23233	MAT 1:20	Tsal niꞌ rzaꞌ ladxëꞌë José ca naꞌ gunëꞌ, buluíꞌ lahuëꞌ gbaz laꞌy queëꞌ Xanruꞌ lahuëꞌ José lu yël bëchcál, len rëꞌ lëꞌ: ―José, zxiꞌn xsoëꞌ David. Cutu gádxinuꞌ siꞌu‑biꞌ María, gacbiꞌ ngul quiuꞌ, le yuꞌubiꞌ lëꞌbiꞌ biꞌi bö́nniꞌdauꞌ naꞌ ral‑laꞌ galjbiꞌ niꞌa qui yöl‑laꞌ huac queëꞌ Dios Böꞌ Laꞌy.
23235	MAT 1:22	Cni guc yúguꞌtë lë ni quië butság lë naꞌ gnëꞌ Xanruꞌ lu ruꞌë bönniꞌ bëꞌë didzaꞌ uláz queëꞌ Dios, gnëꞌ:
23236	MAT 1:23	Gul‑yutscaꞌ, tu ngul raꞌbandauꞌ, tsuꞌubiꞌ lëꞌbiꞌ biꞌidauꞌ, atiꞌ galjbiꞌ tubiꞌ biꞌi bö́nniꞌdauꞌ, Atiꞌ luꞌë labiꞌ Emanuel. Emanuel nac tu didzaꞌ hebreo le rna: “Len rëꞌu Dios.”
23240	MAT 2:2	Gulanabëꞌ bönniꞌ ni, taꞌnë́ꞌ: ―¿Gazx zoabiꞌ biꞌidauꞌ naꞌ ral‑laꞌ gna béꞌibiꞌ bunách judío, biꞌidauꞌ naꞌ ziꞌa guljbiꞌ? Catiꞌ niꞌ zoatuꞌ ga rlen gbidz bléꞌituꞌ‑baꞌ bölj yeníꞌ nac bëꞌ chguljbiꞌ, atiꞌ zaꞌtuꞌ ni quië tsej ládxiꞌtuꞌ‑biꞌ.
23243	MAT 2:5	Tëꞌ lëꞌ: ―Lu yödz Belén luyú Judea. Cni nac le buzujëꞌ lu guich bönniꞌ bëꞌë didzaꞌ uláz queëꞌ Dios le rna cni:
23246	MAT 2:8	Niꞌr bsölëꞌë lequëꞌ tsjaquëꞌ Belén. Rëꞌ lequëꞌ: ―Gul‑tséaj niꞌ, len gul‑tsajnáb dxiꞌa nacx nac queëbiꞌ biꞌidauꞌ naꞌ. Catiꞌ chbdzö́liliꞌ‑biꞌ, dudíxjöiꞌliꞌ nedaꞌ, quië tsijaꞌ caꞌ nedaꞌ, tsej ladxaꞌa‑biꞌ.
23251	MAT 2:13	Gdöd guluzë́ꞌë niꞌ bönniꞌ taꞌyejniꞌi naꞌ, niꞌr buluíꞌ lahuëꞌ tuëꞌ gbaz laꞌy queëꞌ Xanruꞌ ga naꞌ dëꞌ José lu yël bëchcál, len rëꞌ lëꞌ: ―Gyas. Bchëꞌ‑biꞌ biꞌidauꞌ ni lencaꞌ xnaꞌbiꞌ, atiꞌ bzxundj ni. Gyeaj luyú Egipto, atiꞌ ugaꞌnuꞌ niꞌ catiꞌ gyëpraꞌ liꞌ nedaꞌ yetú. Cni gunuꞌ le uguiljëꞌ‑biꞌ biꞌidauꞌ ni Herodes quië gdöddëꞌ‑biꞌ.
23253	MAT 2:15	Gulugaꞌnëꞌ niꞌ catiꞌ gutrëꞌ Herodes. Cni guc quië butság lë naꞌ gnëꞌ Xanruꞌ Dios lu ruꞌë bönniꞌ bëꞌë didzaꞌ uláz queëꞌ, gnëꞌ: “Ga nac luyú Egipto bulidzaꞌ Zxiꞌnaꞌ.”
23255	MAT 2:17	Cni guc, butság lë naꞌ gnëꞌ Jeremías, bönniꞌ bëꞌë didzaꞌ uláz queëꞌ Dios, gnëꞌ:
23257	MAT 2:19	Gdöd gutiëꞌ Herodes naꞌ, niꞌr buluíꞌ lahuëꞌ gbaz laꞌy naꞌ queëꞌ Xanruꞌ lahuëꞌ José lu yël bëchcál ga niꞌ zoëꞌ luyú Egipto, len rëꞌ lëꞌ:
23263	MAT 3:2	Juan naꞌ rnëꞌ: ―Gul‑bíꞌi ládxiꞌliꞌ, le chzoa gdxin dza duná bëꞌ luyú ni Nu naꞌ zoa yehuaꞌ yubá.
23264	MAT 3:3	Ca nac queëꞌ Juan naꞌ, buzujëꞌ lu guich Isaías, bönniꞌ bëꞌë didzaꞌ uláz queëꞌ Dios, le rna cni: Ryön chiꞌë bönniꞌ rulidzëꞌ lu latj caꞌz, rnëꞌ: Gul‑páꞌ nöz gdxin queëliꞌ Xanruꞌ, Gul‑bíj li yuguꞌ nöz las tödëꞌ.
