23234	MAT 1:21	Nu enduꞌ enu acanuulla hualeelunu Jesuse. Xne equie cuendaꞌnu tsilaꞌa ye bee bene lachinu Israel lu stula beella.
23240	MAT 2:2	che unidichiaꞌ beella: ―¿Cá nchiucuꞌ arreꞌ bee bene Israel enu ungula? Xne desde lachiru ulañiꞌlaꞌru nú uliñi belaꞌnu, enzeꞌe nzelaru para nú luꞌcuru ulaꞌna lunu.
23244	MAT 2:6	Liꞌilu eyeche Belén nú nchiucuꞌ lu iliu Judea, nu liꞌilu la necalu tucu bee eyeche nú mase lleꞌna nú nchiucuꞌ lu ye bee eyeche llene lu iliu Judea. Xne lulu chiuꞌu tucu bene enu nibiyaꞌ, nu liꞌilla biꞌyalla bee bene Israel enu neca bee benea.
23251	MAT 2:13	Chenu nziala bee mago zeꞌe lachi beella, che ulubeꞌlu tucu ángeleꞌ Diose lu xcalaꞌ José, nu uni ángele zeꞌe lulla: ―Uzetee, uyaꞌ enduꞌ cuaꞌ cuna naꞌnu nu uquiahua Egipto, zeꞌe cuaꞌahua hasta nú ixiuleꞌa luhua. Xne cuaꞌna Herodes enduꞌcuaꞌ para nú utilla liꞌinu.
23265	MAT 3:4	Xucu Juan necacheꞌe ichia tsuꞌ camello, nu sinchiu nú riuꞌu xlaꞌculla necacheꞌ iti, nu elubacu nú udaculla neca xeꞌchiu cuna lliña dañi.
23284	MAT 4:6	nu uni lunu: ―Tunu neli nú necalu lliꞌñi Diose, utsiꞌqui liꞌilu caꞌa hasta lu yuu, xne lu ichiꞌ Stichiaꞌ Diose rni: Xeꞌla Diose bee ángeleꞌnu para nú riꞌi ucu liꞌilu. Nu naꞌtse beenu liꞌilu para nú la tiꞌqui bee quiee cuchiuꞌlu.
23332	MAT 5:29	’Tunu rriꞌi iꞌcululu chube nú rriꞌilu dula, neca nzeꞌcalá nú uhuane nu utsiꞌquii istu. Xne neca nzeꞌcalá nú nitilu tucutsia iꞌcululu luquela nú diquinecalu chálu ebila.
23333	MAT 5:30	Nu tunu rriꞌi yalu chube nú rriꞌilu dula, uchieꞌcue nu utsiꞌquii istu. Xne neca nzeꞌcalá nú nitilu techu yalu luquela nú cha diquilu ebila.
23349	MAT 5:46	Xne tunu secatsiahua bee bene enu seca liꞌihua, ¿xi atiꞌhua lu Diose che? Xne hasta bee bene enu rriꞌi cobre equie impuesto rriꞌi scua.
23352	MAT 6:1	’Ubiꞌyahua nu la riꞌihua lunú neca nzeꞌca lubee bene para nú lañiꞌtsia beei lunú xa rriꞌihua. Xne tunu rriꞌihua scua, paꞌhua Diose enu nzucu liñibe lecaꞌ xi liquiꞌnu luhua.
23356	MAT 6:5	’Nu chenu nacuꞌhua lu Diose, la riꞌihua xi rriꞌi bee bene enu nequichiaꞌ, nú riuꞌ arquiꞌbeella nú nzulí beella rnacuꞌ beella lu Diose liñi bee indu, nu bee squiñia inziu para nú lañiꞌ bee bene lunú rriꞌi beella. Xne liꞌá nia luhua lunú rriꞌi beella scua nucuaꞌ neca premioꞌ beella.
