| 13944 | PSA 1:1 | Ba nez ẕen naken che bennen' bi ẕzi'e da' ẕzejní'igekle benne' wen da' ẕinnj ka' ḻe', na' bi nake' toze ḻen benne' doḻa' ka', na' bi žónḻene' tẕen benne' ka' ẕzóagake' Dios cheḻa'ale, |
| 13945 | PSA 1:2 | san žebele' dan' žone' kan ẕchi'le X̱anžo Dios, na' kan nak dan' wnnakze' Ḻe', dot ža dot yel ẕlab ḻaže'en. |
| 13946 | PSA 1:3 | Benne' ni nake' ka to yag da' zoan žoa'a yegw, da' ẕbian da' ẕix̱ chen ḻo byo' chekzen, na' x̱lagen bi žasen. Yógo'te da' žon benne' ni, želžój chawen', |
| 13948 | PSA 1:5 | Bi yežojgak chawe' benne' wen da' ẕinnj ka' kate' wchi'a ḻaže' Dios ḻégake', na' bi chó'ogak benne' doḻa' ka' gan zej ndobe benne' chawe' ka' ḻaw Dios. |
| 13949 | PSA 1:6 | Žaz ḻaže' Dios da' žongak benne' chawe' ka', san da' žongak benne' wen da' ẕinnj ka' chen' ḻégake' gan kwia yí'gake'. |
| 13951 | PSA 2:2 | Ẕži'igak benne' wnná bia' ka' chie' Ḻe', na' benne' yolawe' ka' žóngake' toze diža' nich wží'igake' che Dios, X̱ángake', na' che Bennen' wžé Dios chekze'. |
| 13953 | PSA 2:4 | Gan že' X̱anžon' ya'abá chie' žẕiže'. Žon ditjle' da' žek ḻáže'gake' góngake', |
| 13954 | PSA 2:5 | na' ḻo yeḻa' ẕža'a chie' ẕdiḻe' ḻégake', na' ḻo yeḻa' yichj ža'a chie' ẕchebe' ḻégake'. |
| 13955 | PSA 2:6 | Ẕnne': “Ḻo ya'a la'y chia', Ya'a Sión ba bzoa' Bennen' nna bi'e ḻo wlaza' neda'.” |
| 13957 | PSA 2:8 | Wnnable neda', na' gonna' Le' yógo'te yež ka', na' gak chio' dot yežlyó. |
| 13959 | PSA 2:10 | Na'a, ḻe'e, Benne' wnná bia' ka', le yenle da' ni da' ẕzejni'ila' ḻe'e. Le wsedle da' ni da' ẕzenla' ḻe'e, ḻe'e na' ẕnna bia'le ḻo yežlyó. |
| 13964 | PSA 3:3 | Benne' zante ẕnnégake' chia', na' ẕnnágake': “Bi yeslá Dios ḻe'.” |
| 13965 | PSA 3:4 | San Le', X̱ana' Dios, žape chi'o neda'. Nako' yeḻa' baní' chia', na' ẕzo' neda' chawe'. |
| 13967 | PSA 3:6 | Gota'a, na' wtasa', na' bebana' dan' ben choch X̱ana' Dios neda'. |
| 13968 | PSA 3:7 | Bi žeba' chi mil benne' ka' ẕdíḻ-ḻengake' neda', benne' ka' zej nyechjle' neda'. |
| 13969 | PSA 3:8 | Wyás, X̱ana' Dios. Beslá neda', Dios chia', na' wdáp x̱ága'gak benne' ka' ẕdíḻ-ḻengake' neda', na' bdichj láye'gak benne' wen da' ẕinnj ka'. |
| 13972 | PSA 4:2 | Bechebe chia' kate' žḻiža' Le', Dios. Le' ẕchi'a ḻáže'kzo' da' žona'. Kate' wzóa' ḻo da' zede, Le' ben chocho' neda'. Beyache' ḻaže'l neda', na' benle da' ẕcháḻjḻena' Le'. |