23268	MAT 3:7	Catiꞌ bléꞌinëꞌ Juan taꞌdxinëꞌ ga zoëꞌ zian bönniꞌ gdauꞌ fariseo len bönniꞌ gdauꞌ saduceo quië laꞌdilëꞌ nis, rëꞌ lequëꞌ: ―Lbiꞌiliꞌ, diꞌa dza quecbaꞌ bël sniaꞌ. ¿Nuzxa buzejniꞌi lbiꞌiliꞌ gzxundjliꞌ yöl‑laꞌ rusyúdx naꞌ ziꞌa gac quegac bunách?
23275	MAT 3:14	Juan buzaguëꞌë xnözëꞌ, rëꞌ Jesús: ―Nedaꞌ ral‑laꞌ gdilaꞌ nis lu naꞌu Liꞌ. ¿Atiꞌ Liꞌ zaꞌtsuꞌ quiaꞌ?
23276	MAT 3:15	Bubiꞌë didzaꞌ Jesús, rëꞌ lëꞌ: ―Benn latj naꞌa, le cni ral‑laꞌ gunruꞌ gdutë le nac tsahuiꞌ. Niꞌr bëꞌë Lëꞌ latj Juan.
23278	MAT 3:17	Niꞌr byön chiꞌi nu ruiꞌ didzaꞌ yehuaꞌ yubá, rna: ―Bönniꞌ ni naquëꞌ Zxiꞌnaꞌ. Nadxiꞌidaꞌ Lëꞌ len rdzag ladxaꞌa Lëꞌ.
23281	MAT 4:3	Niꞌr bdxin ga zoëꞌ Jesús tuꞌ xöhuiꞌ, nu naꞌ rugáp bunách dul‑laꞌ, len rë Jesús: ―Chquiꞌ nacuꞌ gdu Zxiꞌnëꞌ Dios, gna naꞌa luhuöác yöt xtil guiöj nacuáꞌ ni.
23282	MAT 4:4	Bubiꞌë didzaꞌ Jesús, rëꞌ lei: ―Nayúj lu guich laꞌy, rna: “Clëgz yöt xtil nabánigac bunách, san lëzcaꞌ yúguꞌtë didzaꞌ ruꞌë Dios nabánigac bunách.”
23284	MAT 4:6	Niꞌr rë Lëꞌ tuꞌ xöhuiꞌ, rna: ―Chquiꞌ nacuꞌ Liꞌ gdu Zxiꞌnëꞌ Dios, busladzuꞌ cuinuꞌ ni, le nayúj lu guich laꞌy, rna: Dios gsölëꞌë gbaz laꞌy queëꞌ lun chiꞌë Liꞌ, Atiꞌ luchisëꞌ Liꞌ lu naꞌquëꞌ, Cui tsajcheguꞌu guiöj, cui gunuꞌ ziꞌ niꞌu.
23285	MAT 4:7	Bubiꞌë didzaꞌ Jesús, rëꞌ lei: ―Yetú caꞌ nayúj lu guich laꞌy, le rë bunách, rna: “Cutu siꞌ bëꞌu Xanuꞌ Dios.”
23287	MAT 4:9	Niꞌr rë Lëꞌ: ―Yúguꞌtë lë ni udödaꞌ lu naꞌu chquiꞌ uzechu zxibuꞌ lahuaꞌ gunuꞌ nedaꞌ zxön.
23288	MAT 4:10	Jesús rëꞌ lei: ―Böaj quiuꞌ liꞌ, Satanás tuꞌ xöhuiꞌ, le nayúj lu guich laꞌy le rë netuꞌ, rna: “Xanuꞌ Dios tsej ladxuꞌu, len tuzëꞌ Lëꞌ gunuꞌ xchinëꞌ.”
23292	MAT 4:14	Cni guc, butság lë naꞌ gnëꞌ Isaías, bönniꞌ bëꞌë didzaꞌ uláz queëꞌ Dios, gnëꞌ:
23295	MAT 4:17	Catiꞌ niꞌr gzu lahuëꞌ Jesús runëꞌ lban, rëꞌ bunách niꞌ: ―Gul‑bíꞌi ládxiꞌliꞌ, le chzoa gdxin dza duná bëꞌ luyú ni Nu naꞌ zoa yehuaꞌ yubá.
23297	MAT 4:19	Jesús rëꞌ lequëꞌ: ―Gul‑dutáꞌ nedaꞌ, atiꞌ gunaꞌ ga gchëꞌliꞌ quiaꞌ bunách, gunliꞌ ca runliꞌ rzönliꞌ‑baꞌ böl.
23305	MAT 5:2	Gzu lahuëꞌ rusëdnëꞌ lequëꞌ, rnëꞌ:
23316	MAT 5:13	Gnëꞌ caꞌ Jesús: ―Lbiꞌiliꞌ nacliꞌ ca zödiꞌ luyú ni, san chquiꞌ nit yöl‑laꞌ snaꞌ qui zödiꞌ naꞌ, cutu gac gunruꞌ ga huöac snaꞌ. Cutur bi nac lsacaꞌ, san chnac tu le chuꞌnruꞌ, atiꞌ lulíb lei bunách.