23358	MAT 6:7	’Chenu rnacuꞌlu lu Diose, la nilu bee bedichiaꞌ nú la zibiꞌ huaxi bese, xi rriꞌi bee bene enu la chulu Stichiaꞌ Diose. Xne seca beella nú tunu huaxi bese rni beella tucu bedichiaꞌ che máse riꞌi caso Diose nú rni beella.
23364	MAT 6:13	La zelalu nú riꞌiru dula, sino que uriꞌi elietsa luru para nú la riꞌi ye beenú necha neca ana luru. Xne liꞌilu rnibiyaꞌlu, nu liꞌilu rluꞌculu poder, poder nú leca xunga laxu. Amén.
23365	MAT 6:14	’Xne tunu rriꞌihua perdona bee bene enu rriꞌi nú necha neca luhua, leꞌca scua Paꞌahua Diose enu nzucu liñibe riꞌi perdona liꞌihua;
23372	MAT 6:21	Xne lu eluxeneꞌhua zeꞌe nzu arquiꞌhua.
23379	MAT 6:28	’¿Xinu nzenu arquiꞌhua lunú xi utuhua? Ubiꞌyacuruhua xa rruꞌcu bee quie dañi, la riꞌi bee riñaꞌ nu la recheꞌe xi utune,
23382	MAT 6:31	Enzeꞌe, la chenuaꞌ arquiꞌhua nú rnihua: “¿Xi daꞌcuahua nee? nu ¿xi diyaꞌahua? nu ¿xi utuꞌahua?”
23383	MAT 6:32	Xne bee bene enu la chili arquiꞌ Diose nzenu arquiꞌ ye bee nucuaꞌ, pero liꞌihua rluꞌcuhua tucu paꞌhua liñibe, nu liꞌinu nediyaꞌ nzeꞌcanu nú xi seca laꞌchaꞌhua.
23385	MAT 6:34	La chenu arquiꞌhua lu cuendaꞌ bichia yeꞌe, xne ye yeꞌe nuꞌ xi nzenu arquiꞌ bee bene. Xne cada bichia nuꞌ xi chenu arquiꞌ bene.
23387	MAT 7:2	Xne tucu nú seꞌtahua bee bene, leꞌca scua zeꞌta bee bene liꞌihua, nu tucu nú rriꞌinuhua bee bene leꞌca esquie riꞌinu bee bene liꞌihua.
23391	MAT 7:6	’La riꞌihua juersa bee bene enu la niarquiꞌ riꞌi caso lunú neca cuendaꞌ Diose, para nú lecaxi riꞌinu beei liꞌihua. Xne tunu riꞌihua juersa beei, neca nucuaꞌ xi neca chenu siꞌqui bene tucu nú necachi neca lu nicu. Leꞌca la riꞌihua juersa bee enu la yuꞌ arquiꞌ lunú neca cuendaꞌ Diose. Xne tunu riꞌihua juersa beei, neca nucuaꞌ xi neca chenu rduꞌ bene tucu nú huaxi seca lu cuchi nu tse tsiaí equiee.
23393	MAT 7:8	Xne bene enu rnacuꞌ nú rnacuꞌ lunu yucu nzeꞌene, nu bene enu rlaꞌna Diose llelaꞌ nzeꞌe liꞌinu, nu bene enu rnacuꞌ nu sequie lunu, riꞌi casonu nzeꞌe.
23394	MAT 7:9	’¿Xieꞌ nuꞌ ta tucuhua enu deteꞌ quiee acu enduꞌ chenu nacuꞌ enduꞌhua pa acu la?
23397	MAT 7:12	’Uriꞌihua lubee bene tucu nú niarquiꞌhua nú riꞌibeella luhua. Xne scua rnibiyaꞌ leyꞌ Diose cuna ye beenú uquieꞌe bee profetaꞌnu.
23398	MAT 7:13	’Uyuꞌuhua ruꞌu puerta nú nuxuꞌ neca. Xne ruꞌu puerta nú llene neca, nu inziu nú llene neca, nucuaꞌ neca nú ruyaꞌ liꞌibee bene lu inziu nú necha neca, nu huaxi bee bene nza inziu cuaꞌ.