| 13973 | PSA 4:3 | Ẕnna Dios: “Ḻe'e, benne' ka', ¿to chi'ize wzoale neda' cheḻa'ale? ¿To chi'ize ží'ilele da' bi be zaka', na' chejḻe'le da' wen ḻaže'?” |
| 13976 | PSA 4:6 | Le got biado' ka' ḻawe' Ḻe' ḻo da' nak chawe', na' le wx̱én ḻaže' X̱anžo Dios. |
| 13977 | PSA 4:7 | Benne' zante ẕnnágake': “¿Noẕ benne' gon chawe'e neto'?” Ḻo yeḻa' ži'i ḻaže' chio' bwia neto', X̱anto' Dios. |
| 13978 | PSA 4:8 | Le' bzo' yeḻa' žebele ḻo yichj ḻáẕda'wa', dan' nakžen ẕen ka da' zej nape benne' ka' zej nápḻi'e ẕoa', na' x̱is uba waḻ. |
| 13979 | PSA 4:9 | Ḻo yeḻa' ẕga'n chawe' gata'a, na' tasa', dan' ẕnno' Le', X̱ana' Dios, naka' chawe' ḻawo' Le'. |
| 13981 | PSA 5:2 | Bze nag da' ẕnnia', X̱ana' Dios. Be' ḻaže' kan ẕbeže ḻaža'a. |
| 13982 | PSA 5:3 | Le' nako' X̱ana', na' nako' Dios chia'. Benle da' žḻiža' Le', dan' ẕcháḻjḻenteza' Le'. |
| 13983 | PSA 5:4 | X̱ana' Dios, chbal-le yenlo' chi'a. Zildo' ḻa'kza' ḻawo' Le', na' kweza' da' yi'o neda'. |
| 13986 | PSA 5:7 | Ẕchinnjo' ližgak benne' ka' žon ḻáže'gake'. Ẕzo' cheḻa'ale benne' wetw benách ka', na' no benne' žon ḻaže'e, |
| 13988 | PSA 5:9 | Bsedle neda' gona' da' chawe' ḻawo' Le', X̱ana' Dios, dan' ẕžá'aḻe'egak benne' ka' neda', benne' ka' bi ẕḻé'egekle' neda' chawe'. Bche' neda' nez chawe' chio'. |
| 13989 | PSA 5:10 | Benne' ki bi ẕnnágake' da' naken da' li. Nža' yichj ḻáẕdo'gake' da' kegle. Lbá'gake' zej naken ka yežw ba ka' chegak benne' gat ka' da' nyáljwgaken. Ẕnnágake' diža' chawe' ka', san žon ḻáže'gake'. |
| 13990 | PSA 5:11 | Ben zi' benne' ka', Dios. Ben ga chejchégwgake' ni'a che x̱tíža'gakkze'. Dan' nyanḻe'e da' bi nak chawe' da' žóngake', na' dan' bží'igake' chio' Le', bnnita' ḻégake' cheḻa'ale. |
| 13992 | PSA 5:13 | Gon cháwe'kzo' benne' chawe', X̱ana' Dios. Dan' žaz ḻažo'o bennen', gape chi'o ḻe'. |
| 13994 | PSA 6:2 | X̱ana' Dios, bi tiḻo' neda' ḻo yeḻa' ẕža'a chio', na' bi gono' neda' zi' ḻo yeḻa' yichj ža'a chio'. |
| 13995 | PSA 6:3 | Beyache' ḻaže'l neda', X̱ana' Dios, dan' bi zoa' chawe'. Beyón neda', X̱ana' Dios, dan' ẕzáka'ḻi'a. |
| 13996 | PSA 6:4 | Že' zede yichj ḻáẕda'wa', na' Le', X̱ana' Dios, ¿batx̱ gákḻeno' neda'? |
| 13998 | PSA 6:6 | Gan zej nnita' benne' gat ka', bi žejsá' ḻaže' no benne' Le'. Ḻo latje chegak benne' gat ka', ¿noẕ benne' wká'n ẕene' Le'? |
| 14003 | PSA 6:11 | Žedoé'egekle, na' zej že' zedḻe'e yógo'te benne' ka' bi ẕḻé'egekle' neda' chawe'. De chgi' kwásgake' gan zoa', na' yedoé'egekle'. |