23320	MAT 5:17	Gnëꞌ caꞌ Jesús: ―Cutu gáquiliꞌ bidaꞌ dusnitiaꞌ yuguꞌ le gna bëꞌë Moisés o zxba naꞌ gulusëdnëꞌ bönniꞌ gluꞌë didzaꞌ uláz queëꞌ Dios. Bidaꞌ, clëg quië usnitiaꞌ yuguꞌ lë ni, san quië uluꞌa lahui gdu le rusëdi lë naꞌ.
23323	MAT 5:20	Rëpaꞌ caꞌ lbiꞌiliꞌ: “Chquiꞌ cugunliꞌ le nactër dxiꞌa ca le tunëꞌ bönniꞌ gdauꞌ usëdi, lencaꞌ ca tunëꞌ bönniꞌ gdauꞌ fariseo, cutu caꞌ tsazliꞌ ga niꞌ rna bëꞌë Dios yehuaꞌ yubá.”
23324	MAT 5:21	Gnëꞌ caꞌ Jesús: ―Chbyö́niliꞌ ca glëꞌ xuz xtauꞌliꞌ bönniꞌ gutaꞌ lu naꞌquëꞌ, gulanë́ꞌ: “Cutu gdö́diliꞌ bunách. Nu bönniꞌ gdödëꞌ bunách, nabaguëꞌë zxguiaꞌ huadxinëꞌ ga cuequi xbeynëꞌ lëꞌ Dios.”
23325	MAT 5:22	Naꞌa, nedaꞌ rëpaꞌ lbiꞌiliꞌ: Nu bönniꞌ rleynëꞌ böchiꞌ lzëꞌë, nabaguëꞌë zxguiaꞌ huadxinëꞌ ga cuequi xbeynëꞌ lëꞌ Dios. Lëzcaꞌ cni, nu bönniꞌ gnë ziꞌë queëꞌ böchiꞌ lzëꞌë nabaguëꞌë zxguiaꞌ laꞌbequi xbeynëꞌ lëꞌ bönniꞌ blau taꞌbequi xbey, atiꞌ nu bönniꞌ guiëꞌ lzëꞌë: “Böaꞌ cunözi”, nabaguëꞌë zxguiaꞌ bönniꞌ naꞌ tsijëꞌ lu guiꞌ gabíl.
23330	MAT 5:27	Gnëꞌ caꞌ Jesús: ―Chbyö́niliꞌ ca naꞌ gulanë́ꞌ: “Cutu gunuꞌ dul‑laꞌ le rguitsj zxba qui yöl‑laꞌ nutság naꞌ.”
23331	MAT 5:28	Naꞌa, nedaꞌ rëpaꞌ lbiꞌiliꞌ: Nútiꞌtëz bönniꞌ ruyúëꞌ ngul len yöl‑laꞌ rzë ladxiꞌ le cunác, chbenëꞌ dul‑laꞌ len lënu lu icj ládxiꞌdauꞌhuëꞌ.
23334	MAT 5:31	Gnëꞌ caꞌ Jesús: ―Lëzcaꞌ gulanë́ꞌ: “Nútiꞌtëz bönniꞌ rusanëꞌ‑nu ngul queëꞌ, ral‑laꞌ unödzjëꞌ queënu guich le rna ruláꞌalenëꞌ‑nu.”
23336	MAT 5:33	Gnëꞌ caꞌ Jesús: ―Lëzcaꞌ byö́niliꞌ ca glëꞌ xuz xtauꞌliꞌ bönniꞌ gutaꞌ lu naꞌquëꞌ, gulanë́ꞌ: “Cutu siꞌ yëꞌu catiꞌ rneynuꞌ Dios, atiꞌ ral‑laꞌ gunuꞌ lahuëꞌ Xanruꞌ Dios gdutë lë naꞌ rneynuꞌ Lëꞌ.”
23340	MAT 5:37	Ral‑laꞌ gnazliꞌ: “ja”, o gnazliꞌ: “cutu”, le nac qui tuꞌ xöhuiꞌ le nadö́d bëꞌ ca nac didzaꞌ ni.
23341	MAT 5:38	Gnëꞌ caꞌ Jesús: ―Chbyö́niliꞌ ca nac le gna bëꞌë Moisés, gnëꞌ: “Nu bi run qui yöj lau lzëꞌi, ubíꞌi caꞌ qui, lencaꞌ nu bi run qui layiꞌ lzëꞌi, ubíꞌi caꞌ qui.”
23342	MAT 5:39	Naꞌa, nedaꞌ rëpaꞌ lbiꞌiliꞌ: Cutu táꞌbagaꞌliꞌ nu guaꞌ döꞌ queëliꞌ, atiꞌ chquiꞌ nu capaꞌ xaguꞌ yubél, bëꞌ latj capaꞌ caꞌ yetú xaguꞌ yögl.