23439	MAT 8:25	Che uya cuaꞌñi bee beneꞌnu liꞌinu nu uni beella lunu: ―¡Detá, utsilaꞌa liaꞌahua! ¡Xne nze chatseꞌlaꞌahua lu inza!
23440	MAT 8:26	Che ucuaquinu lubeella: ―¿Xiquie nú chiquiꞌ xiquihua? ¡Xinu lleꞌnatsia nzeli arquiꞌhua liꞌá! Chequie uzetenu nu unibiyaꞌnu nú acaxe bii cuna inzatuꞌ nu hora zeꞌe ungaxeli ye bee nucuaꞌ
23443	MAT 8:29	Nu juerte urixialibeei nú unibeei: ―¿Xinu riꞌchialu liꞌiru Jesuse Lliꞌñi Diose? ¿Xieꞌ uriñalu caꞌa para nú riꞌilu nú zecaru castiyaꞌru chenu lascaꞌ riña tiembu nú acane scua la?
23452	MAT 9:4	Nu lunú nediyaꞌlaꞌ Jesuse xi rriꞌi beella elliebacuꞌ, uninu lubeella: ―¿Xinu necha rriꞌihua elliebacuꞌ?
23459	MAT 9:11	Pero chenu ulañiꞌ bee fariseo nucuaꞌ, unidichiaꞌ beei lubee beneꞌnu: ―¿Xinu racunuu maestroꞌhua bee bene enu rriꞌi cubre impuesto nu cuna bee bene enu rluꞌcu dula?
23461	MAT 9:13	Uquiahua nu zeꞌtehua xi rni lu ichiꞌ Stichiaꞌ Diose elu rni: “Niarquia nú huaꞌa arquiꞌhua bee bene, luguare nú rliquiꞌhua nañi uꞌna lua.” Xne lá yelaa lubee bene enu la luꞌcu dula sino que uriña lubee bene enu rluꞌcu dula para nú cheꞌe arquiꞌbeei lu stula beei.
23462	MAT 9:14	Chequie uriña bee beneꞌ Juan Bautista lu Jesuse nu unidichiaꞌ beella lunu: ―¿Xiquie nú liꞌiru cuna bee fariseo, la daꞌcuru huaxi bese equie nú rluꞌcuru ulaꞌna lu Diose, nu bee beneꞌlu la riꞌi scua?
23501	MAT 10:15	Xne liꞌá nia luhua nu chenu hualu Diose lu cuendaꞌ yebee bene, masescaꞌla zeca bee bene eyeche cuaꞌ castiya luquela bee bene eyeche Sodoma cuna Gomorra.
23506	MAT 10:20	Xne laca liꞌihua enu ni. Espíritu Santoꞌ Diose Pa liñibe neca enu liquiꞌ bedichiaꞌ nú nihua.
23512	MAT 10:26	’Enzeꞌe la lliquihua bee bene. Xne niꞌ tucu beenú aꞌchiꞌ neca la yaꞌnane scuatsia sin nú acabiyae, riña bichia nu acache bee nucuaꞌ, leꞌca niꞌ tucu beenú aꞌchi neca rriꞌi bee bene la yaꞌnane scuatsia, riña bichia nú acabiya yebee nucuaꞌ.
23517	MAT 10:31	Enzeꞌe la lliquihua. Xne mase secahua luquela nú seca huaxi bee iñi.
23536	MAT 11:8	Urre ¿xa naa bene enu uya biꞌyahua? ¿Xieꞌ uya biꞌyahua tucu bene enu nutu laquie fiñu la? Liꞌihua nediyaꞌhua nú bee bene enu rutu laquie fiñu liñi palacio nucuaꞌa beella.
23538	MAT 11:10	Equie cuendaꞌ Juan quieꞌ rni lu ichiꞌ Stichiaꞌ Diose elu rni: Xeꞌlaa tucu benea cha rluti lulu, para nú recheꞌlla inziuꞌlu.