| 14005 | PSA 7:2 | X̱ana' Dios, žx̱en ḻaža'a Le'. Beslá neda' ḻo na'gak benne' ka' žsáka'gake' neda', na' gokḻen neda', |
| 14006 | PSA 7:3 | nich bi séngake' neda' ka žon bež yix̱e', na' bi wchéza'gake' neda' gan bi zoa no benne' gákḻene' neda'. |
| 14008 | PSA 7:5 | cha' zoa bi da' bi nak chawe' da' bena' che no benne', bennen' ẕgá'nḻene' neda' chawe', (san neda' gókḻena' bennen' bi ẕḻe'ele' neda' chawe' ḻa'kze bi be bena' chie') |
| 14009 | PSA 7:6 | cha' ki bena', be' latje bennen' bi ẕḻe'ele' neda' chawe' kwia ḻaže'e neda', na' sene' neda'. Be' latje bennen' wleje' neda' ḻo yo, na' wca'ne' ca'ze yeḻa' ẕen chia'. |
| 14010 | PSA 7:7 | X̱ana' Dios, ḻo yeḻa' ẕža'a chio', wzó ža'. Bdiḻ-ḻen benne' ka' žsáka'gake' neda' ḻo yeḻa' ẕža'a chégake'. Bseḻa' da' gakḻen neda' kate' žin ža wchi'a ḻažo'o da' žak cheto'. |
| 14012 | PSA 7:9 | Le', X̱ana' Dios, wchi'a ḻažo'o benne' yógo'te yež. Bchi'a ḻaže' neda' ka nak da' chawe' dan' bena', dan' bena' ḻo da' nak ḻi ḻaže' chia'. |
| 14013 | PSA 7:10 | Bchinnj da' žongak benne' wen da' ẕinnj ka', san ben chawe' benne' chawe' ka', dan' nako' chawe', Dios, na' ẕwio' da' yo'o ḻo yichj ḻáẕdo'gak yógo'te benne' ka'. |
| 14018 | PSA 7:15 | Benne' wen da' ẕinnj ẕkweze' da' ẕia da' gone'. Yo'o yichj ḻáẕda'we' da' ẕinnj da' gone', na' gone' da' wen ḻaže'. |
| 14019 | PSA 7:16 | Ba bche'ne' to yežw gže' nich yéx̱jwgak benne' ka' ga na', san bex̱jwe' ḻekze' ḻo yežwn'. |
| 14024 | PSA 8:3 | Žoḻgak x̱kwide' ka', na' bi'do' že'n ka', ka naken. Yo'o chawo'o gan bi gak ḻa'gak benne' ka' bi ẕḻé'egekle' Le' chawe'. Ẕzoa žio' benne' ka' bi ẕḻé'egekle' Le' chawe', na' benne' ka' ẕzóagake' Le' cheḻa'ale. |
| 14025 | PSA 8:4 | Kate' ẕwia' ya'abá dan' beno' Le', na' byo', na' belj ka', da' ka' bzo' to ton, |
| 14026 | PSA 8:5 | na' ẕnnaba': ¿biẕkze zej nak benne' ka', dan' že' ḻažo'o ḻégake'? ¿Biẕkze zej nak benne' ka', dan' ži'o wnné yoe chégake'? |
| 14027 | PSA 8:6 | Beno' ḻégake' yeláte'ze gax̱jw ka nako' Le', na' bzo' chégake' yeḻa' ẕen, na' yeḻa' ba la'ne. |
| 14029 | PSA 8:8 | ẕila' ka', na' bež ka', na' yógo'te bia yix̱e' ka', |
| 14030 | PSA 8:9 | bia zej nnita' x̱ílgakba', na' bel ka', na' yógo'te bia ka' zej nníta'ba' ḻo nisdo'. |
| 14034 | PSA 9:3 | Yebekzla', na' goḻkza' ka nak chio'. Goḻa' che La la'y chio' Le', nako' Dios ẕente. |