23346	MAT 5:43	Gnëꞌ caꞌ Jesús: ―Lëzcaꞌ cni byö́niliꞌ lë naꞌ gulanë́ꞌ: “Ral‑laꞌ gdxiꞌinuꞌ nu nadxíꞌi liꞌ, len udiꞌinuꞌ nu curleꞌi liꞌ dxiꞌa.”
23352	MAT 6:1	Gnëꞌ caꞌ Jesús: ―Gul‑güíꞌ ládxiꞌliꞌ gac gdu ca rej ládxiꞌliꞌ‑nëꞌ Dios, cugunzliꞌ lë ni laugac bunách quië laꞌleꞌi ca naꞌ runliꞌ. Chquiꞌ runliꞌ cni, cutu bi gunnëꞌ queëliꞌ Xuzruꞌ Dios zoëꞌ yehuaꞌ yubá.
23356	MAT 6:5	Gnëꞌ caꞌ Jesús: ―Catiꞌ ulidzliꞌ‑nëꞌ Dios, cutu gunliꞌ ca tunëꞌ bönniꞌ tuꞌluíꞌz tsahuiꞌ cuinquëꞌ, le taꞌdzág ládxiꞌquëꞌ taꞌzuinëꞌ tuꞌlidzëꞌ Dios gap nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, len gap nac lu yëꞌy quië laꞌleꞌi lequëꞌ bunách. Le nactë rëpaꞌ lbiꞌiliꞌ, caꞌz nac yöl‑laꞌ ba gataꞌ quequëꞌ.
23360	MAT 6:9	Qui lë ni naꞌ, ral‑laꞌ ulidzliꞌ‑nëꞌ Dios gnaliꞌ cni: Xuz netuꞌ, zuꞌ yehuaꞌ yubá, Gac zxön lauꞌ.
23367	MAT 6:16	Gnëꞌ caꞌ Jesús: ―Catiꞌ gunliꞌ gubás, cutu gunliꞌ bayechiꞌ lauliꞌ ca tunëꞌ bönniꞌ tuꞌluíꞌz tsahuiꞌ cuinquëꞌ, le tunëꞌ bayechiꞌ lauquëꞌ quië láquibeꞌi bunách tunëꞌ gubás. Le nactë rëpaꞌ lbiꞌiliꞌ, caꞌz nac yöl‑laꞌ ba gataꞌ quequëꞌ.
23370	MAT 6:19	Gnëꞌ caꞌ Jesús: ―Cutu utubliꞌ yöl‑laꞌ tsahuiꞌ luyú ni, ga ni tuꞌtöbaꞌ lei bëldauꞌ qui, atiꞌ rac ditj, len ga ni taꞌyáz gban, taꞌbanëꞌ.
23373	MAT 6:22	Gnëꞌ caꞌ Jesús: ―Yöj lauruꞌ nac ca tu le rguꞌu yeníꞌ icj ládxiꞌdauꞌruꞌ. Qui lë ni naꞌ, chquiꞌ yöj lauliꞌ nac dxiꞌa, gdútëliꞌ tsëpliꞌ yös yeníꞌ.
23375	MAT 6:24	Gnëꞌ caꞌ Jesús: ―Nutu nu gac gun xchinquëꞌ chop xanëꞌ, le uzóëꞌ tslaꞌl tuëꞌ atiꞌ yetúëꞌ naꞌ gdxiꞌinëꞌ, o ugáꞌnlenëꞌ tuëꞌ, atiꞌ yetúëꞌ naꞌ ubíj ladxëꞌë. Cutu gac gunliꞌ zxön Dios lencaꞌ dumí.
23376	MAT 6:25	Gnëꞌ caꞌ Jesús: ―Yetú caꞌ rëpaꞌ lbiꞌiliꞌ: Cutu cöꞌliꞌ baguíꞌi niꞌa qui le gáguliꞌ o niꞌa qui le guiꞌjliꞌ, yuguꞌ le nabániliꞌ, o niꞌa qui lariꞌ gáculiꞌ. Záquiꞌtsquir yöl‑laꞌ naꞌbán queëliꞌ ca le gáguliꞌ, atiꞌ nactër lsacaꞌ gdu ca nayáꞌ nabinliꞌ ca lariꞌ gáculiꞌ.
23382	MAT 6:31	Qui lë ni naꞌ, cutu cöꞌliꞌ baguíꞌi, cugnaliꞌ: “¿Bizxa gágutsatuꞌ?” o “¿Bizxa guíꞌjtsatuꞌ?” o “¿Bizxa lariꞌ gácutsatuꞌ?”
23386	MAT 7:1	Gnëꞌ caꞌ Jesús: ―Cutu glag yudxliꞌ böchiꞌ lzaꞌliꞌ, cui gchugu bëꞌë caꞌ queëliꞌ Dios,
23389	MAT 7:4	¿Guiëtsuꞌ‑nëꞌ böchiꞌ lzaꞌu: “Glöz, cuijaꞌ bëbdauꞌ yuꞌu yöj lauꞌ”, atiꞌ liꞌ, le zxöntër caꞌ yuꞌu yöj lauꞌ liꞌ?
