquiꞌ tucu nú nzeli arquiꞌ bee bene Israel Diose.
27067	ACT 3:2	Ruꞌu puerta indu quieꞌ, sucu tucu niyu enu lacalitse hasta nú ungulalla. Ye bichia ruyaꞌ bee bene liꞌilla nu sucuꞌ beella bene quieꞌ ruꞌu puerta nú lee ñia rnaa para nú rnacuꞌlla caridá lubee bene enu riuꞌu liñi indu zeꞌe.
27092	ACT 4:1	Rniscaꞌlá Pedro cuna Juan lubee bene zeꞌe, chenu uriña bee uleꞌya cuna bee bene enu rnibiyaꞌ lubee sundado enu rriucu ruꞌu Indu llene Jerusalén, cuna texcuaꞌa bee saduceo.
27157	ACT 5:29	Nu ucuaqui Pedro cuna beelá bee apóstol lubeella: ―Rluti rquiꞌña nú zucuꞌxuru nú rni Diose cheela zucuꞌru nú rni bee bene.
27228	ACT 7:43	Pero aꞌla uluꞌcuhua ulaꞌna lu dioseꞌhua enu lee Moloc enu nzucu liñi carpa nú necacheꞌ iti, cuna belaa dioseꞌ Renfán, bee diose enu leꞌca liꞌihua urecheꞌhua para nú luꞌcuhua ulaꞌna lu. Enzeꞌe xeꞌla liꞌihua elu máse istu Babilonia.
27241	ACT 7:56	Chequie uni Esteban: ―¡Ubiꞌyacuruhua! Rlañia nú naꞌla liñibe, nu leꞌca rlañia nú nzulí Jesucristo cueꞌtse Diose chúbee.
27332	ACT 10:4	Nu ubiꞌyalilla lu ángele zeꞌe nu chiquiꞌ ulliquilla, nu unilla: ―¿Rnilu lua la Detá? Nu uni ángele zeꞌe lulla: ―Diose ubeneꞌlaꞌ stichiaꞌlu, nu ulañiꞌlaꞌnu xa rriꞌilu elietsa lubee bene enu seca elitsi.
27347	ACT 10:19	Rriꞌiscaꞌ Pedro elliebacuꞌ lunú ulañiꞌlla scua, che uni Espíritu Santo lulla: ―Chuna bene rlaꞌna liꞌilu.
27372	ACT 10:44	Rniscaꞌlá Pedro lubee bene zeꞌe, chenu tuꞌnatsia uyucu arquiꞌbeella Espíritu Santo.
27419	ACT 12:13	Chenu uchichi Pedro ruꞌu puerta, che uchiuꞌu tucu unaꞌa eꞌne enu lee Rode para nú nzebiꞌyanchu ti enu xichi zeꞌe.
27421	ACT 12:15	Nu uni bee bene zeꞌe lunchu: ―¡Ichia lucu secalu! Pero chiuca utsutaꞌ Rode nú neli nú necalla Pedro. Nu uni beella lunchu: ―Laca liꞌilla, talabese neca nucuaꞌ ángele enu rriꞌi elietsa lulla.
27477	ACT 13:46	Chequie sin nú lliqui Pablo cuna Bernabé ucuaqui beella lubeei nú unibeella: ―Rlutilá luhua riala nú dixiuleꞌeru bedichiaꞌ nzeꞌcaꞌ Diose, liꞌihua enu neca bee bene Israel, pero nee la niarquiꞌhua nú yeneꞌhuane, chequie leꞌcatsia liꞌihua rriꞌihua nú la yalahua elu nehuañi nú leca xunga laxu lu Diose. Nu nee nze tixiuleꞌeru bedichiaꞌ nzeꞌca cuaꞌ lubee bene enu la neca bee bene Israel.
27561	ACT 16:9	Rulaꞌ zeꞌe ulleꞌca Pablo xi neca nú uni xcalaꞌlla, nú ulañiꞌlla tucu bene enu nzeꞌta enza Macedonia nu nzulílla sequieella lu Pablo nú unilla: “Yeꞌtalu enza Macedonia para nú riꞌilu elietsa luru.”
27564	ACT 16:12	Zeꞌe uchiuꞌuru nu nzaꞌaru eyeche Filipos, eyeche quieꞌ neca nú máse neca equie enza Macedonia. Pero Roma rnibiyaꞌ lu eyeche quieꞌ, zeꞌe uyaꞌnaru chiucu chuna bichia.
27573	ACT 16:21	nu seteꞌ beei bee custumbre nú leca modo riaꞌahua nu la riaꞌahua bee custumbre cuaꞌ, xne necaꞌahua bee bene Roma.
27589	ACT 16:37	Che uni Pablo lubee sundado zeꞌe: ―Liꞌiru necaru mero bene Roma nu udiñi beella liꞌiru ante lu ye bee bene, nu niꞌtemeꞌ la zela beella nú aniru lubeella xa necane, nu uduꞌ beella liꞌiru niꞌcuꞌ. Nu nee niarquiꞌbeella nú laꞌa beella liꞌiru aꞌchiꞌtsia. ¡Leca modoe! Yeꞌta liꞌi eꞌcu beella laꞌa beella liꞌiru.
27590	ACT 16:38	Nu uya bee sundado zeꞌe udixiuleꞌe bee nucuaꞌ lubee usticia, chequie ulliqui bee usticia zeꞌe chenu ubeneꞌ beella nú neca Pablo cuna Silas bene Roma.
27628	ACT 18:2	Zeꞌe ullaꞌcalla tucu bene Israel enu lee Aquila, lachi bene quieꞌ lee Ponto. Aquila quieꞌ cuna unaꞌlla Priscila apenatsia uriña beella nú nzeꞌta beella enza Italia, xne unibiyaꞌ arre Claudio nú uchiuꞌu ye bee bene Israel Roma. Che uyabiꞌya Pablo liꞌibeella,
27675	ACT 19:21	Chenu ulaxu nú unga bee nucuaꞌ, uduꞌ arquiꞌ Pablo nú challa lu iliu Macedonia cuna lu iliu Acaya, cuna nú nze riꞌilla seidu biajiꞌlla hasta eyeche Jerusalén. Leꞌca unilla nú chenu uyalalla eyeche Jerusalén che leꞌca challa Roma.
27733	ACT 21:1	Zeꞌe utsaꞌnaru liꞌibeella, nu uyuꞌuru liñi barco nu nzaꞌalíru enza lee Cos tucu yuu nú netse lu inzatuꞌ, nu stucu bichia uriñaru elu lee Rodas lu stucu yuu nú netse lu inzatuꞌ, nu zeꞌe chu nzaꞌaru eyeche nú lee Pátara.
27797	ACT 22:25	Pero chenu ullicaꞌcuu beei Pablo para nú zeteꞌcheꞌbeei liꞌilla, unilla lu capitañi enu nzu zeꞌe: ―¿Xieꞌ nuꞌ modo zeteꞌcheꞌhua tucu bene Roma, sin nú chiuꞌulue lunú xi uriꞌilla la?
27798	ACT 22:26	Chenu ubeneꞌ capitañi zeꞌe nucuaꞌ, che uyatixiuleꞌella lu comandante zeꞌe nu unilla lulla: ―Ubiꞌyacuru xa riꞌinulu benecuaꞌ, xne bene Roma benecuaꞌ.