23544	MAT 11:16	’¿Xa nia luhua nú xa neca bee bene enu nehuañi lu iliulabe quieꞌ nee? Liꞌá nia luhua nú neca beei xi neca bee enduꞌ enu rcuaꞌa ruꞌu iꞌya rita nu rixiali beei lusaꞌ beei, nú rnibeei:
23549	MAT 11:21	―¡Cueꞌhua bee bene Corazín! ¡Cueꞌhua bee bene Betsaida! Xne tunu eyeche Tiro cuna eyeche Sidón a aca bee milagro nú unga lachihua, xi tiembula a tsanaꞌ arquiꞌ bee bene zeꞌe stula beei, nu leꞌca a utu beei laquie natsa nu a tiqui beei tii equie beei, xi neca tucu seña nú lubeꞌ nú nehuana nzu arquiꞌbeei.
23551	MAT 11:23	Nu liꞌihua bee bene eyeche Capernaum, ¿la zaꞌ arquiꞌhua nú riala chuꞌuhua liñibe? ¡Xne liꞌihua riala chuꞌuhua hasta elu mase aquié rquiꞌ ebila! Xne tunu eyeche Sodoma a aca bee milagro nú unga lachihua, che pianu hasta bee bichia quieꞌ nchiucuꞌscaꞌ bee eyeche cuaꞌ che.
23558	MAT 11:30	Xne laca neriñaꞌ nú zucuꞌhua stichiaꞌa nu leꞌca laca neriñaꞌ nú riꞌihua lunú niarquia.
23561	MAT 12:3	Nu ucuaqui Jesuse lubeella: ―¿Xieꞌ lascaꞌ ulahua lu ichiꞌ Stichiaꞌ Diose elu rni nú xa uriꞌi David cuna bee bene enu nulla tucu bese chenu uliaꞌnaꞌ beella la?
23568	MAT 12:10	Nu liñi indu zeꞌe nzucu tucu niyu enu ubichicuꞌ techu ya, nu lunú rcuaꞌna bee fariseo nuxi taꞌquiya beei liꞌinu che unedichiaꞌ beei lunu: ―¿Xieꞌ nuꞌ modo nú riyecalu tucu bene enu riti bichia nú sulachi bee bene la?
23581	MAT 12:23	Chequie ye bee bene zeꞌe chiquiꞌ nzenu arquiꞌbeei nú unibeei: ―¿Xieꞌ laca benecuaꞌ enu necadichiaꞌ nú nzeꞌta lu familiaꞌ David la?
23584	MAT 12:26	Leꞌca scua tunu rliunu bezeꞌlu leꞌcatsia liꞌi. ¿Xneca modo nú diꞌya elurnibiyaꞌ nú rluꞌcui che?
23586	MAT 12:28	Xne liꞌá rlua bee benechiquiꞌ arquiꞌ bee bene equie cuendaꞌ Espíritu Santoꞌ Diose, nucuaꞌ rlubeꞌ nú uriñala nú rnibiyaꞌ Diose luhua.
23587	MAT 12:29	’Xne leca modo nú chuꞌu bene niꞌi tucu bene enu naaqui para nú cachiꞌi steneꞌlla, tunu la llicaꞌ cuxuilla. Che scua nuꞌ modo nú cachiꞌi steneꞌlla.
23592	MAT 12:34	¡Liꞌisiꞌhua netsiñahua xi netsiña bee beꞌla! ¿Xa modo nú nihua bee bedichiaꞌ nzeꞌca chenu liꞌihua necha necahua? Bee bedichiaꞌ nú nuꞌ arquiꞌ bee bene enzeꞌe rni bene.
23595	MAT 12:37	Xne equie cuendaꞌ stichiaꞌ bene, scua rlubeꞌ tunu yala nú zecalla castiya nú deteꞌ Diose lulla, nu tunu la yala zecalla castiya.