23392	MAT 7:7	Gnëꞌ caꞌ Jesús: ―Gul‑náb, atiꞌ Dios gunnëꞌ queëliꞌ. Gul‑guílj, atiꞌ gunnëꞌ latj gdzöl queëliꞌ. Gul‑lídz raꞌ yuꞌu, atiꞌ Lëꞌ gsaljëꞌ queëliꞌ.
23398	MAT 7:13	Gnëꞌ caꞌ Jesús: ―Gul‑tsáz ga nu ryaz le nac guidauꞌ. Lagaꞌ nac ga nu ryaz len yalj caꞌ nac nöz le rjaclenëꞌ bönniꞌ ga niꞌ laꞌnitiëꞌ, atiꞌ taꞌyaziëꞌ niꞌ bönniꞌ zian.
23400	MAT 7:15	Gnëꞌ caꞌ Jesús: ―Gul‑gún chiꞌi cuinliꞌ qui nadxi laꞌzíꞌ yéꞌinëꞌ lbiꞌiliꞌ bönniꞌ taꞌzíꞌ yëꞌë, taꞌnë́ꞌ tuꞌë didzaꞌ uláz queëꞌ Dios. Laꞌdxinëꞌ ga zoaliꞌ bönniꞌ ni, len luluíꞌ cuinquëꞌ nöxj ládxiꞌdauꞌ ca naccbaꞌ böꞌcuꞌ zxílaꞌdauꞌ, san lu icj ládxiꞌdauꞌquëꞌ nacquëꞌ ca böꞌcuꞌ zugaꞌ sniaꞌ.
23406	MAT 7:21	Gnëꞌ caꞌ Jesús: ―Zian nup të nedaꞌ: “Xan, Xan”, san clëg yúguꞌtëꞌ laꞌyaziëꞌ ga rna bëꞌë Dios yehuaꞌ yubá. Laꞌyazzëꞌ niꞌ bönniꞌ tunëꞌ ca rëꞌnnëꞌ Xuzaꞌ Dios, zoëꞌ yehuaꞌ yubá.
23407	MAT 7:22	Catiꞌ gdxin dza udx qui yödzlyú ni, lëꞌ nedaꞌ bönniꞌ zian, laꞌnë́ꞌ: “Xan, Xan, bentuꞌ lban qui xtidzëꞌë Dios, buguntuꞌ dxin Lauꞌ Liꞌ, len buguntuꞌ caꞌ dxin Lauꞌ bubijtuꞌ yuguꞌ böꞌ xöhuiꞌ, len buguntuꞌ caꞌ dxin Lauꞌ bentuꞌ zian yöl‑laꞌ huac zxön.”
23408	MAT 7:23	Niꞌr nedaꞌ gyëpaꞌ lequëꞌ: “Cutu caꞌ núnbëꞌa lbiꞌiliꞌ. Gul‑cuít ga zoaꞌ, lbiꞌiliꞌ ruaꞌliꞌ döꞌ.”
23409	MAT 7:24	Gnëꞌ caꞌ Jesús: ―Yetú caꞌ, nu ryöni xtidzaꞌa ni len gun ca rna, nu ni nac ca tu bönniꞌ rejniꞌi, buzóëꞌ lidxëꞌ ga nac lu guiöj.
23416	MAT 8:2	Bdxinëꞌ ga zoëꞌ Jesús bönniꞌ réꞌinëꞌ huëꞌ nudzuꞌ ruzö́d, atiꞌ buzechu zxibëꞌ lahuëꞌ Jesús, len rëꞌ Lëꞌ: ―Xan, chquiꞌ rëꞌnnuꞌ, huac unuꞌ nedaꞌ.
23417	MAT 8:3	Niꞌr bulitë nëꞌë Jesús len gdanëꞌ lëꞌ. Rëꞌ lëꞌ: ―Rëꞌndaꞌ. Huöacuꞌ dxiꞌa. Laꞌ bunittë xhuëꞌë bönniꞌ huëꞌ naꞌ.
23418	MAT 8:4	Niꞌr gudxëꞌ lëꞌ Jesús: ―Byu, nutu nu guiꞌu cni, san gyeaj, yajluíꞌ cuinuꞌ lahuëꞌ bxuz, atiꞌ yajnö́dzj le gna bëꞌë Moisés le uluíꞌi bunách chböacuꞌ.
23420	MAT 8:6	rëꞌ Lëꞌ: ―Xan, biꞌi huen dxin quiaꞌ dëbiꞌ yuꞌu, réꞌibiꞌ huëꞌ nacuꞌnbiꞌ bin, len szxöni rzacaꞌ rguiꞌbiꞌ.
23421	MAT 8:7	Jesús rëꞌ lëꞌ: ―Nedaꞌ guidaꞌ unaꞌ‑biꞌ.
23422	MAT 8:8	Bubiꞌë didzaꞌ bönniꞌ naꞌ nacuꞌë lu nëꞌë bönniꞌ rjaquëꞌ gdil‑l, rëꞌ Jesús: ―Xan, cutu nacaꞌ lsacaꞌ tsaziuꞌ lidxaꞌ, san tsa gnazuꞌ quiaꞌ, atiꞌ huöacbiꞌ biꞌi huen dxin quiaꞌ.