| 14035 | PSA 9:4 | Bẕonnjgak benne' ka' bi ẕḻé'egekle' neda' chawe'. Bejchégwgake', na' wnítgekle' ḻawo' Le', |
| 14036 | PSA 9:5 | dan' ẕzoa chawo'o da' chawe' da' žona'. Ži'o latje blo chio', na' cháwe'do' ẕchi'a ḻažo'o. |
| 14037 | PSA 9:6 | Bdiḻo' benne' yež ka', na' bchinnjo' yo'o chegak benne' wen da' ẕinnj ka'. Bsoḻo' lagak benne' ka' to chi'ize. |
| 14038 | PSA 9:7 | Wžía yi'gak benne' ka' bi ẕḻé'egekle' neda' chawe'. To chi'ize zej nbia yi' latje chegak benne' ka', na' yež chégake' ka', da' ka' bchinnjo' Le'. Nitó benne' chejsá' ḻaže'e benne' ka'. |
| 14041 | PSA 9:10 | X̱anžo Dios nake' ka to gan chejnníta'gak chawe' benne' yache' ka', kate' žin ža che da' wžía yin' benne' wen da' ẕinnj ka'. |
| 14042 | PSA 9:11 | Benne' ka' zej nónbi'e Le', X̱anto' Dios, wx̱én ḻáže'gake' Le', dan' bi wléj yichjo' benne' ka' žíljgake' Le', X̱anto' Dios. |
| 14043 | PSA 9:12 | Le goḻ che X̱anžon', Bennen' zoe' yež Sión. Le wzenle benne' yež ka' ka nak da' bene', |
| 14045 | PSA 9:14 | Beyache' ḻaže'l neda', X̱ana' Dios. Bwia da' ẕzaka'a ḻo na'gak benne' ka' bi ẕḻé'egekle' neda' chawe'. Le' bekó'o neda' ḻo na' yeḻa' got |
| 14050 | PSA 9:19 | Kege to chi'ize gaḻ ḻaže' Dios benne' yache' ka', na' kege to chi'ize nitle da' žx̱en ḻáže'gake'. |
| 14051 | PSA 9:20 | Wzó ža', X̱ana' Dios. Bi go'o latje benne' ka' wká'n ẕen kwíngake'. Ḻa'gak benne' yež ka' ḻawo' Le' nich wchi'a ḻažo'o ḻégake'. |
| 14054 | PSA 10:2 | Ḻo yeḻa' ẕka'n ẕen kwin benne' bi nake' chawe' ẕbia ḻaže'e benne' yache', san chejchaze' ḻo da' bdix̱jwe' nich wžía yi'e bennen'. |
| 14055 | PSA 10:3 | Ẕka'n ẕen kwine' ni'a che da' ẕze ḻaže'e. Ẕnne zi'e bennen' ẕdan ḻaže'e yeḻa' gape, na' ẕka'ne' ka'ze Le', X̱ana' Dios. |
| 14059 | PSA 10:7 | Ẕnnáteze' da' kegle, na' da' wen ḻaže', na' ẕkache'lanteze'. Diža' ka'ze, na' diža' yaḻze ẕžójgaken žoe'e. |
| 14061 | PSA 10:9 | Bagáche'ze ẕbeze' ka žon bež yix̱e'. Ẕbeze' nich gak sene' benne' yache' ka'. Kate' ẕzene' benne' yache' ḻo do yeḻj chie', na' ẕchi'e ḻe' chekze'. |
| 14062 | PSA 10:10 | Kan žon bež yix̱e' zóateze' x̱íti'e ḻáwlegak benách ka', na' ẕzene' benne' zan ḻen ne'e waḻe. |
| 14063 | PSA 10:11 | Ḻo yichj ḻáẕda'we' ẕnne': “Naḻ ḻaže' Dios benne' ki. Bkache' ḻawe', na' bi ḻe'ele' da' žona'.” |
| 14064 | PSA 10:12 | Wzó ža', X̱ana' Dios, na' bze no'o. Bi gaḻ ḻažo'o benne' yache' ka'. |