23598	MAT 12:40	Xne tucu nú ullutse Jonás chuna bichia cuna chuna rulaꞌ xlaꞌcu beꞌnaꞌ, leꞌca scua liꞌá Bene enu uxeꞌla Diose llutsea liñi yuu chuna bichia nu chuna rulaꞌ.
23600	MAT 12:42	Nu bichia chenu laxu iliulabe, chenu hualu Diose lucuendaꞌ bee bene, chequie reina eyeche nú lee Sabá huañi zecalla nu nilla nú riala bee bene enu nucuaꞌa nee castiya nú deteꞌ Diose. Xne liꞌilla nzeꞌtalla enza mase istu, nu ubeꞌtalla para nú ubeneꞌlla lunú reca arre Salomón, nu liꞌá Jesuse enu nzu cuna liꞌihua, másela neca equiea luquela arre Salomón.
23608	MAT 12:50	Xne titse bee bene enu rriꞌi lunú niarquiꞌ Diose Pa liñibe, bee nzeꞌe neca bee bichia, cuna bee zanaa nu naa.
23620	MAT 13:12	Xne bee bene enu rriꞌi beyaꞌ Stichiaꞌ Diose, liquiꞌlánu nú riꞌilá beella beyaꞌ stichiaꞌnu, pero bee bene enu lleꞌnatsia rriꞌi beyaꞌ stichiaꞌnu, nu la laꞌnalla nú riꞌilálla beyaꞌ stichiaꞌnu hasta lu lleꞌnatsia nú rriꞌilla beyaꞌ la riaꞌlla beyaꞌ nucuaꞌ.
23623	MAT 13:15	Xne chiquiꞌ unga nziti arquiꞌbeei, nu rriꞌi beei xi neca nú la lañiꞌbeei, nu xi neca nú nenguataꞌ beei para nú la lañiꞌbeei, nu la yeneꞌ beei nu la riꞌi beei beyaꞌ, xne la zelaꞌ beei yeꞌta beei cuna liꞌá, para nú riꞌá perdona stula beei.
23625	MAT 13:17	Xne liꞌá nia luhua nú huaxi bee profeta nu huaxi bee bene enu uhuañi nzeꞌca uniarquiꞌ beella lañiꞌ beella lunú rlañiꞌhua. Nu né lañiꞌ beella nucuaꞌ. Leꞌca uniarquiꞌ beella yeneꞌ beellla lunú rieneꞌhua, pero né yeneꞌ beellae.
23663	MAT 13:55	¿Xieꞌ lanu llianaꞌ bene enu rriꞌi riñaꞌ ruꞌu bangu nucuaꞌ, nu lanu María neca naꞌ nucuaꞌ la? ¿Nu lanu bee bichi nucuaꞌ neca Jacobo, José, Simón nu Judas la?
23697	MAT 14:31	Hora zeꞌe unaꞌtse Jesuse yalla, nu uninu lulla: ―¡Xinu lleꞌnatsia nzeli arquiꞌlu liꞌá! ¿Xiquie nú uzaꞌ arquiꞌlu?
23704	MAT 15:2	―¿Xiquie núla zucuꞌ bee beneꞌlu custumbre nú utsaꞌna bee beneꞌahua enu udetela? ¿Xiquie núla naa bee beneꞌlu chenu racu beei tucu nú neca custumbre?
23706	MAT 15:4	Xne uni Diose: “Luꞌcu ulaꞌna lu paꞌlu cuna lu naꞌlu”, nu “Enu riquichiꞌquiꞌ paꞌ cuna naꞌ rquiꞌña nú ati nzeꞌe.”
23718	MAT 15:16	Chequie uni Jesuse: ―¿Xieꞌ leꞌca nuuhua lá riꞌihua beyaꞌ lunú unia la?
23719	MAT 15:17	¿Xieꞌ la riꞌihua beyaꞌ nú ye bee elubacu nú racu bee bene rlacae xlaꞌcu bee bene, nu che chu xiuꞌu zecae la?