23423	MAT 8:9	Lëzcaꞌ nedaꞌ, zoa nu rna beꞌi nedaꞌ, len nacuꞌë caꞌ bönniꞌ rjaquëꞌ gdil‑l rna béꞌigacdaꞌ‑nëꞌ. Catiꞌ rëpaꞌ‑nëꞌ tuëꞌ: “Gyeaj niꞌ”, rijëꞌ. Catiꞌ rëpaꞌ‑nëꞌ yetúëꞌ: “Gda ni”, ridëꞌ. Catiꞌ rëpaꞌ‑nëꞌ bönniꞌ huen dxin quiaꞌ: “Ben dxin ni”, laꞌ runtëꞌ dxin naꞌ.
23424	MAT 8:10	Catiꞌ byönnëꞌ didzaꞌ ni Jesús, bubannëꞌ, atiꞌ gudxëꞌ bönniꞌ zjáclenëꞌ Lëꞌ, rnëꞌ: ―Le nactë rëpaꞌ lbiꞌiliꞌ, ga nacuáꞌ bunách Israel, nutu nu bönniꞌ rajxáquiꞌdaꞌ‑nëꞌ rejlëꞌë nedaꞌ ca runëꞌ bönniꞌ ni.
23425	MAT 8:11	Yetú caꞌ rëpaꞌ lbiꞌiliꞌ: Laꞌrúj bunách zian zacaꞌ ga rlen gbidz, len zacaꞌ ga rbia gbidz, atiꞌ laꞌböꞌlen tsazxö́n Abraham, len Isaac, len Jacob, niꞌ yehuaꞌ yubá ga rna bëꞌë Dios,
23427	MAT 8:13	Niꞌr Jesús gudxëꞌ bönniꞌ naꞌ nacuꞌë lu nëꞌë bönniꞌ rjaquëꞌ gdil‑l, rnëꞌ: ―Böaj lidxuꞌ. Ca naꞌ réjlëꞌu, caꞌ gac quiuꞌ. Laꞌ naꞌz böáctëbiꞌ biꞌi huen dxin queëꞌ naꞌ.
23431	MAT 8:17	Cni guc quië butság ca naꞌ gnëꞌ Isaías, bönniꞌ bëꞌë didzaꞌ uláz queëꞌ Dios, gnëꞌ: “Lëꞌ buꞌë yuguꞌ le rzácaꞌruꞌ, len buꞌë caꞌ yuguꞌ guidzhuë́ꞌ queëruꞌ.”
23433	MAT 8:19	Bdxinëꞌ ga naꞌ zoëꞌ Jesús tu bönniꞌ gdauꞌ usëdi, len rëꞌ Lëꞌ: ―Bönniꞌ Usëdi, sáꞌlenaꞌ Liꞌ gátiꞌtëz ga tsijuꞌ.
23434	MAT 8:20	Jesús rëꞌ lëꞌ: ―Yuguꞌ bözaꞌ nacuáꞌ zxan guiöj quecbaꞌ, atiꞌ yuguꞌ bguindauꞌ, nudxía lidxcbaꞌ, san nedaꞌ, Bönniꞌ Nuhuöaquëꞌ Gdu Bunách, cutu dë ga quixj icjaꞌ.
23435	MAT 8:21	Yetúëꞌ bönniꞌ, naquëꞌ bönniꞌ usë́d queëꞌ Jesús, gudxëꞌ Lëꞌ: ―Xan, benn nedaꞌ latj huöjaꞌ ga gdxinr dza chbucachaꞌa‑nëꞌ xuzaꞌ.
23436	MAT 8:22	Jesús gudxëꞌ lëꞌ: ―Gdaꞌ nedaꞌ. Bëꞌ latj bönniꞌ tatczëꞌ lucachëꞌë nup lat quequëꞌ.
23439	MAT 8:25	Niꞌr guladxinëꞌ ga zoëꞌ Jesús bönniꞌ usë́d queëꞌ, atiꞌ guluspanëꞌ Lëꞌ, len tëꞌ Lëꞌ: ―Xan, buslá netuꞌ. Chrgáchiꞌruꞌ lu nis.
23440	MAT 8:26	Bubiꞌë didzaꞌ Jesús, rëꞌ lequëꞌ: ―¿Bizx quië rádxiliꞌ? Latiꞌz réjlëꞌliꞌ‑nëꞌ Dios. Niꞌr gyasëꞌ Jesús len bulidzëꞌ böꞌ naꞌ reycj len nis zxön naꞌ, atiꞌ laꞌ gröꞌtë dxi.
23441	MAT 8:27	Gulubannëꞌ bönniꞌ naꞌ, taꞌnë́ꞌ: ―¿Nuzxa caz bönniꞌ ni? Ruiꞌzëꞌ didzaꞌ atiꞌ tun ca rnëꞌ böꞌ reycj len nis zxön.
23443	MAT 8:29	Laꞌ gluiꞌtëꞌ zidzj didzaꞌ chopëꞌ ni, taꞌnë́ꞌ: ―¿Bizxa rál‑laꞌtuꞌ quiuꞌ, Jesús, Zxiꞌnëꞌ Dios? ¿Naruꞌ bdxintsuꞌ ni dusacaꞌ ziꞌu netuꞌ ziꞌal ca gdxin dza queëtuꞌ?