| 14066 | PSA 10:14 | San Le' bḻe'ekzlo' da' ni, dan' ẕwio' no benne' žone' da' ẕinnj, na' da' bi nak chawe', nich yezi'kzo' wzón benne' ka'. Benne' yache' ka' ẕde kwíngake' ḻo no'o. Le' žákḻenkzo' bi' wzebe ka'. |
| 14067 | PSA 10:15 | Ẕkwaso' yeḻa' waḻe che benne' wen da' ẕinnj. Wléj ḻawle da' bi nak chawe' da' bene', dan' bene' bagáche'ze. |
| 14069 | PSA 10:17 | Benno' chegak benne' gax̱jw ḻaže' ka' da' wnnábgekle' Le', X̱ana' Dios. Le' ẕkwezo' yichj ḻáẕdo'gak bénne'do' ka' nich wzé nággake' x̱tižo'o, |
| 14070 | PSA 10:18 | nich wchi'a ḻažo'o bi' wzebe ka', na' benne' ka' ẕzáka'gake', nich biž bi da' ẕinnj gongak benne' ka' bi zej nake' chawe' chegak bénne'do' ki. |
| 14073 | PSA 11:3 | Chela' kwasgak da' ka' ẕzoagak chochen da' chawe', ¿biẕkze gongak benne' chawe' ka'? |
| 14074 | PSA 11:4 | X̱anžo Dios zoakze' latje la'y chie'. Ya'abá na'kze zoa latje blo gan že' Dios. Ẕwíagak yej ḻawe', na' ẕḻe'ele' da' žongak benne' ka'. |
| 14076 | PSA 11:6 | Wdíe' benne' ka' bi zej nake' chawe' ḻo da' ka' wžía yí'gaken ḻégake', da' ka' zej naken yi', na' sufr da' žeyen ka yeže, na' to be' da' ḻaḻe'e, da' ka' seḻe'e ḻawgak benne' ka'. |
| 14083 | PSA 12:6 | San ẕnna X̱anžo Dios: “Na'a ḻa'kza' neda' dan' žsáka'gake' benne' yache' ka', benne' ka' ẕbeže ḻáže'gake', na' yeslá' benne' ka' žénegekle' bi da' gona'.” |
| 14084 | PSA 12:7 | X̱tiža' X̱anžo Dios naken dot da' li. Naken ka ya plat da' wdén ḻo yi', da' ba wdén ḻo yi' gaže chi'i ka'. |
| 14085 | PSA 12:8 | Le', X̱ana' Dios, ẕwíakzo' benne' chio' ka'. To chi'ize gape chi'o ḻégake' ḻo na'gak benne' ka' zej nnita' ḻo ža na'a ža. |
| 14088 | PSA 13:2 | ¿To chi'ize gaḻ ḻažo'o neda', X̱ana' Dios? ¿Gaḻ ḻáže'tezo' neda'? ¿To chi'ize biž ḻe'elo' neda'? |
| 14090 | PSA 13:4 | Bwia neda', X̱ana' Dios, na' bechebe chia'. Ben choch neda' nich bi gata', |
| 14091 | PSA 13:5 | na' nich bi nna bennen' bi ẕḻe'ele' neda' chawe', bi nne': “Ba bzex̱jwa' ḻe'.” Benne' ka' bi ẕḻé'egekle' neda' chawe' yebégekle' cha' chejchaza' ḻo da' bi nak chawe', |
| 14095 | PSA 14:3 | Yógo'tie' bejchíx̱gekle'. Yógo'tie' zej nchix̱le yichj ḻáẕdo'gake'. Bi zoa no benne' žone' da' naken chawe', nitóe'. |
| 14096 | PSA 14:4 | ¿Bi žejní'igekle benne' ka' žóngake' da' ẕinnj? Ẕzóẕjgake' benne' chia' ka' ka ẕzoẕj to benne' yet da' žawe', na' bi žákbe'egekle' zoa X̱anžo Dios. |