23721	MAT 15:19	Xne liñi arquiꞌ bene xiuꞌu nú necha rriꞌi bene elliebacuꞌ, nú ruuti bene saꞌbene, nú rluꞌcu niyu stucu unaꞌa, urre rluꞌcu unaꞌa stucu niyu, nú rriꞌi bene eluhuexe, nú rriꞌi bene eluhuanaꞌ, nú rni bene eluquichiaꞌ, nú riquichiꞌquiꞌ bene saꞌ bene.
23736	MAT 15:34	Nu unedichiaꞌ Jesuse lubeella, nú uninu: ―¿Xala pa rluꞌcuhua? Nu ucuaqui beella lunu: ―Rluꞌcuru achine cuna chiucu chuna bee bela.
23744	MAT 16:3	Nu bee zilaꞌ chenu rlañiꞌhua nú neluu rnaa liñibe nu nuꞌ xcabe che rnihua: “Necha tsu bichia quieꞌ, rriꞌihua beyaꞌ xa neca bee seña liñibe.” ¿Xiquie nú la riꞌihua beyaꞌ xa neca lunú reca nee?
23749	MAT 16:8	Pero uriꞌi Jesuse beyaꞌ nú unibeella lu saꞌbeella, nu uninu lubeella: ―¿Xinu rnihua nú la luꞌcuhua pá? ¡Xinu lleꞌnatsia nzeli arquiꞌhua liꞌá!
23750	MAT 16:9	¿Xieꞌ lascaꞌ riꞌihua beyaꞌ, nu la elluꞌcu arquiꞌhua chenu udetea ayuꞌtsia pá udacu ayuꞌ mili bee bene la? ¿Nu se xala llume pá nú uzucu subrascaꞌ uquietesaꞌhua?
23752	MAT 16:11	Xiquie nú lá riꞌihua beyaꞌ nú lá nia luhua lu cuendaꞌ pá, liꞌá rnia luhua nú biꞌyahua liꞌihua lu levaduraꞌ bee fariseo cuna bee saduceo.
23764	MAT 16:23	Che ubelleta Jesuse nu uninu lu Pedro: ―¡Ullunaꞌ lua bezeꞌlu, nu la riꞌixiꞌilu lua! Xne elliebacuꞌ nú rriꞌilu la yeꞌta nucuaꞌ lu Diose, rriꞌitsialu elliebacuꞌ tucu nú rriꞌi bee bene iliulabe elliebacuꞌ.
23766	MAT 16:25	Xne bee bene enu masela niarquiꞌ nú huañi lu iliulabequieꞌ enta bichia nú nitilu nucuaꞌ, pero bee bene enu ati equie nú neca beei bee benea, luꞌcu bee nzeꞌe elunehuañi nú leca xunga laxu lu Diose.
23767	MAT 16:26	¿Lecaxi zibiꞌ nú riꞌi bee bene ana ye nú nuꞌ lu iliulabequieꞌ, tunu nitilulla ante Diose? Xne leca modo tsibene elunehuañiꞌ bene liñibe.
23779	MAT 17:10	Chequie unedichiaꞌ bee beneꞌnu lunu nú uni beella: ―¿Xiquie nú rni bee ulaxcuela enu reca ley nú rluti Elías rquiꞌña nú riña?
23788	MAT 17:19	Chenu nucuaꞌa liꞌitsia Jesuse cuna bee beneꞌnu unedichiaꞌ beella lunu nú uni beella: ―¿Xiquie nú né acaru ahuaru benechiquiꞌ arquiꞌ enduꞌ zeꞌe?
23789	MAT 17:20	Che uni Jesuse lubeella: ―Xne lleꞌnatsia nzeli arquiꞌhua Liꞌá. Liꞌá nia luhua nú tunu neli nzeli arquiꞌhua masia xi lleꞌna ebichi mestasa, neca lunú nzeli arquiꞌhua Liꞌá, nuꞌ modo nihua lu dañiquieꞌ: “Ullunaꞌ caꞌa nu uquia stucu luhuare”; nu zucuꞌ dañi nú nihua. Lecaxi aca neriñaꞌ para liꞌihua tunu neli nzeli arquiꞌhua.