23445	MAT 8:31	Gulanáb yechiꞌ Jesús böꞌ xöhuiꞌ naꞌ, të Lëꞌ: ―Chquiꞌ ubijuꞌ netuꞌ, benn latj tsajtsúꞌugactuꞌ‑baꞌ cuch zian niꞌ.
23446	MAT 8:32	Niꞌr Jesús gudxëꞌ leygac: ―Gul‑tséaj. Laꞌ gularujtë böꞌ xöhuiꞌ, yajtsazgac cuch zian niꞌ. Niꞌr jaréluꞌcbaꞌ yjacbaꞌ yúguꞌtëbaꞌ cuch zian naꞌ, yajbíxtëcbaꞌ ga nac lëꞌi guiöj, yajtsazcbaꞌ lu nis zxön, ga niꞌ gulayë́pibaꞌ nis, glatbaꞌ.
23450	MAT 9:2	Niꞌ djuaꞌquëꞌ ga zoëꞌ Jesús tu bönniꞌ nacuꞌnëꞌ bin, zxoëꞌ lu daꞌa yag. Catiꞌ bléꞌinëꞌ Jesús ca naꞌ taꞌyejlëꞌë Lëꞌ bönniꞌ ni, gudxëꞌ bönniꞌ naꞌ nacuꞌnëꞌ bin, rnëꞌ: ―Btip ladxuꞌu, zxíꞌnaꞌdauꞌ. Chbunít lahuaꞌ dul‑laꞌ nabaguꞌu.
23451	MAT 9:3	Nacuꞌë caꞌ niꞌ bönniꞌ gdauꞌ tuꞌsëdi, atiꞌ taꞌnë́ꞌ lu icj ládxiꞌdauꞌquëꞌ, taꞌnë́ꞌ: ―Didzaꞌ ruꞌë bönniꞌ ni ruzóa Dios tslaꞌl.
23452	MAT 9:4	Catiꞌ ráquibeꞌinëꞌ Jesús le taꞌzáꞌ ládxiꞌquëꞌ, rëꞌ lequëꞌ: ―¿Bizx quië rzaꞌ ládxiꞌliꞌ cni le cunác?
23453	MAT 9:5	Cutu nac baníg nu guiëz bönniꞌ ni: “Yuguꞌ dul‑laꞌ nabaguꞌu chbunít lahuaꞌ”, san nac baníg nu gun ga huöasëꞌ len uzéꞌinëꞌ.
23454	MAT 9:6	Naꞌa, uluiꞌidaꞌ lbiꞌiliꞌ nedaꞌ, Bönniꞌ Nuhuöaquëꞌ Gdu Bunách, dë lu naꞌa yöl‑laꞌ uná bëꞌ luyú ni unít lahuaꞌ dul‑laꞌ. Niꞌr Jesús gudxëꞌ bönniꞌ naꞌ nacuꞌnëꞌ bin, rnëꞌ: ―Gyas. Bchis daꞌa yag quiuꞌ len böaj lidxuꞌ.
23457	MAT 9:9	Catiꞌ buzë́ꞌë niꞌ Jesús, bléꞌinëꞌ bönniꞌ lëꞌ Mateo, röꞌë ga naꞌ ruquizxjëꞌ uláz qui yödz ziꞌtuꞌ, atiꞌ Jesús gudxëꞌ lëꞌ: ―Gdaꞌ nedaꞌ. Niꞌr laꞌ gyastëꞌ Mateo naꞌ, zéajlenëꞌ Jesús.
23459	MAT 9:11	Catiꞌ gulaléꞌinëꞌ lë ni bönniꞌ gdauꞌ fariseo, gulanabnëꞌ yuguꞌ bönniꞌ usë́d queëꞌ Jesús, taꞌnë́ꞌ: ―¿Bizx quië naꞌ rágulenëꞌ tsazxö́n bönniꞌ tuꞌquízxj len yelaꞌquëꞌ bönniꞌ dul‑laꞌ bönniꞌ rusëdnëꞌ lbiꞌiliꞌ?
23460	MAT 9:12	Catiꞌ byönnëꞌ lë ni Jesús, rëꞌ lequëꞌ: ―Cutu naquincnëꞌ nu un bunách bönniꞌ nacquëꞌ dxiꞌa, san bönniꞌ téꞌinëꞌ naquincnëꞌ nu un bunách.
23461	MAT 9:13	Gul‑tséaj len gul‑së́d le rna lë naꞌ nayúj lu guich laꞌy, rna cni: “Rëꞌndaꞌ luhuechiꞌ ládxiꞌquëꞌ lzaꞌquëꞌ bönniꞌ, len clëg ludödcdëꞌ‑baꞌ böaꞌ bëdx lu bcugu laꞌy quiaꞌ.” Bidaꞌ ni, clëg dulídzgacaꞌ‑nëꞌ bönniꞌ tsahuiꞌ, san bidaꞌ dulídzgacaꞌ‑nëꞌ bönniꞌ dul‑laꞌ quië lubíꞌi ládxiꞌquëꞌ.