| 14097 | PSA 14:5 | Ḻo yeḻa' ẕžebe chégake' žẕízegak benne' ka', dan' žakḻen Dios benne' chawe' ka'. |
| 14098 | PSA 14:6 | Ẕcá'ngake' ca'ze da' wnnagak benne' yache' ka', san benne' ki žx̱én ḻáže'gake' X̱anžo Dios. |
| 14099 | PSA 14:7 | Ḻa'kze Bennen' yeslé' benne' Israel ka'. Kate' gon X̱anžon' ga yežingak benne' chie' ka', benne' ka' zej ndo'e zíto'le, na' yebégekle ẕa'só Jakob, na' yebéḻe'egekle benne' Israel ka'. |
| 14101 | PSA 15:2 | Wak gon ki benne' nake' ḻi ḻaže', bennen' žone' da' naken chawe', bennen' zoa da' nak dot da' li ḻo yichj ḻáẕda'we', |
| 14102 | PSA 15:3 | bennen' bi ẕnnie' che lježe' ka', na' bi be da' ẕia žone' chegak lježe' ka', na' bi žwe'e latje no benne' kwej bi'e lježe' ka'. |
| 14103 | PSA 15:4 | Wak soa bennen' ga na', bennen' bi žape' ba la'ne no benne' žone' da' ẕinnj, san žape' ba la'ne benne' ka' žápegake' X̱anžo Dios ba la'ne bennen' bi ẕche'e x̱tiže'e ḻa'kze gonen ga bi wnite'. |
| 14104 | PSA 15:5 | Wak soa bennen' ga na', bennen' žsane' mežw chie', na' bi žennabe' yichjen, na' bi žezi'e mežw nich wzóa lie' da' wen ḻaže' che benne' bi be ẕia nbage'e. No benne' žone' ki batkle chejchaze' ḻo da' ẕinnj. |
| 14105 | PSA 16:1 | Bwia neda', Dios, dan' žx̱en ḻaža'a Le'. |
| 14106 | PSA 16:2 | Ḻo yichj ḻáẕda'wa' žapa' Le', X̱ana' Dios: “Le' nako' X̱ana'. Bi be da' chawe' žata' chia' da' bi zan' ḻo no'o.” |
| 14109 | PSA 16:5 | X̱anžo Dios ẕwawe' neda' na' nake' da' chawe' chia'. Le', Dios, žape chi'o yeḻa' nban chia'. |
| 14112 | PSA 16:8 | Žx̱en ḻaža'a X̱anžo Dios yezi'e neda'. Dan' zoe' kwita', bi be gak wcheben neda'. |
| 14114 | PSA 16:10 | dan' bi wka'no' be' da' nakkza' ḻo latje choḻ chegak benne' gat ka', na' bi go'o latje nitla' dan' nakkza' chio' Le'. |
| 14116 | PSA 17:1 | Bze nag da' ẕnnia', X̱ana' Dios. Benle da' žḻiža' Le'. Wẕí' da' ẕnnabla' Le' ḻo yeḻa' ḻi ḻaže' chia'. |
| 14117 | PSA 17:2 | Benn latje ḻa'a ḻawo' Le' nich wchi'a ḻažo'o neda', dan' ẕḻe'elo' yógo'te ka zej nakkzen. |
| 14118 | PSA 17:3 | Le' ẕwíakzo' yichj ḻáẕda'wa', na' ẕḻe'elo' neda' žel. Bwíakzo' da' žona', na' bi be da' ẕinnj bḻe'elo'. Wdape chi'a loža'a nich bi be diža' ka'ze nnia'. |
| 14120 | PSA 17:5 | Wdape chi'i neda' ḻo nez chawe' chio', nich bi chejchaza' ḻo da' bi nak chawe'. |
| 14121 | PSA 17:6 | Žḻiža' Le', Dios, dan' ženlo' chi'a. Bze nag chi'a, na' benle da' ẕnnia'. |