23794	MAT 17:25	Che ucuaqui Pedro lubeei: ―Aahuaꞌ rixiunue. Nu chenu uyuꞌu Pedro liñi niꞌi elu nzu Jesuse, rlutilánu uninu lu Pedro: ―¿Xa nilu, Simón? ¿Ti riala ixiu impuesto lubee arre iliulabequieꞌ: bee bene lachilla la, o bee bene rene la?
23807	MAT 18:11	Xne Liꞌá Bene enu uxeꞌla Diose uriña para nú tsialaꞌá bee bene enu nza inziu nú necha neca.
23808	MAT 18:12	’¿Neca xi neca nú tucu bene rluꞌcu tucu ayuꞌu sanchi, nu nitilla tucuí? ¿Xieꞌ la tsaꞌnascaꞌlla noventa y nueve bee sanchi zeꞌe dañi nu che cuaꞌnalla sanchi enu uniti la?
23816	MAT 18:20	Xne elu rieteꞌsaꞌ chiucu chuna bee bene equie cuendaꞌ liꞌá, zeꞌe nzua cuna liꞌibeella.
23835	MAT 19:4	Chequie ucuaqui Jesuse nú uninu lubeei: ―¿Xieꞌ lasca ulahua lu ichiꞌ Stichiaꞌ Diose elu rni, nú liꞌinu enu urecheꞌ bee bene desde nú uquixie iliulabe, “urecheꞌnu niyu cuna unaꞌa la”?
23838	MAT 19:7	Che uni bee fariseo lu Jesuse: ―¿Xiquie nú unibiyaꞌ Moisés nú nuꞌ modo leꞌe bene unaꞌa bene, tunu acacheꞌ tucu ichiꞌ elu rni nú leꞌe saꞌlla?
23843	MAT 19:12	Xne nuꞌ bee bene enu desde nú ungula lá ala para nú chia, leꞌca nuꞌ bee bene enu la chia equie nú reca remediolla, nu nuꞌ bee bene enu la chia lunú rriꞌilla elliebacuꞌ nú mejora ixiuleꞌella Stichiaꞌ Diose luhuare nú chialla. Enu riquiꞌ núla chia, la chia nzeꞌe.
23848	MAT 19:17	Nu uni Jesuse lui: ―¿Xinú rnilu nú neca bene nzeꞌca? Leca niꞌ tucu bene nzeꞌca tucutsia Diose neca bene nzeꞌca. Pero tunu niarquiꞌlu luꞌculu elunehuañi nú leca xunga laxu liñibe, uzuꞌcuꞌ nú rni bee mandamiento.
23858	MAT 19:27	Chequie uni Pedro lu Jesuse: ―Liꞌiru utsaꞌnaru ye beenú rluꞌcuru para nú nzela quieeru liꞌilu. ¿Xi atiꞌru, lu cuendaꞌ nucuaꞌ che?
23867	MAT 20:6	Nu tucu rquie ayuꞌ uche, uchiuꞌu zecaꞌlalla nzalla ruꞌu iꞌya nu uchuꞌulla stexcuaꞌa bee bene enu la luꞌcu riñaꞌ, nu unilla lubeei: “¿Xiquie nú debichia nucuaꞌahua caꞌa nu la riꞌihua riñaꞌ?”
23868	MAT 20:7	Che uni bee bene zeꞌe lulla: “Xne lá llelaꞌru riñaꞌ riꞌiru.” Che unilla lubeei: “Uquia riꞌihua riñaꞌ lu yuua, elu nuꞌ uva nu ixiucahua lunú riala yaxuhua.”
23874	MAT 20:13	Chequie ucuaqui patrón zeꞌe, nú unilla lu tucu beei: “Amigo, lecaxi nú necha neca uriꞌá lulu. Xne liꞌá unixua lulu nú calu ixiualu tebichia.