23462	MAT 9:14	Niꞌr guladxinëꞌ ga zoëꞌ Jesús bönniꞌ daꞌquëꞌ Juan, bönniꞌ naꞌ buquilëꞌ bunách nis, len gulanabnëꞌ Lëꞌ, taꞌnë́ꞌ: ―¿Bizx quië naꞌ netuꞌ lencaꞌ yuguꞌ bönniꞌ gdauꞌ fariseo, zian lzu runtuꞌ gubás, san yuguꞌ bönniꞌ usë́d quiuꞌ Liꞌ cutu tunëꞌ gubás?
23463	MAT 9:15	Bubiꞌë didzaꞌ Jesús, rëꞌ lequëꞌ: ―¿Naruꞌ huactsa laꞌsëbi ládxiꞌgac nup nacuáꞌ lni qui yöl‑laꞌ rutság naꞌ tsal niꞌ zóalenëꞌ lequëꞌ bönniꞌ rutság nëꞌë? Ziꞌa zaꞌ dza catiꞌ gduëꞌ ga nacuꞌë bönniꞌ naꞌ rutság nëꞌë. Dza niꞌr lunëꞌ gubás.
23464	MAT 9:16	Benëꞌ lsaquiꞌ Jesús, rnëꞌ: ―Nutu nu un lariꞌ tëb len lariꞌ cub, le uxúꞌn lariꞌ cub naꞌ nuguꞌë lariꞌ tëb naꞌ, atiꞌ gchözaꞌr lariꞌ tëb naꞌ.
23466	MAT 9:18	Tsal niꞌ ruíꞌlenëꞌ lequëꞌ didzaꞌ ni Jesús, bdxinëꞌ ga zoëꞌ tu bönniꞌ rna béꞌinëꞌ bunách judío, atiꞌ buzechu zxibëꞌ lahuëꞌ Jesús, len rëꞌ Lëꞌ: ―Biꞌi nguldauꞌ quiaꞌ laꞌ budxtë gutbiꞌ. Gda gxoa naꞌu lëbiꞌ, atiꞌ ubanbiꞌ.
23469	MAT 9:21	Cni bennu le rzaꞌ ládxiꞌnu, rnanu: “Chquiꞌ canzaꞌ zxëꞌ, huöacaꞌ.”
23470	MAT 9:22	Niꞌr bueycjëꞌ Jesús, ruyúëꞌ lënu, atiꞌ rëꞌ‑nu: ―Btip ladxuꞌu, zxíꞌnaꞌdauꞌ. Chböacteuꞌ le réjlëꞌu nedaꞌ. Laꞌ naꞌz böáctënu.
23472	MAT 9:24	Jesús rëꞌ lequëꞌ: ―Gul‑cuít ni, le cutu natbiꞌ biꞌi nguldauꞌ ni. Raszbiꞌ naꞌ. Niꞌr gulutítj Lëꞌ nup nacuáꞌ niꞌ.
23475	MAT 9:27	Catiꞌ brujëꞌ niꞌ Jesús, zjáclenëꞌ Lëꞌ chopëꞌ bönniꞌ nachúl lauquëꞌ. Tuꞌë zidzj didzaꞌ, taꞌnë́ꞌ: ―Buechiꞌ ladxiꞌ netuꞌ, Liꞌ, zxiꞌn xsoëꞌ David.
23476	MAT 9:28	Catiꞌ bdxinëꞌ Jesús ga nac lu yuꞌu, guladxinëꞌ ga zoëꞌ chopëꞌ bönniꞌ naꞌ nachúl lauquëꞌ. Jesús gnabnëꞌ lequëꞌ, rnëꞌ: ―¿I réjlëꞌliꞌ nedaꞌ, huac unaꞌ lbiꞌiliꞌ? Lequëꞌ taꞌnë́ꞌ: ―Ja, Xan.
23477	MAT 9:29	Niꞌr gdanëꞌ yöj lauquëꞌ Jesús, rnëꞌ: ―Ca réjlëꞌliꞌ, caꞌ gac queëliꞌ.
23478	MAT 9:30	Laꞌ böaljtë yöj lauquëꞌ. Niꞌr buzeynëꞌ bach lequëꞌ Jesús, rnëꞌ: ―Gul‑güiꞌtecz ládxiꞌliꞌ nutu nu gnözi lë ni.
23481	MAT 9:33	Catiꞌ bubijëꞌ böꞌ xöhuiꞌ naꞌ Jesús, laꞌ gnëtëꞌ bönniꞌ naꞌ cugnë́ꞌ. Gulubannëꞌ bönniꞌ nacuꞌë niꞌ, taꞌnë́ꞌ: ―Gatga rléꞌinituꞌ le cni ladj bunách Israel.
23482	MAT 9:34	Niꞌr gulanë́ꞌ queëꞌ bönniꞌ gdauꞌ fariseo, taꞌnë́ꞌ: ―Bönniꞌ ni rubijëꞌ yuguꞌ böꞌ xöhuiꞌ, rugunëꞌ dxin yöl‑laꞌ huac qui xangac böꞌ xöhuiꞌ naꞌ.