23875	MAT 20:14	Enzeꞌe uyucu dimiꞌlu nu yaalu. Xne liꞌá niarquia nú ixiua bene enu uche uyuꞌu lu riñaa tucu nú udixiua liꞌilu.
23876	MAT 20:15	¿Xieꞌ leca modo riꞌá lunú niarquia cuna dimiala?, urre ¿Xieꞌ ria arquiꞌlu nú rriꞌi nzeꞌca la?”
23877	MAT 20:16	Scua necane, xne bee bene enu leca tineca nee aca neca equie bee nzeꞌe, nu bee bene enu neca equie nee la aca neca equie bee nzeꞌe bichia zeꞌe. Xne huaxi bee bene nezeneꞌ lu inziuꞌ Diose pero la huaxi bee bene enu chenala inziuꞌnu.
23882	MAT 20:21	Che unedichiaꞌ Jesuse lulla: ―¿Xi niarquiꞌlu? Nu unilla lunu: ―Chenu nibiyaꞌlu niarquia nú zucu tucu endua cueꞌtselu chúbe, nu stucui zucu cueꞌtselu chúbeca.
23883	MAT 20:22	Pero uni Jesuse lubeella: ―La riꞌihua beyaꞌ lunú rnacuꞌhua. ¿Xieꞌ nuꞌ modo nú nehuana zecahua tucu nú nehuana zecaa la? ¿Xieꞌ nuꞌ modo riquiꞌhua zecahua lunú riala zecaa la? Che uni beella lunu: ―Aahuaꞌ, riquiꞌru.
23893	MAT 20:32	Chequie utsuxe Jesuse nu ubixianu rucu bee bene enu la yeꞌelu zeꞌe nu uninu lubeei: ―¿Xi niarquiꞌhua nú riꞌá luhua?
23915	MAT 21:20	Chenu ulañiꞌ bee beneꞌ Jesuse nucuaꞌ, chiquiꞌ uyanu arquiꞌbeella nu unidichiaꞌ beella lu Jesuse: ―¿Xiquie nú chu ubichi aca higo cuaꞌ?
23920	MAT 21:25	¿Ti uxeꞌla Juan nú rinzalla bee bene che? ¿Diose uxeꞌlalla la o bee bene uxeꞌlalla la? Che unibeei lusaꞌbeei, nú unibeei: ―Tunu niaꞌahua nú Diose uxeꞌla Juan Bautista, che ni nucuaꞌ luaꞌahua: “¿Xiquie nú né chili arquiꞌhua nú unilla che?”
23923	MAT 21:28	Nu uni Jesuse lubeei: ―¿Xa rriꞌihua elliebacuꞌ lunú nia luhua nee? Tucu bene uluꞌcu chiucu llianaꞌ, nu unilla lu tucui: “Enduꞌ, uquia riꞌi riñaꞌ lu yuua elu nuꞌ uva.”
23927	MAT 21:32	Xne ubeꞌta Juan Bautista udixiuleꞌe luhua nú xa huañihua, nu né chili arquiꞌhua nú unilla, aꞌlaquie bee bene enu rriꞌi cubre impuesto para Roma cuna bee unaꞌa huexe uchilí arquiꞌbeei nú unilla. Pero liꞌihua mase ulañiꞌhua bee nucuaꞌ, ne cheꞌe arquiꞌhua, para nú a chili arquiꞌhua nú unilla.
23937	MAT 21:42	Leꞌca uni Jesuse lubee fariseo: ―¿Xieꞌ lascaꞌ ulahua lu ichiꞌ Stichiaꞌ Diose elu rni? Quiee nú uhua uꞌna bee bene enu rrecheꞌ niꞌi, quiee quieꞌ neca nú mase uzibiꞌ ungacheꞌ niꞌi. Nucuaꞌ neca nú uriꞌi Diose, nu chiquiꞌ nzenu arquiaꞌahua lunú uriꞌinu.